Azərbaycan Prezidenti Heydər Əliyev noyabrın 17-də, Milli dirçəliş günü paytaxtda gəzintiyə çıxmışdır.

Gəzinti böyük ədibimiz Cəfər Cabbarlının adını daşıyan meydandan başlandı. Burada Bakı sakinləri və şəhərin qonaqları dövlətimizin başçısını səmimiyyətlə, mehribanlıqla salamladılar. Prezident Heydər Əliyev onlarla görüşüb söhbət etdi. Gəncəli qadın ölkəmizin rəhbərinə müraciətlə dedi:

-Cənab Prezident, Sizinlə görüşmək olarmı? Mən Gəncədən gəlmişəm...

HEYDƏR ƏLİYEV: Haradan gəlmisən?

GƏNCƏLİ QADIN: Gəncədən gəlmişəm. Allah Sizə cansağlığı versin.

HEYDƏR ƏLİYEV: Gəncə şəhəri indi necədir? Mən gələndən sonra şəhər yaxşılaşıb?

GƏNCƏLİ QADIN: Bəli, Siz Gəncədən qayıtdıqdan sonra lap dəyişibdir.

HEYDƏR ƏLİYEV: Onda, bir də gəlib baxacağam. Sağ olun, salam söyləyin.

GƏNCƏLİ QADIN: Qonaq gəlin, şəhərimizə bir də baxın. Allah Sizi başımızın üstündən əskik etməsin. Mən Bakıya Sizi görmək üçün gəlmişdim.

Meydana toplaşanların hər biri Prezident Heydər Əliyevin əlini sıxmaq, ona dərin hörmət və ehtiramını, sonsuz məhəbbətini bildirmək istəyirdi. Pirallahı qəsəbəsinin sakini olan qadın dövlətimizin başçısını səmimiyyətlə salamlayaraq dedi:

-Mən Pirallahıdan gəlmişəm. Allah Sizi bizə çox görməsin.

HEYDƏR ƏLİYEV: Orada işlər neçədir?

PİRALLAHI SAKİNİ: Yaxşıdır, çox sağ olun.

HEYDƏR ƏLİYEV: Camaat necədir?

PİRALLAHI SAKİNİ: Yaxşıdır, hamı Sizdən razılıq edir.

HEYDƏR ƏLİYEV: Yaxşıdır? Hamı razıdır?

PİRALLAHI SAKİNİ: Bəli, razıdır. Allah Sizdən razı olsun.

Prezident Heydər Əliyevlə görüşənlərdən biri də Masallı rayon sakini oldu. O dövlətimizin başçısına müraciətlə dedi:

-Mən ömrümdə ilk dəfədir Sizinlə rastlaşıram. Yeni Azərbaycan Partiyasının üzvüyəm. Bir oğlum var, səhv iş tutmuşdur, indi həbsxanada yatır. Anası da xəstədir.

HEYDƏR ƏLİYEV: Nə üçün həbsxanada yatır?

MASALLI SAKİNİ: Fərarilik edibdir.

HEYDƏR ƏLİYEV: Fərarilik edib?

MASALLI SAKİNİ: Bəli, səkkiz aydır həbsxanada yatır. Təvəqqe edirəm, onu bağışlayın.

HEYDƏR ƏLİYEV: Axı, cinayət edibdir...

MASALLI SAKİNİ: Bilirəm. Amma, xahiş edirəm.

Dövlətimizin başçısı daha sonra Cəfər Cabbarlının abidəsini seyr etdi, onun 1982-ci ildə ucaldıldığını xatırlatdı.

Prezident Heydər Əliyev metronun “28 May” stansiyasının qarşısına gəldi, burada toplaşanlarla hal-əhval tutdu.

- Necəsiniz? Kefiniz necədir? Rahat yaşayırsınız, sakitlikdir, sabitlikdir, elədirmi?

ŞƏHƏR SAKİNLƏRİ: Çox sağ olun, Allah Sizi salamat eləsin.

HEYDƏR ƏLİYEV: Bu gün istirahət günüdür, dincəlirsiniz. Görürsünüz, şəhər də necə gözəlləşir. Buralar təmizlənibdir. Gəldim, baxım görüm necədir. İnsanlar burada istirahət edir. Hər şey yaxşıdır, elədirmi? Metropolitendən istifadə edirsiniz, yoxsa yox?

ŞƏHƏR SAKİNLƏRİ: Bəli, istifadə edirik.

HEYDƏR ƏLİYEV: Hər gün istifadə edirsiniz? Yaxşı işləyirmi?

ŞƏHƏR SAKİNLƏRİ: Yaxşı işləyir. Metroda səliqə-sahman var. Hər şey öz qaydasındadır.

HEYDƏR ƏLİYEV: Çox yaxşı haldır ki, bizim şəhərin belə metropoliteni var. Mən də metropolitenlə getmək istəyirəm. Yoxsa, Prezident həmişə avtomaşınla gəlib-gedir, bir az da metropolitenlə getsin.

Ağsaqqallardan biri dövlətimizin başçısına müraciətlə dedi:

- Yoldaş Əliyev, həmişə xalq, cavan insanlar arasında olasınız.

HEYDƏR ƏLİYEV: Mən elə cavanların içərisindəyəm.

YERDƏN SƏS: Mənim də familyam Əliyevdir. Azərbaycanda Əliyevlər, Məmmədovlar çoxluq təşkil edir.

HEYDƏR ƏLİYEV: Azərbaycanda hamı Əliyevdir, Məmmədovdur. Çünki bizim Məhəmməd Peyqəmbərimiz, Həzrət Əlimiz var. Vaxtilə valideynlərimiz bu adlardan istifadə edib, bizə də belə adlar veriblər. Ona görə Azərbaycanda Əliyev də çoxdur, Məmmədov da.

YERDƏN SƏS: Bu gün mən arzuma çatdım. Sizi görmək, söhbətinizi eşitmək mənim üçün çox xoşdur. Başqa heç bir arzum, ehtiyacım yoxdur. Ailəlikcə Sizi sevirik. Siz çox gümrahsınız.

HEYDƏR ƏLİYEV: Bəs sən necə təsəvvür edirdin? Televiziyada görürdün ki, gümrah deyiləm? Televiziya həmişə bir az səhv edir. Əsl həqiqət buradadır.

YERDƏN SƏS: Cənab Prezident, Masallı camaatı Sizin xətrinizi o qədər istəyir ki, Azərbaycanda daim Prezident olmağınızı arzulayır. Mən 20 ilə yaxındır ki, Viləşçayda meliorasiya sahəsində işləyirəm. Biz Sizdən çox razıyıq.

Burada yaşlı bir qadın dövlətimizin başçısına yaxınlaşaraq dedi:

- Mənim bir xahişim var. Oğlum Qarabağ əlilidir, evdə oturub, işi-gücü yoxdur. Gözünü aldığı pensiyaya dikib, mümkünsə, ona kömək edin. Sənə qurban olaram. Allah balalarını, nəvələrini saxlasın, ömrünü uzun etsin.

HEYDƏR ƏLİYEV: İşi yoxdur... Hacıbala Abutalov, sən bunları yaz. Yaxşı, sağ olun.

Sonra Azərbaycan Prezidenti bu günlərdə 35 illiyini bayram etmiş metropolitenin “28 May” stansiyasına daxil oldu.

Metro işçisi Prezident Heydər Əliyevi salamlayaraq dedi:

- Cənab Prezident, bizim metropolitenə xoş gəlmisiniz.

HEYDƏR ƏLİYEV: Necəsiniz? Necə işləyirsiniz? Metropolitenin yubileyini də qeyd etdik.

METRO İŞÇİSİ: Çox sağ olun, Sizə minnətdarıq.

Sonra dövlətimizin başçısı qatara əyləşərək, “Sahil” stansiyasına gəldi.

Azərbaycan Prezidenti stansiyanın çıxışında satışa qoyulmuş dövri mətbuatla, kitablarla maraqlandı, rəsmi qəzetlərin göz qabağında qoyulmamasına, Azərbaycan dilində kitabların son dərəcə az olmasına iradını bildirdi.

Kütləvi informasiya vasitələrinin nümayəndələri dövlətimizin başçısını Milli dirçəliş günü münasibətilə təbrik etdilər. Prezident Heydər Əliyev də onları təbrik edərək dedi ki, dirçəliş günü Azərbaycan xalqının milli oyanış günüdür. Ona görə həmin gün bizim üçün əzizdir.

Bakı sakinləri dövlətimizin başçısını “Sahil” stansiyası qarşısında böyük ehtiramla salamladılar. Prezident Heydər Əliyev Bülbül və Azərbaycan prospektlərinin tinində yerləşən, akademik Zərifə Əliyevanın barelyefi vurulmuş evin yanında ayaq saxladı. Dedi ki, vaxtilə bu evdə yaşamışam, ona görə də indi buradan keçərkən dayandım.

Azərbaycan Prezidenti burada paytaxt sakinləri ilə söhbət zamanı onların qayğıları ilə maraqlandı. Bakı sakini SEVDA HÜSEYNOVA Prezident Heydər Əliyevə müraciətlə dedi:

- Möhtərəm Prezident, Sizi görməyimə çox şadam. Bu xoşbəxtlik hər adama nəsib olmur. Mən Yeni Azərbaycan Partiyasının üzvüyəm, Sizin yeritdiyiniz siyasətlə həmişə fəxr etmişəm.

Sizə deyiləsi sözüm var. “Qlobal Türkiyə” müəssisəsi şəxsi mülküm olan evimi sökmüş, məni küçəyə atmışdır. Öz evimdən məcburi qaydada Yasamal rayonunda 1 otaqlı mənzilə köçürmüşdür. Məni məhkəməyə veriblər, hüquqlarımı pozublar. Hacıbala müəllimin yanında olmuşam. Kömək göstərməyə çalışıb, amma bacarmayıb. Çox çalışdı ki, mənə kömək etsin.

HACIBALA ABUTALIBOV (şəhər icra hakimiyyətinin başçısı): Cənab Prezident, bu xanım 10 dəqiqə bundan əvvəl mənə müraciət etdi. Ona dedim ki, sabah yox, o biri gün gəlsin, özü də mənimlə razılaşdı.

SEVDA HÜSEYNOVA: Mən evimin yerində tikilən binada iki otaqlı mənzil istəmişəm, ayrı heç nə istəmirəm.

HEYDƏR ƏLİYEV: Bilirsən, mən bu məsələni həll edirəm. Nə istəyirsən?

SEVDA HÜSEYNOVA: İki otaqlı mənzil istəyirəm. Mənim köhnə mənzilim 61,5 kvadratmetr idi.

HEYDƏR ƏLİYEV: Mənzilin harada olub?

SEVDA HÜSEYNOVA: Maliyyə Nazirliyi ilə üzbəüz.

HACIBALA ABUTALIBOV: Sənə elə orada da iki otaqlı mənzil verirəm.

SEVDA HÜSEYNOVA: Mən həyatımda heç nə istəməmişəm.

HEYDƏR ƏLİYEV: Adın nədir?

SEVDA HÜSEYNOVA: Hüseynova Sevda Kərim qızı. “Azərsənayetikinti” Səhmdar Cəmiyyətində aparıcı mühasib işləyirəm, iki institut bitirmişəm.

HEYDƏR ƏLİYEV: Hacıbala Abutalıbov, mənzili nə vaxt verəcəksən?

HACIBALA ABUTALIBOV: Cənab Prezident, sabah yox, o biri gün gəlsin, orderini götürsün.

SEVDA HÜSEYNOVA: Çox sağ olun, minnətdaram.

Sonra dövlətimizin başçısı Milli Parka gəldi. Dəniz kənarında gəzintiyə çıxmış Bakı sakinləri Prezident Heydər Əliyevi mehribanlıqla qarşıladılar.

Azərbaycan Prezidenti Milli Parkda aparılmış yenidənqurma işləri ilə maraqlandı, tövsiyələrini bildirdi, yarımçıq qalmış işlərin tezliklə başa çatdırılması haqqında tapşırıqlar verdi.

Sonra dövlətimizin başçısı Milli Parkda istirahət edən Bakı sakinləri ilə hal-əhval tutdu, səmimi söhbət edərək dedi ki, hələ, bəlkə də, hər şey əla deyil, amma ümumiyyətlə, yaxşıdır. Hava da yaxşıdır. Sabitlikdir, insanlara dəyən-toxunan da yoxdur.

Dövlətimizin başçısı Heydər Əliyev valideynləri ilə birlikdə gəzintiyə çıxmış uşaqlarla xatirə şəkilləri çəkdirdi, şəhər sakinləri ilə mehribancasına sağollaşdı.

Prezident Heydər Əliyevin Müstəqil Azərbaycanın paytaxtında, qədim, lakin həmişəcavan, gündən-günə gözəlləşən Bakıda növbəti gəzintisi, onun sakinləri ilə yaddaqalan daha bir görüşü beləcə başa çatdı.

AZƏRTAC

Foto: Oqtay Aydınoğlunun və

Rafiq Bağırovundur