AZƏRBAYCAN PREZİDENTİ HEYDƏR ƏLİYEV FRANSA PREZİDENTİ JAK ŞİRAK İLƏ GÖRÜŞMÜŞDÜR
Dövlət başçıları xatırladılar ki, bu, onların ikinci görüşüdür. Cənab Jak Şirak bildirdi ki, bu il mayın 7-də Parisdəki ilk görüşləri zamanı Azərbaycan Prezidenti Heydər Əliyev ilə söhbəti indi də yadındadır. Fransa-Azərbaycan münasibətlərinin inkişaf etdirilməsinin əhəmiyyətini vurğulayan cənab Jak Şirak dedi ki, Azərbaycanın zəngin neft yataqlarının işlənilməsində Fransanın “Elf Atigen” şirkətinin iştirakı ölkələrimiz arasında iqtisadi əməkdaşlığın genişlənməsi üçün yaxşı zəmin olardı.
Prezident Heydər Əliyev bildirdi ki, Fransanın bu şirkəti ilə Azərbaycan Dövlət Neft Şirkəti arasında əlaqələr artıq mövcuddur və respublikamız bu sahədə əməkdaşlığın olmasını istəyir. Fransa dünyanın böyük, qüdrətli dövlətlərindən biridir və Azərbaycan bu ölkə ilə münasibətləri daim inkişaf etdirməyə, mövcud dostluq əlaqələrini daha da genişləndirməyə maraq göstərir. Heydər Əliyev xatırlatdı ki, Azərbaycanın iqtisadiyyatına təkcə Fransa neft şirkətinin deyil, digər xarici şirkətlərin də sərmayə qoyması üçün hər cür imkan vardır. Dövlətimizin başçısı dedi ki, Fransa biznesinin Azərbaycanda möhkəm yer tutması üçün əlindən gələni edəcəkdir.
Azərbaycan Respublikasının, habelə yeni müstəqillik qazanmış digər dövlətlərin demokratiya, bazar iqtisadiyyatı yolu ilə getməsinin mühümlüyünü qeyd edən Fransa Prezidenti respublikamızın bu sahədə uğurlar qazanacağına ümidvar olduğunu söylədi.
Fransa rəhbərinin fikri ilə şərik olduğunu bildirən Prezident Heydər Əliyev Azərbaycanda qarşıdakı demokratik parlament seçkiləri, yeni konstitusiyanın qəbul ediləcəyi barədə cənab Jak Şiraka məlumat verdi. Dövlətimizin başçısı xatırlatdı ki, Azərbaycanın indiki vəziyyətini ağırlaşdıran ən başlıca səbəb Ermənistanın ölkəmizə qarşı hərbi təcavüzüdür. 7 ildən bəri davam edən bu təcavüz nəticəsində Azərbaycan torpaqlarının 20 faizi işğal olunmuşdur, bir milyondan artıq vətəndaşımız ev-eşiyindən didərgin düşərək çadırlarda dözülməz şəraitdə yaşayır.
Heydər Əliyev dedi ki, Azərbaycan demokratiya, dövlət quruculuğu sahəsində Fransanın qazandığı nailiyyətlərdən daim bəhrələnməyə çalışır. Fransanın təcrübəsi müstəqillik qazanmış bütün dövlətlər üçün örnək ola bilər.
Fransa Prezidenti Jak Şirak ilə onun arasında dostluq münasibətləri yaranmasından məmnun qaldığını qeyd edən Heydər Əliyev ümidvar olduğunu bildirdi ki, Fransa-Azərbaycan əməkdaşlığı bundan sonra da sürətlə inkişaf edəcəkdir.
Bölmənin digər xəbərləri
