Azərbaycan Mətbuat Şurası ilə Kərkük Mədəniyyət Dərnəyi əməkdaşlıq edəcək
Bakı, 1 noyabr, AZƏRTAC
Azərbaycan Mətbuat Şurası (MŞ) ilə Kərkük Mədəniyyət Dərnəyi arasında Əməkdaşlıq Memorandumu imzalanıb.
Mətbuat Şurasından AZƏRTAC-a bildirilib ki, imzalanma İraqın Kərkük elindən ölkəmizə təşrif buyurmuş nümayəndə heyətinin də iştirakı ilə Şurada keçirilmiş toplantıda baş tutub.
Azərbaycanın Türk dünyası ilə mədəni əlaqələrindən söz açan MŞ sədri Rəşad Məcid türk coğrafiyasındakı jurnalistlərin bir-biri ilə sıx əməkdaşlıq etdiklərini diqqətə çatdırıb. İraqın Kərkük bölgəsindəki media qurumları ilə yaxınlığın da bu mənada mühüm əhəmiyyət daşıyacağına ümidvar olduğunu bildirən R.Məcid ümumən Azərbaycanla Kərkük arasında bağların yaranmasında və güclənməsində, habelə ortaq türk dəyərlərinin təbliğində Kərkük Mədəniyyət Dərnəyinin, onun rəhbəri Şəmsəddin Kuzəçinin böyük və fədakar əməyinin olduğunu vurğulayıb. MŞ sədri Ş.Kuzəçinin rəhbərlik etdiyi qurum tərəfindən təltif olunduğunu diqqətə çatdırıb və Şuranın diplomunu ona təqdim edib.
Qarşılıqlı əməkdaşlığın gücləndirilməsinin vacibliyindən söz açan Ş.Kuzəçi Mətbuat Şurası ilə Kərkük Mədəniyyət Dərnəyinin imzaladığı Əməkdaşlıq Memorandumunun başlanılmış işin daha da sistemləşdirilməsinə dəstək baxımından əhəmiyyətini əsaslandıran məqamları sadalayıb.
Digər çıxış edənlər Kərkük türklərinin Türk dünyasına inteqrasiyasındakı xüsusiyyətlərdən söz açaraq, ortaq tarixin və mədəniyyətin və ənənələrin daha geniş platformalarda təbliğinə ehtiyacın duyulduğunu bildiriblər. Toplantıda qarşılıqlı maraq doğuran məsələlər ətrafında fikir mübadiləsi aparılıb.
Qeyd edək ki, MŞ ilə Kərkük Mədəniyyət Dərnəyi arasında imzalanmış Əməkdaşlıq Memorandumunda ortaq dəyərlərin və prinsiplərin təbliği istiqamətində media subyektləri tərəfindən keyfiyyətli xəbər istehsalının təmin edilməsinə əməli dəstək məqsədilə layihələr hazırlamaq və onları icra etmək, birgə beynəlxalq əməkdaşlıq perspektivlərinin artırılması, xarici təcrübənin tətbiqi imkanlarının araşdırılmasına yönələn tədbirlər görmək və sair məsələlər əksini tapıb.
Bölmənin digər xəbərləri
