Azərbaycan ilə Meksika arasında müxtəlif sahələrdə əməkdaşlıq üçün böyük imkanlar mövcuddur
AZƏRTAC xəbər verir ki, Valeh Ələsgərov IV Bakı Beynəlxalq Humanitar Forumunun iştirakçısı olan meksikalı deputatı Milli Məclisdə salamlamaqdan məmnunluq duyduğunu bildirib, Azərbaycanın Meksika ilə hər sahədə əməkdaşlığa mühüm əhəmiyyət verdiyini vurğulayıb.
Valeh Ələsgərov qeyd edib ki, məsafə etibarilə uzaq olan ölkələrimizin ən müxtəlif sahələrdə əməkdaşlıq etməsi üçün böyük imkanlar mövcuddur. Milli Məclis sədrinin müavini gələcəkdə həmin imkanlardan səmərəli istifadə olunacağına ümidvar olduğunu ifadə edib.
Görüşdə Meksika Senatının xarici əlaqələr komitəsinin sədri Qabriela Kuevas Barron IV Bakı Beynəlxalq Humanitar Forumu ilə əlaqədar xoş təəssüratlarını bölüşüb, tədbirin əhəmiyyətini yüksək qiymətləndirib, Azərbaycan Prezidenti İlham Əliyevin forumdakı nitqini çox bəyəndiyini söyləyib.
Meksikalı deputat tədbirdə özünün də çıxış etdiyini, müzakirə olunan məsələlərlə bağlı fikirlərini bölüşdüyünü diqqətə çatdırıb.
Görüşdə ölkələrimiz və parlamentlərimiz arasında əlaqələrin daha da inkişaf etdirilməsi istiqamətində ətraflı fikir mübadiləsi aparılıb.
Bölmənin digər xəbərləri
