ARGENTİNA BÜTÜN ŞÜBHƏLİ TƏYYARƏLƏRİ VURACAQ
Argentina hökuməti Ağ evə bildirmişdir ki, zirvə toplantısı günlərində uçuşlar üçün qadağan edilmiş zonaya icazəsiz daxil olacaq bütün təyyarələr vurulacaqdır.
Argentinanın “Klarin” qəzeti rəsmi mənbələrə istinadla bildirmişdir ki, bu məqsədlə ABŞ Argentinaya son modifikasiyalı 6-8 ədəd “hava-hava” tipli raket göndərəcəkdir. Yüksək dərəcədə dəqiq silahlar Argentinaya oktyabrın ortalarında gətiriləcəkdir.
Qəzet xatırladır ki, Argentinada təyyarələri vurmağa icazə verən qanun yoxdur. Braziliya, Kolumbiya və Venesuelada belə qanunlar narkobiznesə qarşı mübarizə məqsədi ilə qəbul edilmişdir.
Bununla əlaqədar təcili olaraq, Argentina parlamentinə fövqəladə hallarda pozucu təyyarələri məhv etmək hüququ verəcək qanun layihəsi göndərilmişdir.
Gözlənildiyinə görə, noyabrın 4-5-də Mar del Plata kurort şəhərində keçiriləcək IV Amerika zirvə toplantısında Qərb yarımkürəsinin 34 dövlət başçısı, o cümlədən ABŞ Prezidenti Corc Buş iştirak edəcəkdir. Odur ki, indidən Argentinada misilsiz təhlükəsizlik tədbirləri görülür.
Bölmənin digər xəbərləri
