AZƏRBAYCAN DİLİNDƏ İNTERNETDƏN BƏHS EDƏN İLK KİTAB ÇAPDAN ÇIXMIŞDIR
Multimedia İnformasiya Sistemləri və Texnologiyaları Mərkəzində Azərbaycan dilində internetdən bəhs edən ilk kitab çapdan çıxmışdır.
Kitabın müəllifi, mərkəzin direktoru Osman Gündüz AZƏRTAC-ın müxbirinə bildirmişdir ki, məqsəd hər bir soydaşımızın internetdən faydalanmasına yardım etmək, istifadəçilərə, bütövlükdə, virtual Azərbaycan haqqında geniş məlumat verməkdir. Kitab “İnternetə ümumi baxış”, “Azərbaycan interneti” və “Azərbaycan internet resursları” adlı 3 bölmədən ibarətdir. Birinci bölmədə internet haqqında ümumi məlumat və ondan istifadə qaydaları verilmişdir. İkinci bölmə respublikamızda internetin tarixindən, onun formalaşmasından və hazırki vəziyyətindən bəhs edir. Kitabın əsasını təşkil edən üçüncü bölmə isə Azərbaycan dilli internet resursları kataloqundan ibarətdir. Müxtəlif mövzular ətrafında 30 bölmə və 110 alt bölmə üzrə sistemləşdirilmiş kataloqa ölkəmizdə və xarici serverlərdə yerləşən 1000-dək milli WEB resurs haqqında qısa icmal və ünvan daxil edilmişdir.
Virtual aləm daim inkişaf etdiyindən və dəyişildiyindən internet resursları kataloqunun da müntəzəm olaraq yeniləşdirilməsi və hər il yenidən nəşri nəzərdə tutulmuşdur. Kitabın elektron variantının da hazırlanması qərara alınmışdır.
Bölmənin digər xəbərləri
