AZƏRBAYCAN KARATEÇİLƏRİ BEYNƏLXALQ TURNİRDƏ QÜVVƏLƏRİNİ SINAYIRLAR
AZƏRTAC xəbər verir ki, aprelin 12-də İstanbulda karate üzrə beynəlxalq “Bosfor” turniri start götürəcəkdir. Bu turnirdə Azərbaycan 13 karateçi ilə təmsil olunacaqdır.
Fərdi kumite döyüşlərində 13 Azərbaycan karateçisi mübarizə aparacaqdır. Heyətdə Qurban Tağıyev, İsrafil Şirinov, Amal Atayev, Ceyhun Ağasıyev kimi bacarıqlı karateçilər vardır.
Qadın karateçilərimiz isə komanda kumite döyüşlərində mübarizə aparacaqlar. Bu mübarizədə isə Gülnarə Musayeva, Cəmilə Məmmədova və Elmira Babayeva triosu çıxış edəcəkdir.
Nümunəvi çıxışlardan ibarət komanda kata yarışında isə Musa Musayev, Elvin Eyvazov və Tural Balcanlı triosu tatami üzərinə çıxacaqlar. Karateçilərimiz həmçinin fərdi kata yarışlarında da bacarıqlarını nümayiş etdirəcəklər.
“Bosfor” turniri karateçilər üçün Avropa çempionatına hazırlıq xarakteri daşıyır. Qitə birinciliyi mayın 2-4-də Tallində keçiriləcəkdir.
Turnirə aprelin 15-də yekun vurulacaqdır.
Bölmənin digər xəbərləri
