AZƏRBAYCAN PREZİDENTİ HEYDƏR ƏLİYEVİN ALMANİYA XARİCİ İŞLƏR NAZİRİ İLƏ GÖRÜŞÜ
Cənab Kinkeli səmimiyyətlə salamlayan dövlətimizin başçısı Azərbaycan-Almaniya əlaqələrinin gündən-günə inkişafından razılıqla bəhs etdi, bu il iyulun əvvəlində AFR-ə rəsmi səfəri zamanı orada keçirdiyi görüşləri, apardığı danışıqları məmnunluqla xatırladı və dövlətlərimiz arasında əməkdaşlığın möhkəmləndirilməsi üçün imzalanmış sənədlərin çox əhəmiyyətli olduğunu qeyd etdi.
Prezident Heydər Əliyevlə hər bir görüşün onun üçün yaddaqalan olduğunu nəzərə çarpdıran cənab Kinkel dövlətimizin başçısının Almaniyaya rəsmi səfərinin ölkələrimiz arasında münasibətlərin daha da yaxşılaşdırılması, əlaqələrin sıxlaşdırılması üçün möhkəm təməl yaratdığını vurğuladı.
Avropada təhlükəsizliyin, sülhün, əmin-amanlığın təmin edilməsi sahəsində Lissabon Zirvə görüşündə qəbul olunacaq sənədlərin mühüm rolundan danışan respublikamızın rəhbəri Ermənistanın Azərbaycana təcavüzündən ətraflı söhbət açaraq, bu münaqişənin sülh yolu ilə aradan qaldırılması üçün təsirli tədbirlər görülməsinin vacibliyini nəzərə çarpdırdı.
Ermənistan silahlı qüvvələrinin təcavüzü nəticəsində Azərbaycan ərazilərinin 20 faizinin işğal olunduğunu, bir milyondan artıq vətəndaşımızın yerindən-yurdundan zorla qovulduğunu xatırladan Prezident Heydər Əliyev bu münaqişənin ATƏT-in Minsk qrupu vasitəsilə sülh yolu ilə, ATƏT-in prinsiplərinə, beynəlxalq normalara, BMT nizamnaməsinə uyğun şəkildə həllinə Azərbaycanın xüsusi əhəmiyyət verdiyini vurğuladı.
Ölkəmizin sülh təşəbbüslərindən söhbət açan dövlətimizin başçısı dedi ki, respublikamız Dağlıq Qarabağın bütün əhalisinin təhlükəsizliyinin qorunmasına təminat yaratmağa və Dağlıq Qarabağa Azərbaycanın tərkibində yüksək muxtariyyət statusu verməyə hazırdır.
Azərbaycanın müharibə yox, sülh istədiyini və buna görə də dəfələrlə kompromisli təkliflərlə çıxış etdiyini bildirən Prezident Heydər Əliyev Minsk qrupu vasitəsilə və ikitərəfli qaydada aparılan danışıqlarda lazımi nəticələr əldə edilməsinə, Böyük sülh sazişinə doğru addımlar atılmasına Ermənistan Respublikasının hər vasitə ilə qəsdən mane olduğunu nəzərə çarpdırdı. Öz təcavüzkarlıq niyyətindən heç cür əl çəkməyən, Azərbaycanın ayrılmaz hissəsi olan Dağlıq Qarabağ regionunu özünə birləşdirməyə cəhd göstərən Ermənistanın hərəkətlərini qətiyyətlə pisləyən dövlətimizin başçısı dedi ki, Ermənistan ən nüfuzlu beynəlxalq təşkilatların prinsiplərinə, hamı tərəfindən tanınmış hüquqi normalara açıqdan-açığa məhəl qoymur.
Lissabon Zirvə görüşünün bəyannamə layihəsində Ermənistan-Azərbaycan münaqişəsinin sülh yolu ilə həllini nəzərdə tutan 20-ci maddənin öz əksini tapmasının vacibliyindən bəhs edən Prezident Heydər Əliyev həmin maddənin qəbul olunmasına Ermənistanın etiraz etməsindən narahatlıqla söhbət açdı və əmin olduğunu bildirdi ki, ATƏT-in üzvü olan ölkələrin dövlət və hökumət başçıları belə hərəkətin qarşısının alınmasına çalışacaqlar. Dövlətimizin başçısı dedi ki, əgər Ermənistan 20-ci maddənin qəbul olunacağına etirazını geri götürməsə, Azərbaycan Zirvə görüşünün bəyannamə layihəsinə bütünlüklə veto qoyacaqdır.
Görüşdə Lissabon Zirvə görüşünün yekun sənədinin qəbul olunması ilə əlaqədar yaranmış vəziyyətin aradan qaldırılması yolları ətraflı müzakirə edildi, hər iki ölkəni maraqlandıran bir sıra digər məsələlər barədə fikir mübadiləsi aparıldı.
Bölmənin digər xəbərləri
