AZƏRBAYCAN PREZİDENTİ HEYDƏR ƏLİYEVİN ÖZBƏKİSTAN PREZİDENTİ İSLAM KƏRİMOV İLƏ GÖRÜŞÜ
Dövlətimizin başçısını mehribanlıqla salamlayan dost ölkənin rəhbəri Azərbaycan Prezidenti Heydər Əliyev ilə Özbəkistanda görüşməkdən məmnun olduğunu bildirdi. O, bu ilin mayında Azərbaycana rəsmi səfərindən razılıqla söhbət açdı və ona göstərilmiş qonaqpərvərliyə, diqqət və qayğıya görə respublikamızın rəhbərinə təşəkkür etdi. İslam Kərimov Bakıda Özbəkistanla Azərbaycan arasında imzalanmış mühüm sənədlərin ölkələrimizin əməkdaşlığının daha da inkişafında böyük əhəmiyyətini nəzərə çarpdırdı.
Türkdilli ölkələrin dövlət başçılarının dördüncü Zirvə görüşündə Azərbaycan Prezidenti Heydər Əliyevin nitqini böyük diqqətlə dinlədiyini vurğulayan İslam Kərimov bu tədbirlərin ölkələrimiz arasında münasibətlərin daha da dərinləşdirilməsi, türkdilli xalqların tarixi ənənələrinin və əlaqələrinin bərpası və canlandırılması üçün çox faydalı olduğunu bildirdi.
Xoş sözlərə görə dost ölkənin rəhbərinə minnətdarlıq edən dövlətimizin başçısı Heydər Əliyev İslam Kərimovun Bakıya rəsmi səfərinin Azərbaycan-Özbəkistan əməkdaşlığının daha da sıxlaşdırılmasında xüsusi əhəmiyyətə malik olduğunu bildirdi. Azərbaycan Prezidentinin fikrincə, xalqlarımız arasında təşəkkül tapmış dostluğun, əməkdaşlığın, qardaşlıq münasibətlərinin bütün zəngin potensialı əsasında bu gün gözəl münasibətlər yaratmaq hər iki ölkə üçün çox vacibdir.
Bakıda imzalanmış sənədlərin ölkələrimizin iqtisadi əməkdaşlığının əsaslı inkişafına çox müsbət təsir edəcəyini söyləyən dövlətimizin başçısı bu sənədlərdə nəzərdə tutulan məsələlərin həllini sürətləndirməyin vacibliyinə də toxundu.
Böyük Əmir Teymurun 660 illik yubileyi ilə bağlı tədbirlərdə iştirak edəcəyindən məmnunluqla söhbət açan Prezident Heydər Əliyev türkdilli xalqların tarix və mədəniyyətinə böyük töhfələr vermiş dünya əhəmiyyətli görkəmli şəxslərin yubileylərinin qeyd edilməsinin çox faydalı olduğunu nəzərə çarpdırdı. Respublikamızın rəhbəri noyabrın əvvəlində Azərbaycanın dahi şairi Məhəmməd Füzulinin 500 illiyinə həsr olunmuş böyük yubiley tədbirləri keçiriləcəyindən də ətraflı söhbət açdı və İslam Kərimovun başçılığı ilə Özbəkistan nümayəndə heyətini bu şənliklərdə iştirak etməyə bir daha dəvət etdi.
Görüş zamanı ölkələrimizi maraqlandıran bir sıra məsələlər barədə konkret müzakirələr aparıldı.
Bölmənin digər xəbərləri
