AZƏRBAYCAN PREZİDENTİ HEYDƏR ƏLİYEV İLƏ ERMƏNİSTAN PREZİDENTİ ROBERT KOÇARYANIN TƏKBƏTƏK GÖRÜŞÜ
Avqustun 14-də Naxçıvan Muxtar Respublikasının Sədərək rayonunda, Azərbaycan Respublikası ilə Ermənistan Respublikasının sərhədində Azərbaycan Prezidenti Heydər Əliyev ilə Ermənistan Prezidenti Robert Koçaryan arasında təkbətək görüş olmuşdur. Görüş 4 saatdan çox davam etmişdir.
Azərbaycan və Ermənistan prezidentləri görüşün faydalı olduğunu, bu səviyyədə danışıqların davam etdirilməsinin zəruriliyini vurğuladılar.
Prezidentlər təkbətək keçirilən hər bir görüşün Ermənistan-Azərbaycan, Dağlıq Qarabağ münaqişəsinin sülh yolu ilə aradan qaldırılması üçün əhəmiyyətli olduğunu, münaqişənin həlli ilə bağlı bütün səyləri səfərbər etməyin vacibliyini bildirdilər. Atəşkəs rejiminə bundan sonra da əməl olunmasının zəruriliyini qeyd edən dövlət başçıları münaqişənin sülh yolu ilə nizama salınmasında ATƏT-in Minsk qrupu həmsədrlərinin səylərinin davam etdirilməsinin vacib olduğunu vurğuladılar. Prezidentlər MDB ölkələri dövlət başçılarının Kişinyovda keçiriləcək zirvə toplantısında yenidən görüşmək niyyətində olduqlarını bildirdilər.
Təkbətək görüş başa çatdıqdan sonra Prezident Heydər Əliyev və Prezident Robert Koçaryan jurnalistlər qarşısında qısa bəyanatlarla çıxış etdilər.
AZƏRBAYCAN PREZİDENTİ HEYDƏR ƏLİYEVİN
BƏYANATI
- Hörmətli jurnalistlər, Ermənistan Respublikasının və Azərbaycan Respublikasının mətbuat nümayəndələri!
Bu gün iki prezidentin - Ermənistan Prezidenti Robert Koçaryanın və Azərbaycan Prezidenti Heydər Əliyevin görüşü oldu. Bilirsiniz ki, 1999-cu ildən başlayaraq, biz vaxtaşırı görüşürük. O vaxt biz bu görüşlər barədə razılığa gəldik, o mənada ki, ATƏTİ-in Minsk qrupu və onun həmsədrləri ilə yanaşı, biz, iki prezident Ermənistan-Azərbaycan, Dağlıq Qarabağ münaqişəsinin nizama salınması məsələsinin uğurla həll olunmasına şəxsi görüşlərimiz vasitəsilə kömək edə bilərik.
Bu gün biz görüşdük və ötən görüşləri xatırladıq. Bilirsiniz ki, bu kiçik otaqda 4 saat söhbət etdik və belə isti havada siz də bizi gözlədiniz. Lakin bütün bunlar münaqişənin nizama salınmasının qarşılıqlı surətdə məqbul yollarını axtarıb tapmaq üçün lazımdır. Hesab edirəm ki, bu görüş faydalı, gərəkli oldu.
Bəzən Azərbaycanda da, Ermənistanda da, dünyanın digər regionlarında da belə deyirlər ki, iki prezident görüşür, nəticə isə yoxdur, onda belə görüşləri davam etdirməyə ehtiyac varmı? Yeri gəlmişkən, bu gün biz həmin məsələni də müzakirə etdik, yəni fikir mübadiləsi apardıq. İkimiz də belə qənaətə gəldik ki, bəli, bu görüşləri davam etdirməyə ehtiyac var. Ermənistan Prezidenti və mən münaqişəni necə nizama salmaq məsələsini bir çox mövqelərdən nəzərdən keçirdik. Biz ötən görüşlərimizin nəticələrini təhlil etdik və hər ikimiz belə bir fikrə gəldik ki, danışıqlar, o cümlədən də prezidentlərin bilavasitə görüşləri üçün potensial hələ tükənməyibdir. Biz, - mən Azərbaycan tərəfindən deyirəm, əslinə qalsa, burada aramızda fikir ayrılığı olmadı, - atəşkəs rejimini qoruyub saxlamalı və möhkəmlətməli, danışıqları davam etdirməli, ATƏT-in Minsk qrupu həmsədrlərinin fəaliyyətini stimullaşdırmalı, məsələnin həllinə kömək etmək üçün digər imkanlardan istifadə etməli və iki prezidentin - Ermənistan və Azərbaycan prezidentlərinin şəxsi görüşlərini davam etdirməliyik.
Hesab edirəm ki, bizim 4 saatlıq söhbətimiz çox faydalı, çox maraqlı oldu və zənnimcə, bizi bir daha inandırır ki, münaqişənin dincliklə nizama salınması üçün,- şübhə yoxdur ki, buna nail olmaq lazımdır,- Minsk qrupu həmsədrlərinin fəaliyyəti ilə yanaşı, biz prezidentlərin görüşlərinin bu formatını davam etdirə bilərik. Bəyan edirəm ki, münaqişənin dincliklə nizama salınması Azərbaycan üçün vacibdir, buna heç bir şübhə yoxdur, bu, Azərbaycana lazımdır. Mənə elə gəlir ki, Robert Sedrakoviç özü bu barədə danışacaqdır, mən onun əvəzinə danışmaq istəmirəm. Ancaq deyə bilərəm ki, biz bu baxımdan da yekdil fikirdə olduq. Mən məmnunam ki, bu gün biz görüşdük, danışdıq, bu qədər vaxt sərf etdik. Zənnimcə, biz bu görüşləri davam etdirməliyik. Ola bilər MDB ölkələri dövlət başçılarının Kişinyovda keçiriləcək toplantısında biz bir daha görüşə bilək. Mənim demək istədiyim bunlardır. İndi isə mikrofonu Robert Koçaryana verirəm. Robert Sedrakoviç, buyurun.
ERMƏNİSTAN PREZİDENTİ ROBERT KOÇARYANIN BƏYANATI
- Heydər Əliyeviç, sağ olun.
Hörmətli jurnalistlər, əvvəla, çöl şəraitində danışıqlar aparılması üçün kifayət qədər yaxşı imkan yaradıldığına görə Azərbaycan tərəfinə təşəkkür etmək istərdim. Həmçinin qeyd etmək istərdim ki, biz bir qədər mürəkkəb vəziyyətdəyik. 4 saatlıq danışıqlardan sonra əhval-ruhiyyəmiz sanki yaxşıdır, deməli, ümumən biz görüşün gedişindən razıyıq. Bununla belə, konkret olaraq heç nə deyə bilmirik, ona görə də bu baxımdan sizi müəyyən dərəcədə məyus edirik. Ona görə deyə bilmirik ki, proses, ümumiyyətlə, mürəkkəbdir, proses yaxın keçmişdə zəifləmişdi və deməliyəm ki, çoxdandır biz, bax, belə görüşməmişdik. Hər halda ümid var ki, bu görüş bir qədər gecikmiş olsa da, prosesə təkan verəcək və biz irəliləyə biləcəyik.
Təəssüflənirəm ki, konkretlik barədə təkrara varacağam. Biz, sadəcə olaraq, danışa bilmərik, indiki halda danışıqlar prosesinin texnologiyası, ümumiyyətlə, texnologiyalar belədir. Heydər Əliyeviç, təkrar edirəm ki, sülh Ermənistana da lazımdır. Biz problemin dincliklə nizama salınması niyyətimizdə, həqiqətən, səmimiyik. Mən bugünkü görüşümüzdən kiçik bir epizod danışacağam. Tam açıq şəkildə dedik ki, problemi biz həll etməsək, kim həll edəcəkdir. Heydər Əliyeviçin tərcümeyi-halını nəzərə alaraq, mənim məhz Dağlıq Qarabağla bağlı, bu problemin 10 illiyi, hətta 12 illiyi ilə bağlı tərcümeyi-halımı nəzərə alaraq hiss edirik ki, bu baxımdan bizim üzərimizə böyük məsuliyyət düşür. Üstəlik, vasitəçilər də daim deyirlər ki, bax, əgər prezidentlər razılığa gəlsələr, onda beynəlxalq birlik əldə olunmuş razılaşmaların həyata keçirilməsi üçün lazımi ehtiyatların - həm siyasi, həm də maddi ehtiyatların tam paketini təqdim etməyə hazırdır. Mən bugünkü görüşümüzü müsbət qiymətləndirirəm, bundan sonra da işləyəcəyik. Sağ olun.
Bölmənin digər xəbərləri
