AŞPA-nın onlayn iclasında uşaq hüquqlarının müdafiəsi ilə bağlı müzakirələr aparılıb
Bakı, 19 may, AZƏRTAC
Mayın 19-da Avropa Şurası Parlament Assambleyasının (AŞPA) Sosial, səhiyyə və davamlı inkişaf məsələləri üzrə komitəsinin videokonfrans formatında iclası keçirilib. İclasda “Uşaqlara qarşı cinsi zorakılıqla mübarizə: Avropada fəaliyyət və əməkdaşlığın gücləndirilməsi” mövzusunda uşaqlar üzrə alt komitənin üzvü Baronessa Dorin Masseyin məruzəsi dinlənilib. İclasda Azərbaycanı Milli Məclisin deputatları Pərvin Kərimzadə, Sevinc Fətəliyeva, Könül Nurullayeva və Nigar Arpadarai təmsil ediblər.
AZƏRTAC xəbər verir ki, Milli Məclisin Ailə, qadın və uşaq məsələləri üzrə komitəsinin, AŞPA-nın Sosial, səhiyyə və davamlı inkişaf məsələləri üzrə komitəsinin üzvü Könül Nurullayeva çıxış edərək bu gün uşaqlara qarşı cinsi zorakılığın ən təhlükəli cinayət növlərindən biri olduğunu vurğulayıb. Deputat Azərbaycanın həmin problemlə mübarizədə uğurlu təcrübəsini diqqətə çatdırıb. Bildirib ki, 2001-ci ildən etibarən Avropa Şurasının tamhüquqlu üzvü olan Azərbaycan üçün də uşaq hüquqlarının qorunması hər zaman prioritet məsələlərdən olub və ölkəmiz bu istiqamətdə qarşılıqlı əməkdaşlığa əhəmiyyətli töhfələr verməkdədir. Azərbaycan 2019-cu ildə Avropa Şurasının təşəbbüsü ilə reallaşan “Uşaqlara qarşı onlayn cinsi istismara və seksual zorakılığa son qoyulması” layihəsinə (EndOCSEA@Europe) dəstək verən 10 pilot ölkədən biridir. Azərbaycan həm də “Lanzarote Konvensiyası” kimi tanınan “Uşaqların cinsi istismardan və cinsi zorakılıqdan müdafiəsi haqqında” Avropa Şurası Konvensiyasını ratifikasiya edən 46-cı dövlətdir. Ölkəmiz Lanzarote Konvensiyasının milli formatda həyata keçirilməsini gücləndirmək məqsədilə müəyyən edilmiş tövsiyələri qəbul edir. Çünki uşaq hüquqlarının qorunması bütövlükdə bəşəriyyəti düşündürən ən həssas məsələlərdən biridir.
Deputat diqqətə çatdırıb ki, bu gün dünyanı sürətlə dəyişdirən texnoloji yeniliklər oflayn və onlayn təhlükəsizlik arasındakı fərqi ayırd etməkdə də müəyyən çətinliklər yaradıb. Bu gün uşaqların əksəriyyəti onlayn həyat tərzinə üstünlük verirlər, virtual və real dünya arasında heç bir fərq qoymurlar. Bu mənada, strategiyalarımız və qanunvericiliyimiz də mövcud reallığa uyğunlaşdırılmalıdır. Deputat həm də domen və IP sistemlərinin idarə edilməsi üzrə Təyin Olunmuş Adlar və Nömrələr üzrə İnternet Korporasiyası (ICANN) modelini nəzərdən keçirməyi təklif edib. Diqqətə çatdırıb ki, bunun üçün bütün ölkələrdən birgə və həssas yanaşma tələb olunur. O, uşaqların düzgün müdafiəsi və cinayətkarların bütün yurisdiksiyalarda mühakimə olunmalarını təmin etmək üçün Avropa daxilində əməkdaşlığı gücləndirməyin vacibliyini də diqqətə çatdırıb.
Videokonfransda, həmçinin Avropada uşaq yoxsulluğunun aradan qaldırılmasında beynəlxalq öhdəliklər, eləcə də gələcəkdə ictimai sağlamlıq naminə COVID-19 pandemiyasına qarşı təsirli və hüquqa əsaslanan reaksiyaları əhatə edən mühazirələr də dinlənilib.
Bölmənin digər xəbərləri
