Auditorlar Palatasının yaranmasının 25 ili tamam olur
Bakı, 5 aprel, AZƏRTAC
Ümummilli lider, müstəqil Azərbaycan dövlətinin memarı və qurucusu Heydər Əliyev tərəfindən 1994-cü ildə imzalanmış “Auditor xidməti haqqında” Azərbaycan Respublikasının Qanununa uyğun olaraq yaradılan və 1996-cı il aprelin 5-dən fəaliyyətə başlayan Auditorlar Palatasının 25 ili tamam olur.
AZƏRTAC xəbər verir ki, aprelin 5-də Auditorlar Palatasının fəaliyyətə başlamasının 25 illiyinə həsr olunmuş onlayn tədbir keçirilib. Tədbirdə Auditorlar Palatasının sədri, professor Vahid Novruzov “Azərbaycan auditi 25 ildə” mövzusunda məruzə edib. O, təmsil etdiyi qurumun 25 ildə gördüyü işlərdən, həyata keçirdiyi tədbirlərdən, ölkəmizdə auditin inkişafından, perspektivlərindən və qarşıda duran vəzifələrdən söz açıb.
V.Novruzov qeyd edib ki, ölkəmizdə auditin yaranması və bərqərar olması isə ulu öndər Heydər Əliyevin, inkişafı və beynəlxalq arenaya çıxması isə Prezident İlham Əliyevin adı ilə bağlıdır: “Çünki dünyanın heç bir ölkəsində belə mükəmməl hazırlanmış uzunömürlü, beynəlxalq maliyyə qurumları və xarici həmkarlarımız tərəfindən yüksək dəyərləndirilmiş və dünyada getdikcə model qanun səviyyəsində qəbul edilməyə başlamış nə audit qanunvericiliyi var, nə də dövlət və ya hökumət başçısı səviyyəsində göstərilən diqqət və qayğı. Azərbaycanda auditin keyfiyyətcə yeni inkişaf mərhələsi 2003-cü ildən indiyə qədərki dövrü əhatə edir. Məhz bu dövrdə auditin hüquqi qanunvericilik bazası təkmilləşdirilmiş, audit ölkənin ictimai və iqtisadi həyatında möhkəmlənmiş, Azərbaycan auditinin beynəlxalq qurumlar tərəfindən tanınması və xarici əlaqələrin daha da güclənməsi bu dövrə təsadüf edir”.
Diqqətə çatdırılıb ki, Prezident İlham Əliyevin rəhbərliyi ilə ölkəmizdə uğurla reallaşdırılan iqtisadi islahatlar, o cümlədən sahibkarlığın inkişafı ilə bağlı dövlət proqramlarının həyata keçirilməsi, əhalinin həyat səviyyəsinin yüksəldilməsi, kölgə iqtisadiyyatının azaldılması və korrupsiyaya qarşı mübarizənin gücləndirilməsi, idarəetmə sistemində və bütövlükdə iqtisadi-sosial həyatda şəffaflıq amilinə xüsusi önəm verilməsi Azərbaycanda dayanıqlı və inklüziv iqtisadiyyatın inkişafı üçün zəmin yaradır. Belə şəraitdə sosial-iqtisadi islahatların mühüm amillərindən biri olan şəffaflığın artırılması istiqamətində müstəqil audit də özünəməxsus rol oynamaqdadır. Auditin 25 illik inkişaf təcrübəsi audit sistemində bəzi məsələlərin də təxirə salınmadan həllini zəruri edir. Belə ki, bazar infrastrukturu olmaq etibarilə milli iqtisadiyyatın, ilk növbədə, sahibkarlığın inkişafına töhfəsini daha da artırmaq üçün auditor xidmətinin daha da geniş anlamda qəbul edilməsi, həmin anlayışa sifarişçilərə iqtisadi strategiyaya dair məsləhət və tövsiyələr verməkdən tutmuş optimallaşdırma məsələlərinə qədər əhatəli bir xidmət sahəsinin daxil edilməsi tələb olunur. Beynəlxalq audit praktikasında istifadə olunan fəaliyyət növlərinin və metodlarının geniş tətbiqi ölkəmizdə auditin təşkilinin əsas istiqamətləri kimi mühüm əhəmiyyət kəsb edir. Bundan əlavə auditin dünya standartları səviyyəsində təşkili ona yalnız mühasibat uçotu kontekstində baxılmasını yox, idarəetmə prosesində nəzarət-analitik infrastruktur elementi kimi qəbul olunmasını tələb edir.
Sonra Palatanın 25 illiyinə həsr edilmiş “Azərbaycan auditi 25” sənədli filmi nümayiş etdirilib.
Yubileylə əlaqədar yerli və xarici qurumlardan daxil olmuş təbrik məktubları oxunub.
Tədbirdə Azərbaycan İqtisadçılar İttifaqının sədri, Beynəlxalq İqtisadçılar İttifaqının vitse-prezidenti, Milli Məclisin deputatı, akademik Ziyad Səmədzadə, Azərbaycan Mərkəzi Kooperativlər İttifaqı - “Azərittifaq”ın sədri, Kooperasiya Universitetinin rektoru, Ağsaqqallar Şurasının sədri, Milli Məclisin deputatı, iqtisad elmləri doktoru, professor Eldar Quliyev, Hesablama Palatasının sədri Vüqar Gülməmmədov, Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Möhbalıyev, Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi Nazim Rəcəbov, AMEA-nın İqtisadiyyat İnstitutu nəzdində “Post-konflikt Ərazilərin Bərpası Elmi Mərkəzi”nin rəhbəri, AMEA-nın müxbir üzvü Akif Musayev, Banklar Assosiasiyasının prezidenti Zakir Nuriyev, Auditorlar Palatası Şurasının üzvü, “Ernst & Yanq Holdinqs (SiAyEs) Bi.Vi.” şirkətinin ölkəmizdəki filialının idarəedici partnyoru İlqar Vəliyev, Professional Maliyyə Menecerləri Assosiasiyasının prezidenti Nuriyyə Novruzova, Azərbaycan Mühasiblər və Risk Peşəkarları Assosiasiyasının idarə heyətinin sədri Günay Şahbazova, Auditorlar Palatasının üzvü, “LŞ Audit” MMC-nin direktoru Fərhəddin Hüseynov yubiley ilə əlaqədar təbrik nitqi söyləyiblər.
Sonda auditorlar adından Prezident İlham Əliyevə müraciət qəbul olunub.
Bölmənin digər xəbərləri
