Azərbaycan İstiqlal Muzeyində “Şəhid şəhər” adlı tədbir-sərgi keçiriləcəkdir
Bakı, 19 fevral (AZƏRTAC). Fevralın 25-də Azərbaycan İstiqlal Muzeyində Xocalı faciəsinin 22-ci ildönümünə həsr olunmuş “Şəhid şəhər” adlı tədbir-sərgi keçiriləcəkdir.
Muzeydən AZƏRTAC-a bildirmişlər ki, sərgidə ilk dəfə olaraq 2014-cü ildə muzeyə qəbul edilmiş Xocalı faciəsini əks etdirən yeni eksponatlar - “Boşalmış damarlar” triptixi (müəllif “Yarat” Müasir İncəsənət Məkanı ilə əməkdaşlıq edən Mehriban Şəmsəddinskaya), Xocalı faciəsini əks etdirən eskizlər (müəllif rəssam Nazim Məmmədov), Milli qəhrəmanlar Hikmət Nəzərlinin, Füzuli Rüstəmovun, Tofiq Rüstəmovun şəxsi əşyaları və digər eksponatlar tamaşaçılara təqdim olunacaqdır.
Tədbirdə Azərbaycan İstiqlal Muzeyinin direktoru Fəridə Şəmsi, Azərbaycanın Milli Qəhrəmanı Füzuli Rüstəmovun bacısı Füqurə Rüstəmova və digər qonaqlar çıxış edəcəklər.
Tədbirdə Xocalı sakinləri, Milli qəhrəmanların ailə üzvləri və digər qonaqlar iştirak edəcəklər.
Bölmənin digər xəbərləri
