Avropada yüz minlərlə ton qəhvə və kakao məhv edilə bilər
Bakı, 29 noyabr, AZƏRTAC
Avropada yüz minlərlə ton qəhvə və kakao məhv edilə bilər.
AZƏRTAC xarici KİV-lərə istinadla xəbər verir ki, buna səbəb meşələrin qorunub saxlanması ilə bağlı yayda qəbul olunmuş qanundur.
“Financial Times” nəşrində deyilir ki, iyun ayında qəbul edilmiş qanun meşələrin qırılması və uşaq əməyinin istifadəsi nəticəsində istehsalı mümkün olan malların idxalını qadağan edir.
“İstehsalçılar qəhvə və kakao ehtiyatlarını keçid dövründə - 2024-cü ilin dekabrına qədər satmalıdırlar, əks halda onları Avropa İttifaqından kənarda satmalı və ya məhv etməli olacaqlar”, - deyə Beynəlxalq Ticarət Mərkəzinin icraçı direktoru Pamela Kouk-Hamilton bildirib.
Hazırda Avropa anbarlarında 200 min tona yaxın kakao və 150 min ton qəhvə saxlanılır. Kakaonun təqribən 70 faizi Qanadan və Kot-d'İvuardan gətirilib. Qəhvə ehtiyatlarının əsas hissəsi Braziliya, Vyetnam, Kolumbiya və İndoneziyadan daxil olub.
Qəzetin məlumatına görə, rəsmi Brüssel indiyədək Avropa İttifaqına üzv ölkələrin hökumətlərinə bu məhsulların məhv edilməsinin qarşısını almaq üçün dəqiq göstəriş verməyib. Kateqoriyalardakı qarışıqlıq, həmçinin qəhvə və kakaonun dəqiq paylanmaması səbəbindən hər iki məhsulun ticarəti yavaşlaya bilər.
Bölmənin digər xəbərləri
