AQTA: İşğaldan azad edilmiş ərazilərdə 7 min 200 başdan çox iribuynuzlu heyvan identikləşdirilib
Bakı, 21 iyul, Günel Türksoy, AZƏRTAC
Azərbaycan Qida Təhlükəsizliyi Agentliyi (AQTA) tərəfindən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na əsasən icraçısı olduğu tədbirlər davam etdirilir.
Bu barədə AZƏRTAC-ın sorğusuna AQTA-nın İnformasiya təminatı və innovativ həllər şöbəsindən verilən cavabda bildirilib.
Qeyd olunub ki, 2023-cü ilin martın 15-16-da azad zonanın yaradılması və sərhədlərinin müəyyən edilməsi ilə bağlı Ümumdünya Heyvan Sağlamlığı Təşkilatı (ÜHST) və Birləşmiş Millətlər Təşkilatının Ərzaq və Kənd Təsərrüfatı Təşkilatının müstəqil ekspertləri dəvət olunublar və onlarla birlikdə sözügedən ərazilərə baxış keçirilərək heyvan xəstəliklərindən azad zonanın sərhədləri təyin edilib. Azad zona barədə ÜHST-nin Ali Baş Qərargahında müzakirələr aparılıb. Müzakirələrdə təşkilatın Baş direktoru tərəfindən planlaşdırılan tədbirlər müsbət qarşılanaraq təşkilat tərəfindən mümkün köməkliklərin göstəriləcəyi barədə razılıq əldə olunub.
Həmin ərazilərdə AQTA-nın, Azərbaycan Qida Təhlükəsizliyi İnstitutunun, Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzinin və yerli Heyvan Sağlamlığı və Baytarlıq Xidmətləri idarələrinin mütəxəssislərinin iştirakı ilə mütəmadi olaraq epizootoloji monitorinqlər aparılır. 2024-cü ilin 26 avqust-4 sentyabr tarixlərində işğaldan azad edilmiş ərazilərdə (Xocavənd, Xocalı, Kəlbəcər, Cəbrayıl, Zəngilan, Qubadlı, Laçın rayonlarında) faktiki müəyyən olunmuş daimi 6 min 772 baş iri və 8 min 820 baş xırdabuynuzlu heyvanların saxlandığı 15 təsərrüfatda epizootoloji monitorinqlər keçirilib. Sonuncu monitorinq isə 2025-ci il iyulun 7-dən etibarən başlanılıb.
Monitorinqlər zamanı xüsusi təhlükəli xəstəliklərə görə laborator müayinələrin aparılması üçün iri və xırdabuynuzlu heyvanlardan diaqnostik nümunələr götürülür, habelə təsərrüfatlar üzrə ümumi baxış keçirməklə, baytarlıq norma və qaydalarına əməl edilməsi üçün məqsədyönlü maarifləndirmə-təbliğat tədbirləri görülür və epizootoloji məlumatlar toplanılaraq təhlil olunur.
Eyni zamanda, AQTA-dan bildirilib ki, heyvanların, həmçinin sosial məşğulluq proqramları çərçivəsində sakinlərə paylanacaq heyvanların identikləşdirilməsinin aparılması və əraziyə identifikasiya edilməmiş heyvanların girişinin qarşısının alınması məqsədilə Daxili İşlər və Kənd Təsərrüfatı nazirliklərinə müvafiq məktublar göndərilib, sözügedən ərazilərə identifikasiya olunmamış heyvanların buraxılmaması ilə bağlı tədbirlərin görülməsi bildirilib. İşğaldan azad edilmiş ərazilərdə mövcud heyvanlardan 7 min 200 başdan çox iribuynuzlu heyvan identikləşdirilərək Heyvanların İdentifikasiyası və Qeydiyyatı Sisteminə daxil edilib.
Bölmənin digər xəbərləri
