Bakı, 18 sentyabr, AZƏRTAC

Azərbaycan Respublikası Prezidentinin 2023-cü il 24 iyun tarixli Sərəncamına əsasən sentyabrın 20-22-də Azərbaycan Milli Kitabxanasının 100 illiyinə həsr olunmuş silsilə tədbirlər keçiriləcək.

AZƏRTAC xəbər verir ki, tədbirlərdə dünyanın 38 ölkəsindən gələn milli kitabxana direktorları iştirak edəcəklər.

Silsilə tədbirlər çərçivəsində Azərbaycan Milli Kitabxanasının tarixinə dair “100 il xalqın xidmətində” və “Milli Kitabxananın qızıl fondundan” adlı kitab sərgilərinin açılışı olacaq. Həmçinin “Azərbaycan əlyazmaları dünya kitabxanalarında” mövzusunda elektron məlumat bazasının təqdimatı keçiriləcək. Azərbaycan Milli Kitabxanası ilə Pakistan, İtaliya, Litva, Rusiya Milli kitabxanaları və Makedoniya¬nın Kliment Ohrid Universitet və Milli Kitabxanası (Skopye) arasında qarşılıqlı əməkdaşlığa dair memorandumların imzalanma mərasimi olacaq. “Türk dünyası Ədəbiyyatının talantları” mövzusunda dəyirmi masa, Qazax ədəbiyyatının görkəmli nümayəndəsi Kemel Tokayevin Azərbaycan dilində nəşr olunan “Gecə açılan atəş” və XX əsr Azərbaycan ədəbiyyatının görkəmli nümayəndəsi Mir Cəlal Paşayevin qazax dilində çap olunan “Taylardın jüpesi” kitablarının təqdimatının keçirilməsi nəzərdə tutulur.

Qeyd edək ki, Azərbaycan Milli Kitabxanası Azərbaycan Respublikası Xalq Maarif Komissarlığının 13 noyabr 1920-ci il tarixli qərarına əsasən yaradılıb, rəsmi açılışı isə 1923-cü il mayın 23-də olub. Azərbaycanın baş kitabxanası nəinki Qafqazda, yerləşdiyimiz Avropa qitəsində, eləcə də bütün dünyada şöhrət tapan ən böyük milli kitabxanalardan və ən iri kitabsaxlayıcılardan biridir.