Bakı, 2 fevral, AZƏRTAC

2 Fevral - Azərbaycan Gəncləri Günüdür. Ümummilli Lider Heydər Əliyevin 1997-ci il fevralın 2-də imzaladığı Fərmana əsasən təsis olunan Gənclər Günü ölkəmizdə geniş qeyd olunur və diqqəti bir daha gəncliyin inkişafı kimi ümdə məsələyə yönəldir. Gənclərimiz Ulu Öndərin onlara ən böyük hədiyyəsi olan bu günün təsis edilməsinin 27 illiyini ərazi bütövlüyü və suverenliyi tap bərpa olunmuş qalib ölkənin məğrur vətəndaşları kimi böyük ruh yüksəkliyi ilə qeyd edirlər.

AZƏRTAC Azərbaycanda gənclərlə bağlı dövlət siyasətinin bəzi əsas məqamlarına, bu istiqamətdə atılan addımlara, qazanılan uğurlara nəzər salır. Qeyd edək ki, bu siyasət, gəncliyə göstərilən diqqət və qayğı etibarlı gələcəyimiz üçün qarantdır.

Azərbaycanda dövlət gənclər siyasətinin əsası Ulu Öndər tərəfindən qoyulub

Respublikamızda dövlətin gənclər siyasətinin əsasları Ümummilli Lider Heydər Əliyevin rəhbərliyi dövründə formalaşıb. Məhz həmin dövrdə Gənclər və İdman Nazirliyi yaradılıb, Azərbaycan Gənclərinin Birinci Forumu keçirilib. Ulu Öndər gənclərin vətənə sədaqət ruhunda formalaşmalı olduğunu qeyd edir, doğma torpağını qorumağı hər bir gənc üçün müqəddəs vəzifə kimi qiymətləndirirdi. Bu gün dövlət gənclər siyasəti Azərbaycanda gənc nəslin mənəviyyatca zəngin, vətənpərvərlik ruhunda tərbiyəsi, gənclərin hərtərəfli inkişafı və ölkə həyatında fəal iştirakı üçün mühüm zəmin yaradır.

Dahi şəxsiyyət Heydər Əliyev aydın strategiya ilə müstəqilliyimizin ilk illərində gənclərin enerji və imkanlarını milli maraqlarımızın müdafiəsinə səfərbər etdi, onların vətənpərvər ruhda yetişməsinə zəmin yaratdı. Gənclərin mənəvi inkişafı, ictimai-siyasi həyatda fəal iştirakı, xarici ölkələrdə təhsili, sosial müdafiəyə ehtiyacı olanların problemlərinin həlli istiqamətində davamlı addımlar atıldı. Gənclər təşkilatlarının formalaşması və inkişafına yaşıl işıq yandırıldı. Gənc kadrlar vəzifədə irəli çəkildi, bir sıra mühüm dövlət işlərinə rəhbərlik onlara etibar edildi.

Hazırda ölkəmizin aparıcı qüvvəsi olan gənclər son 20 ildə formalaşıb

2007-ci ildə müvafiq Sərəncamla təsdiqlənmiş "2022-2026-cı illərdə gənclərin xarici ölkələrin nüfuzlu ali təhsil müəssisələrində təhsil almalarına dair Dövlət Proqramı”nın icrası müddətində hər il ümumilikdə 2 min nəfərədək Azərbaycan vətəndaşının xaricdə nüfuzlu ali təhsil müəssisələrində bakalavriat və magistratura səviyyələrində təhsil alması təmin ediləcək. Bu proqram çərçivəsində minlərlə gənc dünyanın ən nüfuzlu təhsil ocaqlarında oxuyur.

Ölkəmizdə gənclərin məşğulluğunun təmin olunması da diqqət mərkəzindədir. Heydər Əliyev Fondu tərəfindən gənclərin istedad və bacarıqlarının üzə çıxarılması istiqamətində həyata keçirilən layihələr yetişməkdə olan nəslin gələcəyinin etibarlı təminatında böyük əhəmiyyət kəsb edir. Eləcə də Fondun rəhbərliyinin təşəbbüsü ilə xaricdə və ölkəmizdə reallaşan layihələr Azərbaycanın uğurlarının təbliğində, gənclərimizin fəallığının artırılmasında və onların fəaliyyətlərinin əlaqələndirilməsində mühüm rol oynayır. Bu ali diqqət və qayğını daim öz üzərində hiss edən Azərbaycan gəncliyi göstərilən etimadı layiqincə doğrultmağa çalışır. Bu yüksək münasibətə cavab olaraq Azərbaycanın parlaq gələcəyinin təminatçısı olan gənclər Vətənin inkişafı üçün bütün qüvvə və bacarıqlarını səfərbər edir, səylə çalışırlar. Həmçinin Gənclər və İdman Nazirliyi bu istiqamətdə mühüm layihələr reallaşdırır. İdmançı gənclərimiz xalqımızı beynəlxalq arenalarda qazandıqları parlaq qələbələrlə sevindirir.

Ölkəmizdə gənclər siyasəti keyfiyyətcə yeni mərhələyə qədəm qoyub

Azərbaycan gəncliyi ona göstərilən diqqət və qayğını yüksək dəyərləndirməklə yanaşı, məsuliyyətini də dərk edir və dövlətimizin müəyyənləşdirdiyi strateji vəzifələrin uğurla həyata keçirilməsinə töhfəsini verməyə çalışır. Qalib xalqın gəncləri bu gün cəmiyyətimizin ən fəal hissəsi kimi ölkənin sosial-iqtisadi və ictimai-siyasi həyatında yaxından iştirak edirlər. İşğaldan azad olunmuş ərazilərimizin dirçəldilməsində, əzəli torpaqlarımızda həyatın yenidən bərpasında və Böyük Qayıdış prosesində gənclərin fəal iştirakı ilə bağlı gözləntilər də böyükdür. Bu xüsusda “Böyük Qayıdış” Gənclər Təşkilatın fəaliyyətində fəal iştirak edən gənclərin təşəbbüsləri yüksək qiymətləndirilir, bu nəcib işə hərtərəfli dəstək göstərilir.

Qeyd edək ki, fevralın 1-də Prezident İlham Əliyev “2024-cü il Gənclər üçün Prezident mükafatlarının verilməsi haqqında” Sərəncam imzalayıb. Sərəncama əsasən, elm, təhsil, mədəniyyət, gənclər siyasəti və gənclərlə iş, ictimai və sosialyönümlü fəaliyyət, innovasiya və sahibkarlıq sahələrində xüsusi fərqlənən 10 nəfərə 2024 cü il Gənclər üçün Prezident mükafatları verilib.

Bölgələrdə gənclərin inkişafına diqqət artır

2012-ci ildən hər il paytaxt Bakı istisna olmaqla, Azərbaycanın şəhər və rayonlarından biri Gənclər paytaxtı elan olunur. Lənkəran şəhərinin 2024-cü il üçün Gənclər paytaxtı seçilməsi bölgələrdə gənclər hərəkatının və gənclərin inkişafına töhfə verəcək. Ötən il noyabrın 8-9-da İsmayıllı rayonunun Basqal qəsəbəsində keçirilən Türk Dövlətləri Təşkilatı gənclər və idman nazirlərinin yeddinci iclasında gənclər və idmana cavabdeh qurumların təklifləri nəzərdən keçirilib, qarşıdakı fəaliyyət proqramı açıqlanıb. "Paytaxt İli" çərçivəsində Türkdilli dövlətlərin nümayəndələrinin iştirakı ilə Gənclər Platforması, Gənc Liderlər Forumu və Gənc Sahibkarların Forumu kimi mühüm tədbirlərin keçirilməsi planlaşdırılır. Qeyd edək ki, Azərbaycanın daha bir şəhəri - Şuşa isə İslam Əməkdaşlığı Təşkilatının 2024-cü il üzrə Gənclər Paytaxtı seçilib.

Vətən müharibəsində əsas missiyanı məhz son 20 ildə yetişən gənclər yerinə yetirdilər

Gənclər siyasətində milli və dövlətçilik maraqlarının, vətənpərvərlik tərbiyəsinin önə çıxması 2020-ci ilin 44 günlük İkinci Qarabağ müharibəsində həlledici rol oynadı. Vətən müharibəsində əsas missiyanı məhz son 20 ildə yetişən gənclər yerinə yetirdilər. Azərbaycan gəncləri üçün ən həlledici sınaqlardan biri də 2020-ci il sentyabrın 27-də başlayan və noyabrın 10-dək davam edən Vətən müharibəsi oldu. Rəşadətli Azərbaycan Ordusunun sıralarında işğalçılara qarşı mətanətlə vuruşan qəhrəman gənclərimiz adlarını xalqımızın ən yeni tarixinə qızıl hərflərlə yazdılar. Məhz onların rəşadəti sayəsində qazanılan bu şanlı Zəfər sayəsində Azərbaycan ərazi bütövlüyünü bərpa etdi, xalqımız otuz illik həsrətdən sonra tarixi torpaqlarına qovuşdu. Təqdirəlayiq haldır ki, gənclərimiz Vətən uğrunda döyüşlərlə yanaşı, arxa cəbhədə də yüksək fəallıq göstərib, ölkəmizlə bağlı həqiqətlərin, işğalçı Ermənistanın əzəli torpaqlarımızda törətdikləri vandallıq aktlarının beynəlxalq ictimaiyyətə çatdırılmasında yaxından iştirak ediblər. Gənc nəslin problemlərinin həlli, onların cəmiyyət həyatında iştirakının təmin olunması üçün həyata keçirilən bütün zəruri tədbirlər Azərbaycan gəncliyini daha işıqlı sabaha aparır. Bu yolda dövlətimiz onlara daim dəstək olur.