Azərbaycan-İtaliya münasibətləri klassik diplomatik əməkdaşlıq çərçivəsini aşaraq strateji müttəfiqlik xarakteri alıb RƏY
Bakı, 7 may, AZƏRTAC
Son illərdə Azərbaycan-İtaliya münasibətləri strateji tərəfdaşlıq səviyyəsinə yüksələrək tərəflər arasında ikitərəfli əlaqələrin dərinləşməsi ilə yanaşı, ölkəmizin Avropa ilə münasibətlərində də mühüm siyasi dayaqlardan birinə çevrilib. İtaliya bu gün Avropanın aparıcı dövlətləri sırasında Azərbaycanın ən yaxın strateji tərəfdaşı olmaqla yanaşı, ölkəmizin enerji, iqtisadi, hərbi-texniki və humanitar sahələrdə əməkdaşlığı genişləndirdiyi əsas Qərb dövlətidir. İtaliya Nazirlər Şurasının sədri Ciorcia Meloninin Azərbaycana səfəri də məhz bu strateji xəttin davamı kimi qiymətləndirilməlidir.
Bu sözləri AZƏRTAC-a açıqlamasında Milli Məclisin deputatı Vasif Qafarov deyib.
O bildirib ki, Azərbaycan ilə İtaliya arasında siyasi dialoq yüksək səviyyədə inkişaf edir. Prezident İlham Əliyevin 2020-ci ildə İtaliyaya dövlət səfəri münasibətlərin keyfiyyətcə yeni mərhələyə keçməsində mühüm rol oynadı. Sonrakı dövrdə Prezident İlham Əliyevlə İtaliyanın Nazirlər Şurasının sədri Ciorcia Meloni arasında keçirilən görüşlər, xüsusilə Kopenhagendə Avropa Siyasi Birliyi çərçivəsində aparılan müzakirələr iki ölkə rəhbərliyi arasında qarşılıqlı etimadın və siyasi yaxınlığın göstəricisi idi. C.Meloninin Azərbaycana səfəri xüsusi siyasi və rəmzi məna daşıyır. O, Ermənistanda keçirilən “Avropa Siyasi Birliyi”nin 8-ci Zirvə toplantısında iştirakdan sonra Azərbaycana səfər etməklə İtaliyanın region siyasətində balanslı yanaşmasını və Azərbaycanla strateji tərəfdaşlığa verdiyi önəmi nümayiş etdirdi. Bu, həm də Azərbaycanın Cənubi Qafqazda əsas siyasi və iqtisadi aktor kimi qəbul olunduğunu göstərir. İtaliyanın Azərbaycanın ərazi bütövlüyü və regionda sabitlik siyasətinə münasibətdə praqmatik mövqe sərgiləməsi Bakı üçün mühüm diplomatik üstünlükdür.
Deputat qeyd edib ki, enerji sahəsi Azərbaycan-İtaliya münasibətlərinin əsas sütunlarından biridir. Azərbaycan hazırda İtaliyanın enerji təhlükəsizliyinin təmin olunmasında mühüm rol oynayan əsas tərəfdaş dövlətlərdəndir. Cənub Qaz Dəhlizi vasitəsilə Azərbaycandan İtaliyaya indiyədək təxminən 50 milyard kubmetrə yaxın qaz nəql olunub. Təkcə 2025-ci ildə Azərbaycandan İtaliyaya 10 milyard kubmetr qaz ixrac edilməsi ölkəmizin Avropanın enerji xəritəsində strateji mövqeyini daha da gücləndirib. Rusiya-Ukrayna müharibəsindən sonra Avropanın enerji təhlükəsizliyi məsələsinin ön plana çıxması Azərbaycanın əhəmiyyətini daha da artırıb və İtaliya bu kontekstdə Bakının əsas tərəfdaşlarından biri kimi çıxış edir. Neft sahəsində də Azərbaycan İtaliya üçün əsas təchizatçılardandır və bu istiqamətdə ölkəmiz ikinci yerdə qərarlaşıb. Beləliklə, Azərbaycan təkcə regional deyil, həm də Avropanın enerji təhlükəsizliyində mühüm geosiyasi aktora çevrilib. Bu isə Bakının Avropa İttifaqı ilə münasibətlərində siyasi çəkisini artırır. Hərbi-texniki əməkdaşlıq da son illərdə münasibətlərin mühüm istiqamətlərindən birinə çevrilib. Bununla yanaşı, müdafiə sənayesi, hərbi texnologiyalar və təhlükəsizlik məsələləri üzrə də əməkdaşlıq genişlənir.
V.Qafarov diqqətə çatdırıb ki, Azərbaycan-İtaliya münasibətləri artıq klassik diplomatik əməkdaşlıq çərçivəsini aşaraq strateji müttəfiqlik xarakteri alıb. Dövlət rəhbərləri arasında yüksəksəviyyəli siyasi dialoq bütün istiqamətlər üzrə əməkdaşlığın inkişafına müsbət təsir göstərir. Ciorcia Meloninin Azərbaycana səfəri də bu tərəfdaşlığın daha da dərinləşəcəyini və Bakı-Roma xəttinin gələcəkdə həm regional, həm də Avropa siyasətində daha mühüm rol oynayacağını göstərir. Azərbaycanın milli maraqları baxımından bu münasibətlər ölkəmizin enerji diplomatiyasının güclənməsi, Avropa ilə siyasi əlaqələrinin genişlənməsi və postmüharibə dövründə iqtisadi inkişaf strategiyasının uğurla həyata keçirilməsi üçün mühüm əhəmiyyət daşıyır.
Bölmənin digər xəbərləri
