AZƏRBAYCAN PREZİDENTİ HEYDƏR ƏLİYEV FRANSAYA RƏSMİ SƏFƏRƏ YOLA DÜŞMÜŞDÜR
Prezident Heydər Əliyev yola düşməzdən əvvəl Binə hava limanında jurnalistlərə qısa müsahibə verdi.
Dövlətimizin başçısı dedi:
- Bu səfər də əvvəlki səfərlərin davamıdır. Bilirsiniz ki, Fransanın Prezidenti cənab Jak Şirak məni Fransaya rəsmi səfərə dəvət edibdir. Fransa ilə Azərbaycan arasında əlaqələr son illər, xüsusən üç il bundan öncə mən Fransaya ilk dəfə səfər edəndən Fransa ilə Azərbaycan arasında dostluq və əməkdaşlıq haqqında Saziş imzalandıqdan sonra inkişaf edir. İndiki səfər bu proses çərçivəsində yeni bir səfərdir. Mən hesab edirəm ki, bu, həm Fransa, həm də Azərbaycan üçün əhəmiyyətlidir, lazımlıdır. Güman edirəm ki, bu Fransa-Azərbaycan əlaqələrinin inkişaf etməsində yeni bir mərhələ olacaqdır.
Azərbaycan Prezidenti Heydər Əliyevi hava limanında respublika Milli Məclisinin sədri Murtuz Ələsgərov, Baş nazir Artur Rasizadə, Prezidentin İcra Aparatını rəhbəri Ramiz Mehdiyev, Milli Məclis sədrinin, Baş nazirin müavinləri və digər rəsmi şəxslər yola saldılar.
Azərbaycan Prezidenti Heydər Əliyev elə həmin gün Fransanın paytaxtı Parisə rəsmi səfərə gəldi. Orli hava limanında dövlətimizin başçısını Fransanın yüksək səviyyəli dövlət və hökumət nümayəndələri qarşıladılar.
Təyyarə meydanında Azərbaycan Prezidenti Heydər Əliyevin şərəfinə fəxri qarovul dəstədi düzülmüşdü. Azərbaycanın və Fransanın dövlət himnləri səsləndi. Prezident Heydər Əliyev fəxri qarovul dəstəsinin qarşından keçdi.
Fransa paytaxtının əzəmətli Yelisey sarayının önündə Azərbaycan Prezidenti Heydər Əliyevin Fransaya səfəri şərəfinə rəsmi qarşılanma mərasimi keçirildi. Fransa Prezidenti Jak Şirak Prezident Heydər Əliyevi səmimi qarşıladı.
Sonra dövlət başçılarının görüşü oldu. Bir saat davam edən danışıqlardan sonra Azərbaycan Dövlət Neft Şirkəti ilə Fransanın “Elf Akiten” və “Total” neft şirkətləri arasında müqavilə imzalandı.
İmzalanma mərasimində Fransa Prezidenti Jak Şirak və Azərbaycan Prezidenti Heydər Əliyev çıxış etdilər. Fransa Prezidenti Azərbaycan dövlətinin başçısı ilə apardığı danışıqların nəticələri haqqında mətbuat nümayəndələrinə ətraflı məlumat verdi. Cənab Jak Şirak bildirdi ki, Ermənistan-Azərbaycan münaqişəsinin həlli məsələsində Fransanın mövqeyi birmənalıdır: Azərbaycanın ərazi bütövlüyü təmin edilməlidir, münaqişəyə ədalətli son qoyulması üçün Fransa səylərini əsirgəməyəcəkdir.
Prezident Heydər Əliyev Fransa rəhbəri ilə görüşündən məmnun qaldığını vurğulayaraq dedi ki, özünün Fransaya növbəti səfəri iki ölkə arasında əlaqələrin daha da dərinləşməsinə xeyli kömək edəcəkdir. Azərbaycan Dövlət Neft Şirkəti ilə Fransanın neft şirkətləri arasında imzalanmış müqavilə isə ölkələrimizin iqtisadiyyatına böyük fayda verəcəkdir.
Azərbaycan Prezidenti Heydər Əliyevin Fransaya rəsmi səfəri davam edir.
Bölmənin digər xəbərləri
