AZƏRBAYCAN PREZİDENTİ HEYDƏR ƏLİYEV “METRO” BEYNƏLXALQ ASSOSİASİYASININ ÜZVLƏRİNİ QƏBUL ETMİŞDİR
Azərbaycan Prezidenti Heydər Əliyev noyabrın 7-də Prezident sarayında Bakı metropoliteninin 35 illiyinə həsr olunmuş yubiley şənliklərində iştirak üçün paytaxtımıza gələn “Metro” Beynəlxalq Assosiasiyasının üzvlərini - Assosiasiyanın baş direktoru Yevgeni Dubçenkonu, Moskva Metropoliteninin rəisi Dmitri Qayevi, Kiyev Metropoliteninin rəisi Nikolay Balatskini, Tbilisi Metropoliteninin rəisi Quram Qabuniyanı, Mıtişşi şəhərindəki “Metrovaqonmaş” Səhmdar Cəmiyyətinin sədri Yuri Soldatovu, “Moskva vaqon təmiri zavodu” Qapalı Səhmdar Cəmiyyətinin baş direktoru Leonid Vinniki qəbul etmişdir.
Dövlətimizin başçısı HEYDƏR ƏLİYEV qonaqları salamlayaraq dedi ki, Azərbaycanda metropoliten tikintisinin bünövrəsi 1940-cı illərdə qoyulsa da, metro inşası 1970-1980-ci illərdə xüsusilə intensiv inkikaf etmişdir. Ölkəmiz çoxdan gözlədiyi müstəqilliyə qovuşandan sonra şəhər təsərrüfatı üçün mühüm infrastruktur olan metro böyük rol oynayır. Metropolitenin yaradılması böyük məbləğdə vəsait qoyulmasını tələb edir, buna görə də Azərbaycana qonşu olan ölkələrin bəzisində bu nəqliyyat növü indiyədək öz inkişafının başlanğıc mərhələsindədir. Prezident Heydər Əliyev vurğuladı ki, məhz buna görə də mən bu hadisənin qeyd olunmasını lazım bildim, çünki 35 il az müddət deyil və bu müddət ərzində böyük işlər görülmüşdür. İndi Bakını əla fəaliyyət göstərən metropolitensiz təsəvvür etmək çətindir. Hərçənd mövcud olduğu müddət ərzində Bakı metropoliteni Ermənistanın xüsusi idarələri tərəfindən törədilmiş iki dəhşətli terror aktına məruz qalmışdır. Ermənilərin əlaltılarının - “Sadval” təşkilatından cəlb etdikləri şəxslərin 1994-cü ilin martında törətdikləri cinayət nəticəsində 14 adam həlak olmuşdur. Lakin, 1994-cü ilin mayında atəşkəs haqqında saziş əldə olunmasına baxmayaraq, elə həmin ilin yayında Bakı metrosunda daha bir terror aktı törədilmişdir. Ermənistanın xüsusi idarələrinin planı əsasında həyata keçirilmiş bu cinayətin təşkilatçısı Azərbaycan ordusunun döyüş əməliyyatları zamanı əsir düşmüş keçmiş hərbi qulluqçusu olmuşdur, ermənilər onu öz tərəflərinə cəlb etmişdilər.
Azərbaycan Prezidenti sonuncu hadisədən danışaraq dedi ki, həmin şəxs əsir düşdükdən sonra müxtəlif işgəncələrə məruz qalmış, onu ölümlə hədələmişlər. Ermənilər ona Bakı metrosunda təxribat törətmək tapşırığı vermişlər. O, razı olmuşdur, buna baxmayaraq, cinayətin sifarişçiləri onun anasını Gürcüstan vasitəsilə Dağlıq Qarabağa çağırmış və oğluna nə kimi təklif edildiyini bildirmişlər. Nəticədə o da razılaşmışdır. Qadının evə qayıtması üçün belə bir şərt qoyulmuşdur ki, oğlu bu terror aktını törətməlidir. Azərbaycanın hüquq mühafizə orqanları tərəfindən görülmüş tədbirlər nəticəsində o adam yaxalanmışdır və hazırda cəzasını çəkir.
Dövlətimizin başçısı on illdən artıqdır çadır düşərgələrində ağır şəraitdə yaşayan vətəndaşlarımızın vəziyyətindən, Ermənistan-Azərbaycan, Dağlıq Qarabağ münaqişəsinin dincliklə həlli üçün göstərilən səylərdən də danışdı.
Prezident Heydər Əliyev bəyan etdi ki, “ermənilərin xüsusi idarələri terrorizmlə məşğul olmuşdur və indi də olmaqdadır. İndi, bütün dünya beynəlxalq terrorizmlə mübarizə apardığı bir vaxtda, mən Bakıda baş vermiş iki konkret hadisəyə istinadən bu barədə danışmağı zəruri hesab etdim”. Dövlətimizin başçısı xatırlatdı ki, erməni terrorçuları 1978-ci və 1986-cı illərdə Moskva metrosunda da iki dəfə terror aktı törətmişdilər.
Azərbaycan Prezidenti MDB ölkələrinin metropoliten işçilərinin əməkdaşlığından danışarkən, dedi ki, son vaxtlar, Vladimir Putin Rusiya Prezidenti seçildikdən sonra Azərbaycanla Rusiya arasında bütün sahələrdə münasibətlər çox uğurla və fəal inkişaf edir.
“Metro” Beynəlxalq Assosiasiyasının baş direktoru YEVGENİ DUBÇENKO keçmiş SSRİ məkanındakı 14 metropolitenin üzv olduğu Assosiasiyanın yaranması tarixindən, onun fəaliyyətinin istiqamətlərindən danışdı. O, sərnişindaşımalar üzrə MDB-də ikinci yeri tutan Bakı metropolitenində tətbiq edilən yeniliklərə yüksək qiymət verdi. Yevgeni Dubçenko dedi ki, Bakı metrosunda yanğın nəticəsində baş vermiş faciə vaqonların modernləşdirilməsi üçün başlıca səbəb oldu və indi onların hamısı bu baxımdan təhlükəsizdir.
Yevgeni Dubçenko Prezident Heydər Əliyevə SSRİ Nazirlər Soveti sədrinin birinci müavini işlədiyi dövrdə bu sahəyə də rəhbərlik edərkən metro haqqında sənədlər qəbul etdiyinə və metroya böyük qayğı göstərdiyinə görə keçmiş SSRİ-nin bütün metropoliten işçiləri adından təşəkkürünü bildirdi. O, Sankt-Peterburqun 300 illiyinə və Romanovlar sülaləsinin 400 illiyinə həsr olunmuş hədiyyə nəşrini dövlətimizin başçısına təqdim etdi.
Qonaqlar Prezident Heydər Əliyev ilə xatirə şəkli çəkdirdilər.
Qəbulda Prezidentin Katibliyinin rəisi Dilarə Seyidzadə, Bakı Metropoliteninin rəisi Tağı Əhmədov iştirak edirdilər.
Foto Oqtay Aydınoğlunun, Rafiq Bağırovundur.
Bölmənin digər xəbərləri
