Avropa yay məzuniyyətləri mövsümü barədə düşünməyə başlayıb
Brüssel, 15 may, AZƏRTAC
Avropa Komissiyası yay məzuniyyətləri mövsümünün təhlükəsizliyinin təmin edilməsi məqsədi ilə bu gün Aİ-nin daxili sərhədlərinin tezliklə açılması barədə məsələnin nəzərdən keçirilməsini təklif edib.
AZƏRTAC xəbər verir ki, Brüsselin fikrincə, xarici sərhədləri hələlik bağlı saxlanmalıdır.
Məsələ bundadır ki, Avropanı təkrar virus ocağının yaranmasına məruz qoymadan Aİ daxilində yay məzuniyyətləri mövsümünün keçirilməsinin təmin edilməsi çağırışları getdikcə daha ucadan səslənir. Avropa Komissiyası turizm və nəqliyyat üzrə tövsiyələr paketini baxılması üçün Avropa Parlamentinə təqdim edərkən məhz bu məqsədi güdüb. Siyasətçilər hesab edirlər ki, lokdaun və karantin insanlarda psixoloji gərginlik yaradıb, onlara bu gərginlikdən çıxmaq, psixoloji rahatlıq lazımdır. Lakin təhlükəsizlik və gigiyena tədbirlərinə əvvəlki kimi ciddi riayət edilməlidir.
Bundan əlavə, Avropa Komissiyası vurğulayır ki, Avropa İttifaqının bütün dövlətləri bu məsələdə əlbir hərəkət etməlidirlər.
Vüqar Seyidov
AZƏRTAC-ın xüsusi müxbiri
Brüssel
Bölmənin digər xəbərləri
