Azərbaycan-Çexiya münasibətləri əməkdaşlıq modelinə çevrilməkdədir - ŞƏRH
Bakı, 28 aprel, AZƏRTAC
Azərbaycan-Çexiya münasibətləri son illərdə həm siyasi dialoq, həm iqtisadi əməkdaşlıq, həm də humanitar sahədə qarşılıqlı maraqlar üzərində inkişaf edərək daha konkret məzmun kəsb etməkdədir. Bu münasibətlər yalnız ikitərəfli çərçivə ilə məhdudlaşmır, eyni zamanda, Azərbaycanın Avropa ilə əməkdaşlıq strategiyasının mühüm istiqamətlərindən biri kimi çıxış edir. Son dövrlərdə qarşılıqlı səfərlərin intensivləşməsi diqqəti xüsusi cəlb edir.
Bu sözləri AZƏRTAC-a açıqlamasında Beynəlxalq Avrasiya Mətbuat Fondunun prezidenti Umud Mirzəyev söyləyib.
O bildirib ki, Bakı ilə Praqa arasında yüksəksəviyyəli siyasi dialoq çərçivəsində həm hökumət nümayəndələrinin, həm də parlament üzvlərinin qarşılıqlı səfərləri həyata keçirilib. Bu səfərlər zamanı enerji təhlükəsizliyi, iqtisadi əməkdaşlıq, nəqliyyat-logistika və regional təhlükəsizlik məsələləri geniş müzakirə olunub, konkret əməkdaşlıq istiqamətləri müəyyən edilib.
"Azərbaycanın ərazi bütövlüyünün bərpasından sonra regionda yaranmış yeni reallıqlar fonunda Çexiyanın beynəlxalq hüquqa əsaslanan mövqeyi və postmünaqişə dövründə bərpa proseslərinə marağı xüsusi əhəmiyyət kəsb edir. Proseslər göstərir ki, iqtisadi münasibətlərdə enerji sahəsi aparıcı yer tutsa da, Çexiya şirkətlərinin Azərbaycanda, xüsusilə Qarabağ və Şərqi Zəngəzur iqtisadi rayonlarında həyata keçirilən bərpa və yenidənqurma layihələrinə marağı getdikcə artır. Çexiya tərəfi bu ərazilərdə “ağıllı şəhər” və “ağıllı kənd” konsepsiyalarının tətbiqi, su və tullantıların idarə olunması, alternativ enerji mənbələrinin inkişafı, həmçinin mühəndis-texniki infrastrukturun qurulması sahələrində iştirak imkanlarını nəzərdən keçirir. Bu baxımdan, Azərbaycanın yaratdığı əlverişli investisiya mühiti və şəffaf əməkdaşlıq mexanizmləri Çexiya biznes dairələrinin diqqətini cəlb edir", - U.Mirzəyev vurğulayıb.
BAMF-in prezidenti qeyd edib ki, humanitar və mədəni əlaqələr də münasibətlərin mühüm sütunlarından biri olaraq qalır. Bu yanaşma iki ölkə arasında etimad mühitini daha da gücləndirir. Ümumilikdə Azərbaycan-Çexiya münasibətləri artıq konkret iqtisadi və regional layihələrlə zənginləşən, xüsusilə Qarabağın bərpası kontekstində yeni məzmun qazanan əməkdaşlıq modelinə çevrilməkdədir. Bu əməkdaşlığın dərinləşdirilməsi həm Azərbaycanın Avropa ilə əlaqələrinin genişlənməsinə, həm də regionda davamlı inkişaf və sabitliyin təmin olunmasına mühüm töhfə verə bilər.
Bölmənin digər xəbərləri
