AZƏRBAYCAN İLƏ İORDANİYA ARASINDA İQTİSADİ ƏMƏKDAŞLIĞIN İNKİŞAF ETDİRİLMƏSİ ÜÇÜN BÖYÜK İMKANLAR MÖVCUDDUR
AZƏRTAC xəbər verir ki, bu fikir mayın 6-da Bakı Beynəlxalq Dəniz Vağzalında Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə keçirilmiş Azərbaycan-İordaniya biznes-forumunda səslənmişdir.
Tədbirdə İordaniya tərəfdən iqtisadiyyatın müxtəlif sahələrini təmsil edən 90-dək, Azərbaycandan isə müvafiq sahələrdə fəaliyyət göstərən 150-dək iş adamı iştirak etmişdir.
Azərbaycan iqtisadi inkişaf nazirinin müavini Mikayıl Cabbarov ümummilli lider Heydər Əliyevin rəhbərliyi ilə başlanmış və bu gün Prezident İlham Əliyev tərəfindən uğurla davam etdirilən sosial-iqtisadi inkişaf strategiyası nəticəsində qazanılmış nailiyyətlər barədə məlumat vermişdir. Bildirilmişdir ki, hazırda Azərbaycan ümumi daxili məhsulun (ÜDM) artım sürətinə görə dünya ölkələri arasında lider dövlətlərdən biridir. Son illər ölkənin iqtisadiyyatına daha çox investisiya cəlb etmək üçün biznes mühiti daha da yaxşılaşdırılmış, sahibkarlıq fəaliyyətinin inkişafı istiqamətində ciddi işlər görülmüşdür. Nazir müavini Azərbaycanda qeyri-neft sektorunun, o cümlədən kənd təsərrüfatı sahəsinin inkişafı üçün ölkə rəhbərliyi tərəfindən görülmüş tədbirlərdən danışmış, bu istiqamətdə regionların sosial-iqtisadi inkişafı Dövlət Proqramının əhəmiyyətini diqqətə çatdırmışdır.
Azərbaycan ilə İordaniya arasında iqtisadi əməkdaşlıq əlaqələrinin daha da inkişaf etdirilməsi, qarşılıqlı investisiya mübadiləsi üçün əlverişli şəraitin olduğu qeyd edilmişdir. Bildirilmişdir ki, Azərbaycan İordaniya ilə hərtərəfli əməkdaşlıqda, o cümlədən qeyri-neft sektorunda əlaqələrin genişləndirilməsində maraqlıdır və bu prosesə hər cür dəstək verməyə hazırdır.
Forumda çıxış edən İordaniyanın sənaye və ticarət naziri Amer Hadidi biznes-forumda ölkə sahibkarlarının çoxsaylı nümayəndələrinin iştirakının Azərbaycan iqtisadiyyatına olan maraqdan irəli gəldiyini bildirmişdir. Mayın 6-dan 9-dək keçiriləcək sərgidə İordaniyanın tikinti materialları, kənd təsərrüfatı, əczaçılıq, yüngül sənaye və digər sahələrini təmsil edən 36 pavilyonun fəaliyyət göstərdiyi diqqətə çatdırılmışdır. Bu günlərdə fəaliyyətə başlamış Bakı-Əmman aviareysinin də qarşılıqlı əlaqələrin inkişafına müsbət təsir göstərəcəyi vurğulanmışdır.
Forumda çıxış edən İordaniya İnvestisiya Şurasının icraçı direktoru Maen Nsour, Biznes İnkişaf Korporasiyasının icraçı direktoru Yarub Qudah, Turizm Şurasının Baş direktoru Elina AL-Naji həyat şəraitinin yaxşılaşdırılması istiqamətində ölkələrində həyata keçirilən tədbirlər haqqında məlumat vermişlər.
Azərbaycan ilə İordaniya arasındakı iqtisadi-ticari əlaqələrin səviyyəsinin mövcud potensialdan aşağı olduğu, qeyri-neft sahələrində, o cümlədən turizm, kənd təsərrüfatı, sənayenin digər sahələrində əməkdaşlığı daha da canlandırmaq üçün geniş imkanların mövcudluğu qeyd edilmişdir. Natiqlər ölkələrimiz arasında iqtisadiyyatın müxtəlif sahələrində əməkdaşlıq barədə imzalanmış sazişlərin qarşıdakı illərdə öz bəhrəsini verəcəyinə ümidvar olduqlarını bildirmişlər.
AZPROMO-nun prezidenti Emil Məcidov Azərbaycanda investisiya mühiti və biznes imkanları mövzusunda məruzə etmiş, xarici sərmayələr üçün yaradılmış perspektiv imkanlardan danışmışdır. E.Məcidov Azərbaycanın biznesin təşkilində xarici sərmayədarlara kömək göstərməyə həmişə hazır olduğunu bildirmişdir.
Sonra biznes-forum öz işini Azərbaycan və İordaniya iş adamlarının ikitərəfli görüşləri ilə davam etdirmişdir.
Bölmənin digər xəbərləri
