AZƏRBAYCAN PREZİDENTİ HEYDƏR ƏLİYEVİN BÖYÜK BRİTANİYA XARİCİ İŞLƏR NAZİRİ İLƏ GÖRÜŞÜ
Dövlətimizin başçısını hərarətlə salamlayan cənab Rifkind Prezident Heydər Əliyevlə görüşdən məmnun qaldığını bildirdi. Lissabon Zirvə toplantısının dekabrın 2-dəki səhər iclasında onun nitqini diqqət və böyük maraqla dinlədiyini söylədi. Prezident Heydər Əliyevin rəhbərliyi ilə Azərbaycanda demokratik hüquqi dövlət qurmaq, bazar iqtisadiyyatı formalaşdırmaq, demokratik prosesləri inkişaf etdirmək yolunda atılan addımların Londonda maraqla izlənildiyini və dəstəkləndiyini bildirən nazir onun ölkəsinin Azərbaycanla əməkdaşlığa xüsusi diqqət yetirdiyini vurğuladı və respublikamızda iş görən Böyük Britaniya şirkətlərinə göstərilən qayğıya görə Preizdent Heydər Əliyevə bir daha təşəkkür etdi.
Xoş sözlərə görə cənab Rifkində razılığını bildirən respublikamızın rəhbəri ölkəmiz üçün ən ağrılı problemdən - Ermənistan silahlı qüvvələrinin Azərbaycana təcavüzündən ətraflı söhbət açdı. Bu təcavüz nəticəsində respublikamızın torpaqlarının 20 faizinin işğal olunduğunu, ərazi bütövlüyümüzün pozulduğunu qeyd edən dövlətimizin başçısı öz yurdlarından zorla qovulmuş azərbaycanlı qaçqınların dörd ildən bəri qışı çadırlarda dözülməz şəraitdə keçirmələrindən geniş bəhs etdi.
Prezident Heydər Əliyev dedi ki, biz münaqişənin sülh yolu ilə həlli üçün həmişə konstruktiv yol tutmuşuq və ATƏT-in Minsk qrupu xətti ilə bir çox dövlətlərin vasitəçiliyi ilə aparılan danışıqların uğurla başa çatması üçün bütün imkanlardan istifadə etməyə çalışmışıq. Biz Dağlıq Qarabağa yüksək muxtariyyət statusu verməyə, Dağlıq Qarabağın bütün əhalisinin təhlükəsizliyinə təminat yaratmağa hazır olduğumuzu dəfələrlə bəyan etmişik. Lakin Ermənistan Respublikası ATƏT-in prinsiplərinə, beynəlxalq normalara, BMT Təhlükəsizlik Şurasının qətnamələrinə açıqdan-açığa məhəl qoymur, böyük sülh əldə edilməsinə hər vasitə ilə maneçilik törədir, Azərbaycanın Dağlıq Qarabağ regionunu Ermənistana birləşdirməyə cəhd göstərir. Biz buna qətiyyən yol verə bilmərik.
Lissabon Zirvə görüşünün bəyannamə layihəsinin 20-ci maddəsinə Ermənistanın etiraz etməsini bu respublikanın qəsbkarlıq hərəkətindən əl çəkmək istəməməsi kimi qiymətləndirən dövlətimizin rəhbəri bildirdi ki, ATƏT-in üzvü olan ölkələrin dövlət və hökumət başçıları gərək belə hallara yol verməsinlər. Prezident Heydər Əliyev qətiyyətlə bildirdi ki, əgər Ermənistan öz etirazını geri götürməsə, Azərbaycan Lissabon bəyannaməsi layihəsinə bütünlüklə veto qoymaq hüququndan istifadə edəcəkdir.
Görüşdə bu məsələ barədə ətraflı fikir mübadiləsi aparıldı, yaranmış vəziyyətin aradan qaldırılması yolları geniş müzakirə olundu.
Bölmənin digər xəbərləri
