Antoni Blinken İsrailin Baş naziri və Prezidenti ilə görüşəcək
Bakı, 3 noyabr, AZƏRTAC
ABŞ-ın dövlət katibi Antoni Blinken noyabrın 3-də İsrailə səfər edib. Onun yəhudi dövlətinin Baş naziri Binyamin Netanyahu və Prezident İsxak Hersoq ilə görüşləri nəzərdə tutulur.
AZƏRTAC xəbər verir ki, görüş zamanı tərəflər humanitar məsələləri və Fələstin-İsrail münaqişəsini müzakirə edəcəklər.
“Baş nazir Binyamin Netanyahu, Prezident İsxak Hersoq və digər rəhbərlərlə görüşmək üçün İsrailə qayıtdım. Biz İsrailin “özünümüdafiə” hüququnu və Qəzza sektorunda mülki əhaliyə humanitar yardımı müzakirə edəcəyik”, - deyə Antoni Blinken bildirib.
Bir müddət öncə “The New York Times” və “The Washington Post” qəzetləri ABŞ dövlət katibinin İsrailə səfəri zamanı hakimiyyət orqanlarını “humanitar fasilələr” elan etməyə çağıracağını yazıb.
Qeyd edək ki, Antoni Blinken İsrail, Hindistan, İordaniya, Koreya Respublikası və Yaponiyaya səfərlərdən ibarət turneyə çıxıb.
Bölmənin digər xəbərləri
