AVROPA ŞURASININ BAŞ KATİBİ AZƏRBAYCAN NÜMAYƏNDƏ HEYƏTİNİ QƏBUL ETMİŞDİR
Nümayəndə heyətinin rəhbəri Səməd Seyidov görüş barədə azərbaycanlı jurnalistlərə verdiyi müsahibəsində bildirmişdir ki, baş katiblə söhbət çox konstruktiv keçmişdir. Bu görüş ölkəmizdə keçiriləcək parlament seçkiləri ilə bağlı idi.
Baş katib Azərbaycanda seçkilərin açıq, demokratik, şəffaf və Avropa standartlarına uyğun keçirilməsi məsələsi ətrafında müzakirələr aparmağı təklif etmişdir. Azərbaycanlı deputatlar bu sahədə görülmüş işlər barədə məlumat verərək, baş katibi əmin etmişlər ki, Azərbaycan iqtidarı, AŞPA-dakı Azərbaycan nümayəndə heyəti seçkilərin tam şəffaflıq şəraitində keçməsi üçün bütün imkanlardan isifadə edir və bu səylər davam etdiriləcəkdir.
Azərbaycan nümayəndə heyəti AŞ tərəfindən ölkəmizə göndəriləcək müşahidəçilərin sayının artırılmasını razılıq hissi ilə qarşılamış, bu seçkilərdə müşahidələrin açıq və şəffaf aparılmasını arzulamışdır.
Baş katib də bu fikirdə olduğunu söyləmişdir. Tərəflər istər seçki kampaniyasının, istərsə də seçkilərin sakit və problemsiz keçirilməsinin həm Avropa Şurası, həm də Azərbaycan üçün çox mühüm məqam olduğu vurğulanmışdır.
Terri Devis seçkilərdən sonra, AŞPA-nın qış sessiyasında dinləniləcək məruzənin seçkilərin təşkili və gedişi ilə bağlı olacağını söyləmişdir.
Azərbaycan nümayəndə heyəti baş katibi əmin etmişdir ki, seçkilərin demokratik və şəffaf şəraitdə keçməsi üçün öz səylərini əsirgəməyəcəkdir.
