AZƏRBAYCAN GÜLƏŞÇİLƏRİ TBİLİSİDƏ KEÇİRİLƏCƏK BEYNƏLXALQ TURNİRDƏ İŞTİRAK EDƏCƏKLƏR
AZƏRTAC xəbər verir ki, iyulun 12-dən 15-dək Gürcüstanın paytaxtı Tbilisidə yunan-Roma güləşi üzrə dünya çempionu Qivi Qartoziyanın xatirəsinə, sərbəst güləş üzrə dünya və SSRİ çempionu Vaxtanq Balovadzenin şərəfinə beynəlxalq turnir keçiriləcəkdir. Turnirdə Azərbaycan idmançıları da iştirak edəcəklər.
Artıq məşqçi Bəhrəm Mürvətovun rəhbərliyi altında yarışa yollanacaq yığma komandamızın heyəti məlumdur. Azərbaycanı qonşu ölkədə Cavid Abdullayev (55 kq), Natiq Bağırov (55 kq), Natiq Aslanov (55 kq), Fuad Əliyev (60 kq), Taleh İsrafilov (60 kq), Sakit Cəlilov (60 kq), Elbrus Məmmədov (60 kq), Elməddin Abdullayev (74 kq) və Elgiz Məmmədov (74 kq) təmsil edəcəklər.
Məşqçilər Vahid Məmmədov və Rövşən Umudovun rəhbərlik etdiyi sərbəst güləş üzrə yığma komandaya isə Elşən Mirzəyev (55 kq), Ceyhun Əliyev (55 kq), Vüsal Axundov (60 kq), Bəhruz Nuriyev (60 kq), Emin Əzizov (66 kq), Əli İsgəndərov (66 kq), Vüsal Əliyev (66 kq), Elman Əsgərov (66 kq), Elnur Aslanov (74 kq), Elnur Əliyev (74 kq), Hacı Əlicanov (84 kq), Vüqar Qurbanov (96 kq) və Müslüm Müslümov (96 kq) daxildir.
Bölmənin digər xəbərləri
