Azərbaycan Premyer Liqasının növbəti mövsümündə səkkiz komanda çempionluq uğrunda yarışacaq
Bakı, 1 iyun, AZƏRTAC
Futbol üzrə Topaz Premyer Liqasının növbəti - 2016-2017-ci il mövsümündə 8 komanda çempionluq uğrunda mübarizə aparacaq.
AZƏRTAC xəbər verir ki, bu barədə AFFA-nın lisenziyalaşdırma qrupu tərəfindən hazırlanan hesabat Lisenziya Komissiyasına və AFFA-nın rəhbərliyinə təqdim olunacaq.
Qeyd edək ki, mayın 16-da 2016-2017-ci il mövsümündə UEFA-nın klub yarışlarında və Premyer Liqa yarışlarında iştirak etmək hüququnu verən lisenziya üçün müraciət etmiş klubların sənədlərinə AFFA-nın Lisenziya Komissiyasının iclasında baxılıb. İclasda 8 klub - AZAL, “İnter”, “Kəpəz”, “Qarabağ”, “Qəbələ”, “Neftçi”, “Sumqayıt” və “Zirə” ilə bağlı müvafiq qərarlar açıqlanmışdı. Növbəti mövsümdə Premyer Liqa yarışlarında iştirak etmək məqsədilə lisenziya üçün müraciət etmiş, lakin tələb olunan sənədləri tam həcmdə təqdim etməmiş klublara sənədləri təmin etmək üçün əlavə 14 gün vaxt verilmişdi. Çatışmazlıqları aradan qaldırmaq üçün verilmiş müddət artıq başa çatıb və lisenziya üçün müraciət etmiş klublardan heç biri sənədləri tam şəkildə təqdim etməyib.
Bölmənin digər xəbərləri
