Azərbaycan İlahiyyat İnstitutunun “Qış məktəbi” davam edir
Bakı, 1 fevral, AZƏRTAC
Azərbaycan İlahiyyat İnstitutu (Aİİ) Şamaxı rayonunda “Qış məktəbi” layihəsi çərçivəsində “Din, mədəniyyət və cəmiyyət” mövzusunda seminar təşkil edib.
Aİİ-dən AZƏRTAC-a bildirilib ki, “Qış məktəbi” layihəsinin ikinci günündə tələbələr üçün təşkil olunan seminarlarda dillər və ictimai fənlər kafedrasının müdiri İlkin Əlimuradov “Azərbaycanlı İslam alimləri” mövzusunda məruzə ilə çıxış edib. O, ilahiyyat sahəsində və bununla bağlı elmlərdə müstəsna xidmətləri olmuş azərbaycanlı alimlərin həyat və yaradıcılığından danışıb. Məruzəçi Seyid Yəhya Bakuvi, Fazil Dərbəndi, Mirhəmzə Nigari, Bəhmənyar, Xətib Təbrizi, Siracəddin Urməvi, Əkmələddin Naxçıvani, Şəhabəddin Sührəvərdi, Nəsirəddin Tusi, Seyid Yəhya Bakuvi, Fazil İrəvani kimi dünyamiqyaslı alimlərin yaradıcılığından bəhs edib. İ.Əlimuradov azərbaycanlı alimlərin təsəvvüf, fəlsəfə və ümumiyyətlə, Şərq ictimai fikrində, mədəniyyətində xüsusi rol oynadıqlarını vurğulayıb.
“Miras” Mədəni İrsin Öyrənilməsinə Kömək İctimai Birliyi İdarə Heyətinin sədri Fariz Xəlilli isə “Şirvanın maddi-mədəni irsi” mövzusunda məruzə edib. F.Xəlilli bildirib ki, Azərbaycanda dövlət siyasətinin əsas istiqamətlərindən biri də maddi-mədəni irsimizin qorunmasıdır. O, Şamaxı ərazisində yerləşən abidələrimiz haqqında ətraflı məlumat verərək, sözügedən ərazidə ən azı 5 mədəniyyət nümunəsinin qorunduğunu diqqətə çatdırıb. Şamaxının Avaxıl kəndində yerləşən Pir Ömər türbəsi, Şahxəndan və “Yeddi günbəz” qəbiristanlığı, həmçinin dahi şairimiz Mirzə Ələkbər Sabirin ev-muzeyi və digər tarixi abidələrimiz haqqında tələbələrə məlumat verib.
Tələbələr Mirzə Ələkbər Sabirin ev-muzeyində görkəmli şairin həyat və yaradıcılığına aid müxtəlif materiallarla tanış olublar. Sonra onlar Şamaxı rayonunun Avaxıl kəndində yerləşən Pir Ömər türbəsində olublar. Burada tələbələr türbə, Pir Ömər Avaxılın kimliyi haqqında və sufi məktəblərindən biri olan xəlvətilik barədə maraqlı məlumatlar əldə ediblər.
Şamaxı Astrofizika Rəsədxanasına ekskursiya zamanı tələbələr astronomik muzeyə və teleskoplara əyani baxış keçiriblər. Onlar rəsədxananın yaradılması və fəaliyyəti haqqında məlumatlandırılıb.
Qeyd edək ki, fevralın 2-nə qədər davam edəcək “Qış məktəbi”nin təşkilində məqsəd tələbələrdə vətənpərvərlik ruhunun gücləndirilməsi, onların intellektual səviyyəsinin və dünyagörüşünün zənginləşdirilməsi, ölkəmizdə həyata keçirilən dini maarifləndirmə işinə töhfə verməkdir.
Bölmənin digər xəbərləri
