Avstraliyada qızmar istilər nəticəsində onlarca vəhşi at tələf olub
Bakı, 25 yanvar, AZƏRTAC
Avstraliya cırhacır istilərdən əziyyət çəkir. Termometrin civə sütunu Selsi ilə 48 dərəcəyə yüksəlib. AZƏRTAC CNN telekanalına istinadla xəbər verir ki, heyvanlar susuzluq və yüksək temperatur nəticəsində kütləvi surətdə qırılır.
Ölkənin cənubunda, Alis-Sprinqs şəhəri yaxınlığındakı meşədə onlarca ölü heyvan aşkar edilib. Qızmar istilərə görə göllər quruduğu üçün atlar və digər heyvanlar susuz qalıb.
Alis-Sprinqsdə artıq iki həftədir havanın temperaturu 42 dərəcədən enmir. Yerli meteoroloqlar bildirirlər ki, belə istilər bu bölgə üçün rekord göstəricidir.
Sedun şəhərində isə temperatur 48,6 dərəcəyə yüksəlib. Cənubi Avstraliyanın bütün ərazisi yüksək temperaturun cəngindədir. Son bir gün ərzində istilərə görə həkimlərə 44 adam müraciət edib.
Bölmənin digər xəbərləri
