“Araz-Naxçıvan”ın yeni transferi: Buradakı dostlarımdan Azərbaycanla bağlı müsbət rəylər aldım
Bakı, 11 iyul, AZƏRTAC
“Agentimin Azərbaycanda çox yaxşı əlaqələri var. Onun sayəsində buraya gəldim”.
Bu sözləri AZƏRTAC-a açıqlamasında “Araz-Naxçıvan”ın yeni transferi Karlos Jatoba deyib.
Braziliyalı yarımmüdafiəçi Naxçıvan təmsilçisinə keçidinin səbəbini açıqlayıb: “Burada gələcək üçün çox yaxşı planın olduğunu gördüm. Nəticədə təklifi dəyərləndirdim və burada oynamağı seçdim. Azərbaycanda dostlarım çıxış edir. Gəlmədən əvvəl “Qarabağ”ın sabiq üzvü Kadi Borges, hazırda Ağdam təmsilçisində forma geyinən Mateus Silva və “Neftçi”nin müdafiəçisi Yuri Matiasdan ölkəniz barədə informasiya almışdım. Onların müsbət rəyləri məni sevindirdi”.
Vaxtilə Portuqaliyanın “Sportinq” komandasında oynamış futbolçu Lissabon təmsilçisində möhkəmlənə bilməməsinin səbəbini də izah edib: “Sportinq”də olarkən ciddi zədə aldım və 6 ay oynaya bilmədim. Əlbəttə, bu qədər futbolsuz qaldığım üçün komandadakı yerimi itirdim”.
K.Jatoba “Araz-Naxçıvan”ın yeni mövsüm üçün hədəflərindən də söz açıb: “Məqsədimiz oyundan-oyuna daha da inkişaf etməkdir. Ötən mövsüm çempionat maraqlı keçib. “Araz-Naxçıvan” liqanı səkkizinci yerdə bitirib. Bizi uzun marafon gözləyir. Əlimizdən gələnin ən yaxşısını etmək istəyirik”.
Qeyd edək ki, Karlos Jatoba “Araz-Naxçıvan”la 1 illik müqavilə imzalayıb.
Bölmənin digər xəbərləri
