AZƏRBAYCAN AVROPA ŞURASI QARŞISINDA GÖTÜRDÜYÜ DAHA BİR ÖHDƏLİYİ YERİNƏ YETİRDİ
İşçi qrupunun rəhbəri, deputat Rizvan Cəbiyev məlumat verərək bildirmişdir ki, qanun layihəsi 3 dəfə Avropa Şurasına ekspertizaya göndərilmişdir. Layihənin təkmilləşdirilməsinə dair qurumun ekspertlərinin təkliflərinin bir çoxu nəzərə alınsa da, layihədə mühüm düzəlişlər edilsə də, qanun üçüncü oxunuşda qəbul olunduqdan sonra Azərbaycan Prezidenti bir sıra iradları əsas götürərək, ona veto qoymuşdur.
Bu günlərdə Avropa Şurasının ekspertləri Bakıda olmuş, əsas iradlar - televiziyanın baş direktoruna bəzi səlahiyyətlərin verilməsi, reklam vaxtının azaldılması, ictimai televiziyanın Dövlət Teleradio Şirkətinin bazasında yaradılması, Yayım şurası üzvlərinin təsdiqi və milli azlıqların dilində verilişlərlə əlaqəli məsələlər qanunun yeni variantında öz əksini tapmışdır.
Müzakirələr zamanı deputatlar layihənin ölkəmizdə demokratiyanın inkişafı baxımından əhəmiyyətindən danışmış və onun Avropa standartlarına tam cavab verdiyini bildirmişlər. Eyni zamanda, onlar ictimai televiziya ilə yanaşı, dövlət televiziyasının da qalmasını vacib saymışlar.
Bölmənin digər xəbərləri
