Xəbər verdiyimiz kimi, Azərbaycan Respublikasının Prezidenti Heydər Əliyev avqustun 10-da Naxçıvan Muxtar Respublikasına gəlmişdir.

Ölkəmizin dövlət bayraqları, Azərbaycan Prezidentinin portretləri ilə bəzədilmiş Naxçıvan hava limanında dövlətimizin başçısının şərəfinə fəxri qarovul dəstəsi düzülmüşdü.

Prezident Heydər Əliyevi təyyarənin pilləkəni yanında Muxtar Respublika Ali Məclisinin sədri Vasif Talıbov, digər rəsmi şəxslər, ictimaiyyətin nümayəndələri səmimiyyətlə qarşıladılar. Milli geyimli qızlar Azərbaycan Prezidentinə gül-çiçək dəstəsi təqdim etdilər.

Fəxri qarovul dəstəsinin rəisi Azərbaycan Respublikasının Prezidenti, Ali Baş Komandan Heydər Əliyevə raport verdi. Dövlətimizin başçısı fəxri qarovul dəstəsinin qarşısından keçdi, Azərbaycan əsgərlərini salamladı.

Prezident Heydər Əliyev Muxtar Respublikanın rəhbər işçiləri, Ali Məclisin deputatları ilə görüşdü. Respublikamızın rəhbərinə şərbət təqdim olundu.

Hava limanına Naxçıvanın minlərlə sakini toplaşmışdı. Azərbaycan Prezidenti onlara yaxınlaşaraq, qədim diyarın nümayəndələrini səmimiyyətlə salamladı. Naxçıvanlılar dövlətimizin başçısını hərarətlə alqışladılar və qısa müddətdə ikinci dəfə Muxtar Respublikaya səfər etdiyinə görə minnətdarlıqlarını bildirdilər.

Azərbaycan Prezidenti Heydər Əliyev hava limanından onun üçün ayrılmış iqamətgaha yola düşdü.

NAXÇIVAN ŞƏHƏRİNDƏ AXŞAM GƏZİNTİSİ

Azərbaycan Prezidenti Heydər Əliyev həmin gün axşam Naxçıvan şəhərinə gəzintiyə çıxdı. Dövlətimizin başçısı əvvəlcə Heydər Əliyev adına uşaq və gənclər parkına gəldi. Muxtar Respublika paytaxtının minlərlə sakini Azərbaycan Prezidenti ilə görüşmək üçün buraya toplaşmışdı. Onlar Prezidenti hərarətli alqışlarla, mehribanlıqla qarşıladılar. Prezident Heydər Əliyev şəhər sakinləri ilə səmimiyyətlə görüşüb söhbət etdi, onların istirahəti üçün yaradılan şəraitlə tanış oldu.

Şəhər sakinləri Prezidentə uzun ömür, cansağlığı, işlərində uğurlar diləyərək dedilər ki, Allah Sizi əskik eləməsin, xalqımızın yeganə ümidi Sizədir. Ölkəmizi düşdüyü bu ağır problemlərdən ancaq və ancaq Siz xilas edə bilərsiniz.

Uşaqlar Prezidentə, Vətənə həsr olunmuş şerlər söylədilər.

Heydər baba, ucalardan ucasan,

Tutduğun siyasət uğurlu olsun.

İllər boyu xalq qədrini biləcək,

Gənc nəsillər səninlə fəxr edəcək.

X X X

Sən tək yüz ildən bir doğulur,

Pak mayası həqiqətdən yoğrulur,

Düşmən səni şad görəndə qovrulur,

Üzü nurdur, qəlbi dəniz, Heydərim!

Millətimin atasısan, oğlusan,

Dövlətimin zəkasısan, ağlısan,

Sən ömürlük bu torpağa bağlısan,

Zehni iti, fikri təmiz, Heydərim!

Elin, yurdun nəfəsindən güc alır,

Sənin adın gündən günə ucalır,

Qəlbin cavan, kim deyər ki, qocalır,

Heç olmasın vətən sənsiz, Heydərim!

Sən olmusan Baş Komandan orduma,

Həm mayaksan, həm arxasan yurduma,

Ömrün boyu işıq saçdın obama,

Heç olmasın vətən sənsiz, Heydərim!

X X X

Atamızın atası,

Uşaqların babası,

Bizim rəhbərimizsən,

Əziz Heydər babamız!

Heydər baba,

Heydər canlıyam.

Mən naxçıvanlıyam,

Heydər baba, Heydər qanlıyam.

Heydər baba, Sən bir işıqsan,

Dünyamıza yaraşıqsan.

Sevir səni el-obamız,

Yaşa Heydər babamız.

X X X

Heydər baba, zirvələrə ucaldın,

Neçə dəfə zəfər çaldın, ucaldın,

Qartal kimi zirvələrə ucaldın,

Heydər baba, min il yaşa!

Müstəqillik gəlib başa,

Düşmənlərin dönsün daşa.

Azərbaycan gözün aydın,

Heydər baba, min il yaşa!

X X X

Dövlətimizin başçısı təhsilləri ilə maraqlandı, onlara uğurlar arzuladı.

Sonra respublika Prezidenti şəhərin mərkəzi meydanında yerləşən Heydər Əliyev Muzeyinin qarşısına gəldi, buradakı parkı seyr etdi. Axşamdan xeyli keçməsinə baxmayaraq, buraya gələn minlərlə naxçıvanlı dövlətimizin başçısını səmimiyyətlə, hərarətli alqışlarla qarşıladı. Prezident Heydər Əliyev vaxtilə isti yay günündə burada onu dəstəkləmək üçün keçirilən izdihamlı mitinqi xatırladı və onun heç vaxt yaddan çıxmayacağını bildirdi.

Muxtar Respublikanın paytaxtında gəzinti dünya mədəniyyətinə böyük töhfələr vermiş, orta əsr Şərqinin ən məşhur memarlarından olan Əcəmi Naxçıvaninin adını daşıyan seyrəngahında başa çatdı. Bu, Azərbaycan Prezidentinin tarixi dəyərlərimizə, maddi-mənəvi abidələrimizə olan böyük sevgisinin təzahürü idi. Naxçıvanın yüzlərlə sakini burada Azərbaycan Prezidentini böyük mehribanlıqla qarşıladı, dövlətimizin başçısına dərin hörmət və ehtiramını bildirdi. Prezident Heydər Əliyev şəhər sakinləri ilə səmimiyyətlə söhbət etdi. 

X X X

Azərbaycan Prezidenti Heydər Əliyev avqustun 11-də Şahbuz rayonuna yola düşdü. Rayon icra hakimiyyəti binasının qarşısından keçən yolun kənarına yüzlərlə insan toplaşmışdı. Onlar dövlətimizin başçısını böyük hərarətlə, sürəkli alqışlarla qarşıladılar. Uşaqlar Prezident Heydər Əliyevə gül dəstələri təqdim etdilər.

Azərbaycan Prezidenti şahbuzlularla mehribanlıqla görüşdü, rayon sakinləri qarşısında çıxış etdi.

Şahbuzlular Prezident Heydər Əliyevin çıxışını böyük maraqla dinlədilər. Dövlətimizin başçısını səmimiyyətlə yola saldılar.

X X X

Azərbaycan Prezidentini Şahbuz rayonunun Kolanı kəndində də böyük mehribanlıqla qarşıladılar. Kənd ağsaqqalı, əməkdar müəllim Hidayət İsmayılov, müəllim Vaqif Zülfüqarov, şəhid anası Familə Məmmədova, təqaüdçü Dağbəyi Zamanov dövlətimizin başçısının daxili və xarici siyasətini ürəkdən bəyəndiklərini söylədilər, avqustun 24-də keçiriləcək ümumxalq səsverməsində kolanılıların fəallıqla iştirak edəcəklərini bildirdilər.

Prezident Heydər Əliyev səmimi sözlərə görə onlara minnətdarlığını bildirdi, kənd camaatının qayğıları ilə maraqlandı.

X X X

Ucqar kəndi Biçənəkdə dövlətimizin başçısını hörmət və ehtiramla qarşıladılar. Təqaüdçü Bəbir Məmmədov Prezident Heydər Əliyevə həsr etdiyi şerini söylədi. Kənd sakinləri Şiralı Bayramov, Zakir Salmanov və başqaları onlarla görüşə gəldiyinə görə respublikamızın Prezidentinə minnətdarlıqlarını bildirdilər, müstəqil Azərbaycanın daha sürətlə inkişafı naminə gördüyü işlərdən razılıqla söhbət açdılar, xalqımızın öz müdrik rəhbərinə böyük inam bəslədiyini dönə-dönə vurğuladılar, avqustun 24-də keçiriləcək referendumda hamılıqla iştirak edərək, Prezident Heydər Əliyevin təklif etdiyi dəyişikliklərə səs verəcəklərini dedilər.

Azərbaycan Prezidenti bu ucqar dağ kəndinin mərd insanları ilə görüşdən çox məmnun qaldığını bildirdi, kənd camaatının problemlərinin həllinə daim diqqət yetiriləcəyini söylədi.

Şahbuz rayonunda keçirilən bu görüşlər xalqımızın Prezident Heydər Əliyevə sonsuz məhəbbətinin daha bir əyani nümayişinə çevrildi, görüşlərdə iştirak etmiş hər bir insanda unudulmaz təəssürat oyatdı.

Daha sonra dövlətimizin başçısı məşhur Batabat yaylağında oldu, qədim diyarın uca dağlar qoynunda təbiətin füsünkar gözəlliyini heyranlıqla seyr etdi.

Azərbaycan Prezidenti Heydər Əliyevin Naxçıvan Muxtar Respublikasına səfəri davam edir.

Aslan Aslanov,

Rafiq İmanov,

Oqtay Aydınoğlu (foto),

AZƏRTAC-ın xüsusi müxbirləri,

Rafiq Bağırov (foto)