Oktyabrın 24-də Azərbaycan Respublikasının Prezidenti Heydər Əliyev Nyu-Yorkda ABŞ Prezidenti Bill Klinton ilə görüşmüşdür.

Dövlətimizin başçısını hərarətlə salamlayan Prezident Bill Klinton belə görüşün keçirilməsinə imkan yaranmasından məmnun olduğunu bildirdi.

Dostluq və qarşılıqlı anlaşma şəraitində keçən görüşdə Bill Klinton Xəzərin Azərbaycan sektorundakı neft yataqlarının birgə işlənilməsinə dair konsorsiumda ABŞ-ın neft şirkətlərinin iştirakından, bir il bundan əvvəl imzalanmış neft müqaviləsinin əməli surətdə həyata keçirilməsinə başlanmasından razılıqla söhbət açdı və bu sahədə Azərbaycanla əməkdaşlığı yüksək qiymətləndirdi. Bill Klinton ilkin neftin ixrac marşrutları haqqında noyabrın 9-da Bakıda qəbul olunmuş qərarı alqışladı və bu qərarın qəbul edilməsində Prezident Heydər Əliyevin şəxsi rolunu yüksək qiymətləndirərək onu bir daha təbrik etdi. ABŞ Prezidenti dedi ki, biz Azərbaycanla əməkdaşlığa, ölkələrimiz arasında yeni əlaqələr yaradılması imkanlarının axtarılmasına xüsusi diqqət yetiririk.

Görüşdə Ermənistanın Azərbaycana hərbi təcavüzünə son qoyulması və daimi, möhkəm sülh yaradılması istiqamətində görülən işlərin müzakirəsinə geniş yer ayrıldı. Bill Klinton ABŞ-ın bu məsələlərə ciddi diqqət yetirdiyini bildirərək, münaqişə zonasında sülh yaradılması prosesinin sürətləndirilməsinin vacibliyini qeyd etdi. Prezidentlər bu məsələnin mərhələ-mərhələ həll edilməsi haqqında eyni fikirdə olduqlarını nümayiş etdirdilər.

Tərəflər belə bir yekdil fikir söylədilər ki, Azərbaycanın işğal edilmiş əraziləri tezliklə azad olunmalı, respublikanın ərazi bütövlüyü, sərhədlərin toxunulmazlığı təmin edilməli, doğma yurdlarından zorla qovulmuş qaçqınlar öz yerlərinə qayıtmalıdırlar.

Yeddi ildən bəri gedən müharibədə əldə edilmiş uzunmüddətli atəşkəsin belə münaqişələr tarixində heç bir ayırıcı qüvvə olmadan davam etdirilməsi müsbət qiymətləndirildi.

Respublikamızın Prezidenti Amerika Konqresinin Azərbaycana yardım göstərilməsinə qadağan qoyan ədalətsiz qərarından söhbət açdı. Heydər Əliyev Bill Klintona müraciətlə dedi ki, ABŞ Qafqaz regionunda Gürcüstana da, Ermənistana da kömək edir, ancaq Azərbaycana yardım göstərmir. Bu üç ölkədən isə Amerika ilə ən çox iqtisadi əməkdaşlıq edəni Azərbaycandır. Prezident Heydər Əliyev daha sonra bildirdi ki, ədalətli, böyük dövlət kimi ABŞ Azərbaycana - ərazisində bir milyondan çox qaçqını olan ölkəyə də yardım göstərməlidir. Bill Klinton Konqresin qəbul etdiyi qərara onun da tərəfdar olmadığını söylədi.

Amerika Prezidenti Azərbaycanda gedən demokratik proseslərdən razı qaldığını bildirdi, respublikada hazırki ictimai-siyasi sabitliyi yüksək qiymətləndirdi.

Tərəflər belə qərara gəldilər ki, Amerika ilə Azərbaycan arasında bütün sahələrdə əməkdaşlığın yeni səviyyəyə qalxması və bu əlaqələrin daha da sıxlaşdırılması üçün əməli tədbirlər görmək vacibdir.

Görüşdə hər iki ölkəni maraqlandıran bir sıra digər məsələlər barədə də geniş fikir mübadiləsi aparıldı.