Avropa Parlamenti Azərbaycanla bağlı qətnaməyə dair səsvermənin keçirilməsi barədə rəqəmləri niyə gizli tutur?
Bakı, 23 yanvar, AZƏRTAC
Tanınmış jurnalist, hüquq müdafiəçisi Azər Həsrət Avropa Parlamentinin Azərbaycan əleyhinə qəbul etdiyi qətnamə ilə bağlı apardığı araşdırmanın və Avropa Parlamentinə ünvanladığı sorğunun nəticələrini açıqlayıb.
Azər Həsrət həmin araşdırma ilə bağlı AZƏRTAC-a açıqlamasında Avropa Parlamentinin yanvarın 18-də müzakirəsini aparıb, 19-da qəbul etdiyi Azərbaycana qarşı qətnamə ilə bağlı verilən səslərin gizli tutulmasının şübhə doğurduğunu bildirib. Nə Avropa Parlamentinin saytında, nə də başqa mənbədə bununla bağlı məlumat əldə edə bilmədiyini vurğulayan hüquq müdafiəçisi deyib: “Yalnız bir məqam vardı ki, oradakı səslərə baxanda sənədin qəbul edilmədiyi qənaətinə gəlmişdim. Çünki həmin rəqəmlərə görə, təklifin lehinə 79, əleyhinə isə 306 səs verilmişdi. Diqqətdən qaçırdığım kiçik bir detal vardı ki, onu da sonradan Avropa Parlamenti ilə rəsmi yazışmada dəqiqləşdirdim. Yəni, bu rəqəmlər bütövlükdə qətnaməyə deyil, ona təklif edilən 3-cü əlavəyə aid idi”.
Tanınmış jurnalist bildirib ki, ümumilikdə həmin qətnaməyə 5 əlavə təklif edilib. Onların hər birisi ayrılıqda səsə qoyulub, səslər isə tam olmasa da ekrana çıxarılıb. Orada elan olunub ki, əlavələrin 5-i də rədd edilib. Qətnaməyə təklif edilən əlavələr o sənədin özündən heç də az sərt deyildi. Amma deputatların çoxu bu əlavələri rədd etməklə, əslində o cür sərt və əsassız qətnaməni də rədd edəcək kimi görünürdü. Lakin sən saydığını say, gör fələk nə sayır? Əlavələrdən sonra qətnamə tam olaraq səsə qoyulur. Özü də qaçaraq. Dərhal da iclasın sədri Evelin Reqner (Avropa Parlamentinin vitse-prezidenti, Avstriya Sosial Demokrat Partiyasının, həmçinin Avropa Parlamentindəki Sosialistlərin və Demokratların Mütərəqqi Alyansı qrupunun üzvü) tərəfindən məsələ qapadılır. Yəni, səs verənlər görünmür. Sadəcə E.Reqner “kim lehinə, kim əleyhinə, kim bitərəfdir” deyərək səslənir. Sonra da elan edir ki, qətnamə qəbul edildi. Avropa Parlamenti ilə yazışmalardan sonra aldığım sənəddən də görünür ki, qətnaməyə ümumilikdə verilən səslər qeyd edilməyib.
Bu cür səsvermənin keçirilməsinin şübhə doğurduğunu bildirən A.Həsrət Avropa Parlamentinin “Vətəndaş Müraciətləri Bölməsi”nə yazaraq məsələyə aydınlıq gətirilməsini tələb edib. Onun yanvarın 19-da göndərdiyi müraciətə bir gün sonra izahlı cavab verilib. Cavabda bir daha qeyd edilib ki, səsvermə əl qaldırmaqla keçirilib. “Mənim təqdim etdiyim rəqəmlər isə 3-cü əlavəyə aiddir. Cavabda əlavə olaraq həmin gün keçirilmiş səsvermələrin hamısının nəticələri də təqdim edilib. Maraqlı bir görüntü var: həmin gün bir sıra sənədlərə səs verilib, hamısında lehinə, əleyhinə, bitərəf səslər rəqəmlə qeyd edilib. Amma Azərbaycanla bağlı ümumi səsvermədə rəqəmlər göstərilmir. Bunun niyə belə olduğunu bilməyə haqqımız yoxdurmu? Bu baxımdan şübhələrimizdə haqlı olduğumuzu düşünürük. Azərbaycan kimi bir dövlətə qarşı açıq qərəzlə dolu bir qətnamənin bu şəkildə qəbul edilməsi sual doğurmaya bilməz. Üstəlik, nəzərə alaq ki, ölkəmiz Rusiyanın Ukraynaya təcavüzü və Azərbaycan da daxil olmaqla bütün qonşulara təhdidləri fonunda Avropaya qucaq açır, özəlliklə də enerji təhlükəsizliyi məsələsində riskə gedir. Belə bir durumda avropalıların heç də hamısının Azərbaycana qarşı olmayacağı gün kimi aydın ikən, necə olur ki, Avropa Parlamenti belə bir üsulla bizə qarşı qətnamə qəbul edir? Ümumiyyətlə, bu qətnamə doğrudanmı qəbul edilib? Axı Avropa Parlamentində səsvermə adbaad olur və bu qətnaməyə də kimin necə səs verməsini bilmək bizim və elə avropalıların haqqı deyilmi?”, - deyə hüquq müdafiəçisi qeyd edib.
A.Həsrət bildirib ki, sənədin qəbulu ilə bağlı Avropa Parlamentinin mətbuat üçün hazırladığı xəbərdə Braziliya, Mərakeş və Azərbaycana aid sənədlər bir səhifədə verilib. İlk iki ölkəyə aid qətnamələrdə verilən səslər rəqəmlərlə qeyd edilsə də, Azərbaycana aid xəbərdə sadəcə “əl qaldırmaqla səs verildiyi” bildirilir və rəqəmlər göstərilmir. Şübhə doğuran da məhz bu idi. Avropa Parlamentinin saytında yayımlanan qəbul edilmiş qətnamənin mətni də “Qəbul edilmiş mətnlər” qeydi ilə paylaşılıb. Bu o deməkdir ki, qətnamə qəbul edilib: “Uzun illərdir beynəlxalq platformalarda həm də səsvermələrdə iştirak edən biri kimi belə üsulları yaxşı bilirəm. Bir çox hallarda belə sənədləri maraqlı tərəflər araya salıb necə “sivişdirə” bilirlər. İndi də əminəm ki, yanvarın 19-da Avropa Parlamentində qəbul edilmiş Azərbaycana aid qətnamə bəlkə də heç yetərincə dəstək görməyib. Elə yəqin ona görə də səsverməni “kolxoz yöntəmi” ilə keçirərək rəqəmləri açıqlamağa belə lüzum görməyiblər”.
Hüquq müdafiəçisi səsverməni keçirən Evelin Reqnerin Avropa Parlamenti karyerasında həm də Türkiyəyə qarşı qondarma “erməni soyqırımı” ilə bağlı sənədin təşəbbüskarlarından biri olduğunu da vurğulayıb.
Qeyd edək ki, Azərbaycanla bağlı qətnaməyə dair səsvermə zamanı Avropa Parlamentinin iclasında 705 üzvdən 410-u iştirak edib. Anti-Azərbaycan qətnamə “Dağlıq Qarabağda blokadanın humanitar nəticələri” adı altında təqdim edilib.
Bölmənin digər xəbərləri
