AQRAR BÖLMƏDƏ TEXNİKA ÇATIŞMAZLIĞI ARADAN QALDIRILIR
AZƏRTAC xəbər verir ki, Kənd Təsərrüfatı Nazirliyinin Ucar sərgi-satış yarmarkalar bazasında seminar-müşavirə keçirilmişdir.
Naxçıvan Muxtar Respublikası Kənd Təssərrüfatı Nazirliyi, “Aqrarkredit” Səhmdar Kredit Təşkilatı, regiondakı rayon icra hakimiyyətləri, ərazi kənd təsərrüfatı idarələri nümayəndələrinin, Dövlət Texniki Nəzarət müfəttişləri və fermerlərin iştirak etdiyi tədbirdə kənd təsərrüfatı naziri İsmət Abasov çıxış etmişdir.
Nazir qeyd etmişdir ki, “Azərbaycan Respublikası regionlarının sosial-iqtisadi inkişafı Dövlət Proqramı”nın icrası ilə əlaqədar aqrotexservis qurumlarının yaradılması, fermerlərin və digər istehsalçıların kənd təsərrüfatı texnikası ilə təminatını yaxşılaşdırmaq məqsədi ilə Yaponiya hökumətinin qrantı hesabına alınmış və icarəyə verilmiş texnikanın istifadəsindən Tərəfdaşlıq Fonduna yığılmış vəsaitlə bazaya tender yolu ilə 62 taxılyığan kombayn, 64 traktor, 226 digər müxtəlif kənd təsərrüfatı maşını gətirilmişdir. Həmin texnika servis xidməti göstərmək istəyən hüquqi və fiziki şəxslərə lizinqlə 6 il müddətinə müvafiq qaydada girov qoymaq şərti ilə icarəyə veriləcəkdir. Bugünkü seminar yeni alınmış texnikanın icarəyə verilməsinə həsr olunmuşdur.
Nazir, həmçinin məlumat vermişdir ki, Azərbaycan Prezidentinin “Aqrar bölmədə lizinqin genişləndirilməsi sahəsində əlavə tədbirlər haqqında” 23 oktyabr 2004-cü il tarixli sərəncamında aqrar bölmənin texnika ilə təchizatını çevik təmin etmək, regionların inkişafı ilə əlaqədar Dövlət Proqramında nəzərdə tutulan tədbirlərin icrasını sürətləndirməkdən ötrü “Aqrolizinq” Açıq Səhmdar Cəmiyyəti yaradılmış və dövlət büdcəsindən 2005-2006-cı illər üçün 250 milyard manat vəsait ayrılmışdır.
Bazadan texnika almaq istəyənlər nazirliyin rayon Dövlət Texniki Nəzarət müfəttişliklərinə müraciət edəcəklər.
Seminar-müşavirənin iştirakçıları qayğı və köməyə görə respublika rəhbərliyinə minnətdarlıqlarını bildirmişlər.
Bölmənin digər xəbərləri
