AZƏRBAYCAN PREZİDENTİ HEYDƏR ƏLİYEV “QARA NİŞANƏ” BƏDİİ FİLMİNİN YARADICI KOLLEKTİVİNİN NÜMAYƏNDƏLƏRİNİ QƏBUL ETMİŞDİR
Azərbaycan Prezidenti Heydər Əliyev aprelin 18-də Prezident sarayında “Qara nişanə” bədii filminin yaradıcı kollektivinin nümayəndələrini qəbul etmişdir.
Dövlətimizin başçısı HEYDƏR ƏLİYEV qonaqları salamlayaraq, istedadlı Azərbaycan rejissoru Vaqif Mustafayevin filmində bir sıra ölkələrin tanınmış artistlərinin iştirak etməsindən məmnunluq duyduğunu bildirdi. Azərbaycan Prezidenti “Qara nişanə” filminin yaradılması prosesi barədə danışarkən dedi ki, mən Vaqif Mustafayevin ideyasını dəstəklədim. Bu işin həyata keçirilməsi məsul və çətin bir vəzifədir, lakin “belə kollektivlə, belə yaradıcı xadimlərlə film yaratmaq olar”.
Filmdə keçmiş Sovet İttifaqı respublikalarında son onilliklərdə baş vermiş müxtəlif tarixi hadisələr öz əksini tapacaqdır. Prezident Heydər Əliyev Qazaxıstan rəhbəri Dinmühəmməd Kunayev haqqında, o, vəzifəsindən uzaqlaşdırıldıqdan və yerinə Kolbin təyin edildikdən sonra bu respublikanın paytaxtında baş vermiş faciəli hadisələr haqqında xatirələrini bölüşdü. O, İttifaq rəhbərliyinin, ilk növbədə, Mixail Qorbaçovun insanların həlak olmasına gətirib çıxaran əməllərini “rus şovinizminin təzahürü” adlandırdı.
Rusiyanın xalq artisti ANDREY MARTINOV səmimi qəbula görə Azərbaycan Prezidentinə təşəkkürünü bildirərək, o illərdə hökm sürən mühiti doğru-dürüst canlandırmaq üçün həmin tarixi hadisələrin iştirakçısı ilə belə görüşün vacibliyini vurğuladı, filmdə Heydər Əliyevin rolunu oynayan aktyorun seçilməsini rejissorun uğuru kimi qiymətləndirdi. Vaqif Mustafayev isə dedi ki, Polşa aktyoru Tadeuş Xuk bu rola 105-ci namizəd idi.
Andrey Martınov SSRİ Nazirlər Soveti Sədrinin birinci müavini işləyərkən Heydər Əliyevin Rusiya mədəniyyətinin dəstəklənməsində, incəsənət xadimlərinə qayğı göstərilməsində böyük xidmətləri olduğunu vurğuladı.
Rusiyanın xalq artisti VSEVOLOD ŞİLOVSKİ ölkənin qocaman mədəniyyət ocağı olan Moskva Akademik Bədaye Teatrının yenidən qurulmasında Heydər Əliyevin rolundan söz açaraq, hökumətin iclasında bu işlərə o dövr üçün çox böyük məbləğdə - 25 milyon dollar məbləğində maliyyə vəsaiti ayrılması barədə qərar qəbul etdiyini xatırlatdı. O, Vaqif Mustafayevin “Bir həsədin tarixi” filmini yüksək qiymətləndirdi və dövlətimizin başçısına müraciətlə dedi: “Siz bütün bunlara dözdünüz və görün, indi haradasınız? Buradasınız. Kimsiniz? Prezidentsiniz”.
O, Azərbaycan Prezidentindən çəkiliş prosesinə böyük diqqət yetirməyi xahiş etdi və çəkilişin uğurla başa çatmasını arzuladı.
Dövlətimizin başçısı “Qara nişanə” filminin yaradıcı kollektivinə hərtərəfli yardım göstərəcəyini və onları dəstəkləyəcəyini vəd etdi.
Prezident Heydər Əliyev o illərin hadisələrindən, o cümlədən Kunayevin işdən uzaqlaşdırılmasından danışaraq, bununla bağlı fikirlərini Mixail Qorbaçova bildirdiyini söylədi: “Ona dedim ki, mən insanların milli psixologiyasını bilirəm. Siz səhvə yol verirsiniz. Kolbini Qazaxıstana təyin etmək olmaz. O, isə mənə hirslə, narazı halda baxaraq dedi: “Yaxşı, baxarıq”. Qorbaçovun siyasətinin uğursuzluğu, Sovet İttifaqının süqutu, bunların hamısı onun daxili və xarici siyasətdə buraxdığı səhvlər üzündən baş verdi. Dövlətimizin başçısı daha sonra Qorbaçovun təşəbbüsü ilə Liqaçovun başladığı uydurma “Ozbəkistan işi”ndən də danışdı. Prezident Heydər Əliyev dedi: “Eyni işi Azərbaycanın da başına gətirmək istəyirdilər, lakin burada heç nə alınmadı”.
Azərbaycan Prezidenti görüşdə Mixail Qorbaçovla birgə işlədiyi dövrləri də xatırladı. Dövlətimizin başçısı dedi: ”Mən gedəndən sonra 5 il çiyin-çiyinə işlədiyim, - bundan əvvəl isə Siyasi Büro üzvlüyünə namizəd olmuşam , - Siyasi Büro üzvlərinin heç biri ilə əlaqəm yox idi, hər şey kəsildi, tək qalmışdım. Kimin Moskvada qohumları, ailəsi vardısa, bu, başqa məsələ. Mənim isə heç kimim yox idi. Mənim yalnız uşaqlarım və nəvələrim var idi. 20 Yanvaradək belə yaşadım. Yanvarın 20-də buraya qoşun yeridiləndə, faciə baş verəndə mən dözə bilmədim. Yeri gəlmişkən, mən xəstəxanada idim, qrip olmuşdum. Oradan çıxıb evə gəldim. Qızıma və oğluma dedim ki, Azərbaycanın daimi nümayəndəliyinə gedirəm. Orada çoxlu azərbaycanlı toplaşmışdı. Uşaqlar dedilər ki, biz də səninlə gedirik və mən oraya getdim”.
Artist Canpolad Xuqayev bildirdi ki, o illərdə hamı Heydər Əliyevin yüksələn xətlə gedən siyasi fəaliyyətini izləyirdi. Aktyor dövlətimizin başçısının dəyanətinə heyran qaldığını da gizlətmədi.
Prezident Heydər Əliyev dedi: “Məsələ bundadır ki, kim haqlı idi - Əliyev, yoxsa Qorbaçov? Əliyev artıq 11 ildir ki, burada, öz suveren respublikasında Prezidentdir.
Çətinliklərə baxmayaraq, respublikamız yüksəlişdədir. Bəs indi Qorbaçov kimdir? O, ikinci dəfə prezident olmağı qərara aldı, namizədliyini irəli sürdü və seçicilərin səslərinin cəmi 1,2 faizini topladı. Təsəvvür edirsiniz? O, hətta öz diyarı olan Stavropolda səslərin cəmi 34 faizini topladı. Stavropol diyarının rəhbəri mənə danışırdı ki, Qorbaçov buraya seçicilərlə görüşə gələndə o qədər xoşagəlməz sözlər, o qədər söyüş eşitdi ki, vətəninə gəlməyinə də peşman oldu. Mən isə vətənim Naxçıvana gələndə mənimlə görüşmək üçün meydana 80 min adam toplaşmışdı. Siz bir fərqə baxın!
Mən prezident olmaq istəmirdim, ancaq məni buna vadar etdilər. Bu da məlumdur”.
Heydər Əliyev filmin uğurlu alınacağına tam əmin olduğunu bildirərək dedi: “Çəkiliş zamanı sizə kömək göstərməyi özümə borc, vəzifə hesab edəcəyəm”.
Sonra görüş iştirakçıları Azərbaycan Prezidenti ilə xatirə şəkli çəkdirdilər.
Qəbulda Prezidentin Katibliyinin rəisi Dilarə Seyidzadə iştirak edirdi.
Foto Oqtay Aydınoğlunundur
Bölmənin digər xəbərləri
