Avqustun 15-də Azərbaycan Prezidenti Heydər Əliyevin Naxçıvan Muxtar Respublikasına səfəri başa çatdı. Dövlətimizin başçısı maşın karvanının müşayiəti ilə Naxçıvan hava limanına gəldi. Burada fəxri qarovul dəstəsi düzülmüşdü. 

Hava limanına Naxçıvanın minlərlə sakini toplaşmışdı. Prezident Heydər Əliyev onlara yaxınlaşaraq, qədim diyarın nümayəndələrini səmimiyyətlə salamladı. Naxçıvanlılar Azərbaycan Prezidentini hərarətlə qarşıladılar, Muxtar Respublikada çox faydalı və səmərəli görüşlər keçirdiyinə görə minnətdarlıqlarını bildirdilər.

Sonra Prezident Heydər Əliyev Muxtar Respublikanın rəhbər işçiləri, Ali Məclisin deputatları ilə sağollaşdı.

Fəxri qarovul dəstəsinin rəisi Azərbaycan Respublikasının Prezidenti, Ali Baş Komandan Heydər Əliyevə raport verdi. Prezident fəxri qarovul dəstəsinin qarşısından keçdi, Azərbaycan əsgərini salamladı.

Milli geyimli qızlar Azərbaycan Prezidentinə gül-çiçək dəstələri təqdim etdilər. Dövlətimizin başçısı Heydər Əliyev təyyarənin pilləkəni yanında Naxçıvan MR Ali Məclisinin sədri Vasif Talıbovla xüdafisləşdi.

Azərbaycan Prezidenti həmin gün Bakıya gəldi.

X X X

Azərbaycan Prezidenti HEYDƏR ƏLİYEV Binə hava limanında jurnalistlərə müsahibə verdi:

- Səfər zamanı Siz orada mənim yanımda olmusunuz. Operativ olaraq materiallar vermisiniz. Mənə deyirdilər ki, çox şeylər qəzetlərdə dərc olunubdur, televiziyada verilibdir. Onda nə qalıb ki, hər şey məlumdur. Onu deyə bilərəm ki, Naxçıvana bu səfər, mənim qarşıda qoyduğum məqsəd və tərtib etdiyim proqram, hamısı artıqlaması ilə yerinə yetirilibdir.

Bilirsiniz ki, Naxçıvana səfərimin iki məqsədi vardı. Birincisi, Ermənistan Prezidenti Koçaryanla ayın 14-də görüşmək, ikincisi də, - mən bunu gedəndə də bəyan etmişdim, bu məlumdur, - Naxçıvan üçün vacib olan bir neçə sosial-iqtisadi proqramların həyata keçirilməsi haqqında orada qərarlar qəbul etmək və onları elan etmək, bu qərarların həyata keçirilməsi vaxtını müəyyən etmək idi.

Bunlar birincisi, Naxçıvanda beynəlxalq hava limanının tikilməsi, ikincisi, Milli Elmlər Akademiyasının Naxçıvan bölməsinin yaradılması, üçüncüsü də Vayxır su anbarının tikintisinin davam etdirilməsi, yəni həmin tikintiyə yenidən başlanması, tikinti işlərinin davam etdirilməsi və istismara verilməsi məsələləri idi. Bunların hamısını mən etmişəm, siz bunu bilirsiniz. Bunların hər biri barəsində, keçirdiyim tədbirlər haqqında məlumatlar var. Mənə dedilər ki, dövlət televiziyası bunları veribdir. Mənimlə olmayanlar bunu görüblər, qəzetlərdə oxuyublar. Təkrar etməyə ehtiyac yoxdur. Ancaq mən bir də qeyd etmək istəyirəm, bu tədbirləri, hansıları ki, mən özüm öz təşəbbüsümlə irəli sürmüşəm və onların həyata keçirilməsi üçün Naxçıvana getmişəm və bu işləri görmüşəm - onlar Naxçıvan Muxtar Respublikası üçün, Azərbaycan dövlətçiliyinin möhkəmləndirilməsi üçün, Azərbaycanın ərazisinin bütün sahələrini, hər hissəsini əhatə edib, onların inkişafını təmin etmək üçün, Azərbaycanın gələcəyi üçün çox əhəmiyyətli tədbirlərdir. Bunlar sadə tədbirlər deyil, təsadüfi bir şey deyildir. Mən bunu edirəm ki, orada bir qədər çox məhsul alsınlar, yaxud insanlar təyyarədən yaxşı istifadə etsinlər. Mən bunun daxili siyasi mənasını bilərək, bunların hamısını edirəm. Mən məmnunam ki, orada da bunları yaxşı müzakirə etdik. Hesab edirəm ki, yaxşı işlər başlanacaqdır.

Koçaryanla görüşümüz haqqında məlumat verilibdir. Mənə dedilər ki, televiziyada, qəzetlərdə verilibdir. Ona heç bir şey əlavə edə bilmərəm. Orada biz ikimiz də görüşdən sonra bəyanat verdik və onunla danışdıq ki, o da, mən də, bundan artıq heç nə deməyəcəyik.

Bir də ki, yolüstü mən Şahbuz rayonunun mərkəzində, dağ kəndləri var - Kolanı, Biçənək, - orada yaşayan insanlarla görüşdüm, söhbət etdim, keçmişdə gördüyümüz bəzi işləri xatırladıq, bu gün haqqında danışdıq. Dünən də Sədərəkdən qayıdarkən kəndlərin, - yol əsasən Şərur rayonunun ərazisindən keçir, orada bir çox böyük kəndlər var, - bəzilərində insanlar yola çıxmışdılar. Mən də çox məmnunam ki, orada onları gördüm. Onlarla da görüşdük, söhbət etdik.

Naxçıvana gəldiyim günün axşamı hava həddindən artıq isti idi, hazırlaşıb şəhərə, istirahət yerlərinə çıxana kimi hava qaranlıqlaşdı. Amma havanın qaranlıq vaxtında da bu görüş yaxşı idi. Orada çox yaxşı istirahət edirlər. Mənim müqayisə etmək imkanım var. Çünki mən Naxçıvandan 1993-cü ildə çıxmışam. O vaxt bunların heç birisi yox idi. İnsanlar axşamlar çıxıb haradasa gəzə bilərdilərmi, hansısa parka gedə bilərdilərmi? Heç bir şey yox idi. İnsanlar, sadəcə, çalışırdılar ki, özləri üçün yaşamaq imkanı yaratsınlar. Haradasa işləsinlər, gedib evlərində otursunlar. Amma indi Naxçıvanda yaşayış çox yaxşılaşıbdır. Bir neçə tikililər də var. Orada yeni bir otel də tikilibdir. Mənə dedilər ki, Prezidentin Katibliyinin rəisi Dilarə Seyidzadə də səfər günləri orada qalır. Yaxşı otel idimi?

DİLARƏ SEYİDZADƏ: Bəli, cənab Prezident, çox gözəl oteldir. Jurnalistlər də deyəsən başqa oteldə yer almışdılar.

JURNALİSTLƏR: Biz ticarət evindəki oteldə qalırdıq.

HEYDƏR ƏLİYEV: Naxçivan inkişaf edir. Bu da çox gözəldir. Mən çox şad oldum. Adamların əhval-ruhiyyələri yaxşıdır. Bilmirəm, mənimlə olan mətbuat nümayəndələrimiz əgər obyektiv olsalar, hər halda, hardasa bunu deməlidirlər. Deməsələr də düşünməlidirlər ki, o insanların əhval-ruhiyyəsinin qarşısında heç bir şey dura bilməz. Onların hamısı çox yüksək əhval-ruhiyyədədirlər. Mənim üçün çox əhəmiyyətli oldu ki, insanlarla bilavasitə təmasda oldum, görüşdüm, onların əhvalını duydum. Bununla da səfəri qurtardıq, gəldik. Mən çox məmnunam. Mətbuat nümayəndələrinə də orada böyük müsahibə verdim. Qənirə bir neçə dəfə gəldi. Çətin adın var, demək mümkün deyildir. Qənirə xanım çoxdan fürsət axtarırdı ki, məndən müsahibə alsın. Orada imkan oldu, mən də fikirləşdim, bir halda ki, vaxt var, danışaq. Danışdıq. O müsahibəni də yayıblar, siz bunu bilirsiniz. Onu da danışmağa ehtiyac yoxdur.

Mətbuat nümayəndələri də 5 gün mənimlə birlikdə əziyyət çəkdilər. Mənə belə gəlir ki, oranı gedib görmək çəkilən əziyyətə dəyər. Sən orada var idin? Sən də var idin? Sən hansı qəzetdənsən?

JURNALİST: “Azadlıq” qəzetindənəm.

HEYDƏR ƏLİYEV: “Azadliq” qəzetindən... Sən necə, vardın?

JURNALİST: Xeyr, mən yox idim.

HEYDƏR ƏLİYEV: Mənə bir sözünüz varmı?

SUAL: Cənab Prezident, Koçaryanla son görüşünüz əvvəlkilərdən mahiyyəti etibarilə əsasən nə ilə fərqlənir?

CAVAB: Bu söhbətləri kənara qoyun. Mən sizə dedim ki, Koçaryanla görüşüm haqqında dediyimiz sözlərdən başqa heç nə deməyəcəyəm. Bu barədə sual verməyin.

SUAL: Cənab Prezident, Siz Koçaryanla görüşərkən Ermənistanın müdafiə naziri bizim kütləvi informasiya vasitələrinə müsahibə verib və bildirib ki, Dağlıq Qarabağı Azərbaycanın tərkibində təsəvvür etmir və ümumiyyətlə, heç Mehri problemi də ortalığa gələ bilməz. Bəs Siz bunu necə qiymətləndirirsiniz?

CAVAB: Bilirsənmi, o mənimlə danışmayıbdır. Mən Prezidentlə danışmışam. Prezident də mənimlə danışıbdır. Orada hər adam öz sözünü deyə bilər.

SUAL: Cənab Prezident, Azərbaycanda taxıl məhsulu artıb. Yığım zamanı Bərdədə, Cəlilabadda kənd təsərrüfatı texnikasının çatışmaması ilə əlaqədar müəyyən problemlər yaranıbdır.

CAVAB: Mən bunu bilmirdim. Belə bir hal varsa, mən sabah göstəriş verərəm. Çünki bu il taxılımız keçən ilkindən də çox olmalıdır. Mənə dedilər ki, bu il topladığımız taxılla ölkəmizin tələbatını təmin edəcəyik. Əlbəttə, məhsul var, indi əsas odur ki, onu yığıb, toplayıb anbara gətirmək lazımdır. Məndə bu siqnal yoxdur. Bir halda ki, siz deyirsiniz, sabah mən məşğul olaram.

SUAL: Cənab Prezident, sabah sərhədçi günüdür. Bununla əlaqədar Zaqatala hadisələrində həlak olan sərhədçilərlə bağlı fərman verəcəksinizmi?

CAVAB: İş onda deyil ki, hansı gün, nə vaxt sərəncam verəcəyik. Zaqatalada fərqlənmiş, həlak olmuş sərhədçilərin xidmətini mən qeyd edəcəyəm. Sağ olun.

X x x

Azərbaycan Prezidenti Heydər Əliyevi Binə hava limanında baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər qarşıladılar.

AZƏRTAC

Foto Oqtay Aydınoğlunundur