AVQUSTUN 13-NƏ KEÇƏN GECƏ GÖYDƏN SAATDA 100 ULDUZ AXACAQDIR
Bakı, 12 avqust (AZƏRTAC). Yer sakinləri avqustun 13-nə keçən gecə səmada saatda 100 ulduzun axmasını görə biləcəklər. Yer Persey bürcündən gələn meteor axınından keçəcəkdir. Meteorlar səmanın ən qaranlıq guşələrində daha yaxşı görünəcəklər. Axan ulduzları şəhərdən kənarda, süni işıqların olmadığı yerlərdə izləmək daha yaxşıdır.
Meteorlar qum dənəsindən tutmuş noxudadək ölçülərdə qızmar kosmik cismlərdir. Onlar Svift-Tuyyl kometasının izidir. Meteorlar təxminən 130 kilometr məsafədə Yer atmosferinə saatda 200 kilometrdən çox sürətlə daxil olurlar. Bu il planetimiz kometa şleyfinə çox yaxınlaşacaqdır və ona görə də müşahidəçilər saatda 60-100 meteor qeydə ala bilərlər.
Gələn il Perseidanın ulduz axını Ayın bədrlənməsi vaxtına düşəcəkdir. Buna görə də ulduz axınını görmək çətin olacaqdır.
Bölmənin digər xəbərləri
