Azərbaycan Respublikasının Prezidenti İlham Əliyev mayın 19-da Prezident sarayında Baş nazirin keçmiş birinci müavini Abbas Abbasova ölkəmizin iqtisadi inkişafındakı böyük xidmətlərinə görə “İstiqlal” ordeni təqdim etmişdir.

Dövlətimizin başçısı İLHAM ƏLİYEV dedi:

- Siz uzun müddətdir ki, böyük vəzifədə, Baş nazirin birinci müavini vəzifəsində işləyirsiniz. Əlbəttə, 14 ilə yaxın müddət ərzində xidmətlər göstərmisiniz. Bu illər Azərbaycan üçün həlledici illər olmuşdur. Ölkəmiz müstəqilliyə qovuşduqdan sonra çox çətin bir vəziyyətlə üzləşmişdi və dövlətçiliyimizin formalaşması, möhkəmlənməsi illəri bizim üçün həm çox şərəfli, həm də çətin illər olmuşdur. Siz də bu dövr ərzində həmişə öz fəaliyyətinizlə ümumi işimizə böyük töhfələr vermisiniz. Ulu öndər Heydər Əliyevin rəhbərliyi altında bu mühüm vəzifəni siz çox ləyaqətlə icra etmisiniz və Azərbaycanın iqtisadi inkişafının sürətlə irəliyə getməsində əməyiniz olmuşdur. Mən də bunları çox yüksək qiymətləndirirəm.

Bildiyiniz kimi, ulu öndər Heydər Əliyev də sizin fəaliyyətinizi çox yüksək qiymətləndirirdi. Bu, indi də davam edir və bunu nəzərə alaraq, mən sizi Azərbaycan dövlətinin ən yüksək mükafatı - “İstiqlal” ordeni ilə təltif edirəm. İstəyirəm, bu mükafatı sizə təqdim edim.

Azərbaycan Prezidenti İlham Əliyev “İstiqlal” ordenini Abbas Abbasova təqdim etdi.

Abbas Abbasov dərin minnətdarlığını bildirərək, dövlətimizin başçısına müraciətlə dedi:

- Cənab Prezident, çox sağ olun. Mənim sevincimin həddi-hüdudu yoxdur. Bu illər ərzində həmişə böyük məsuliyyət hissi ilə çalışmışam ki, mənə etibar olunan sahədə işlərin öhdəsindən şərəflə gəlim. Qeyd etmək istəyirəm ki, bu gün çox həyəcanlıyam. Mənim bu vəzifədə həm dövlət xadimi kimi, həm də bir şəxsiyyət, insan kimi formalaşmağım da bizim hamımızın sevimlisi, ümummilli liderimiz, ağsaqqalımız, atamız, böyüyümüz, müstəqil ölkəmizin, Azərbaycanın banisi Heydər Əliyevin xidmətləridir, onun zəhmətidir. İndi bundan kim necə bəhrələnir, o, hər insanın özünün vicdanındadır, onun ləyaqətindədir, mənəviyyatındadır.

Mən bu gün həyatımdan da, Allahımdan da razıyam. Sizə də çox böyük razılıq hissimi bildirirəm. Sizin mənim əməyimə, zəhmətimə verdiyiniz bu mükafat həm mənim üçün, həm də övladlarım üçün, - onlar da Heydər Əliyev dühası ilə böyümüş, ondan bəhrələnmiş cavan oğlanlardır, - böyük şərəfdir. Mən hesab edirəm ki, hər bir insan həyatında gərək Vətəninə, dövlətinə, xalqına, millətinə, böyüyünə, ağsaqqalına, ölkəsinin rəhbərinə həmişə sədaqətli olsun. Uşaq olanda həmişə bizə deyirdilər ki, müəllim ikinci valideyndir. Hesab edirəm ki, ölkənin başçısı da valideyndir, böyükdür. Siz, yaşınızdan asılı olmayaraq, son iki il ərzində Azərbaycan üçün nələr etməmisiniz!

Cənab Prezident, mənim heç zaman yadımdan çıxmaz. Siz yenicə Prezident seçilmişdiniz, məni qəbul etdiniz. O zaman Sizə müraciət edirdim ki, İlham müəllim, Azərbaycanı necə görürsünüz?! Siz mənə dediniz, Abbas müəllim, mən Azərbaycanı çiçəklənən görmək istəyirəm, Azərbaycan xalqını varlı, dövlətli görmək istəyirəm. Mən bu gün həyatımdan çox razıyam ki, həqiqətən Siz verdiyiniz bütün vədlərə sadiq qalırsınız. Gördüyünüz bütün işlər bunu göstərir.

Mən bu gün müraciət etmək istəyirəm, çünki ola bilsin, gələcəkdə belə rəsmi formada müraciət etməyə imkanım olmadı. Xalqımıza müraciət etmək istəyirəm ki, İlham Əliyevi qoruyun! Bügunkü İlham Əliyev siyasətini qoruyun! Heydər Əliyevin qoyduğu bu dühaları qoruyun! Bu, mənim xeyir-duamdır. Artıq mən də ağsaqqalam, demirəm ki, lap yaşlaşmışam, ancaq artıq yaşa dolmuşam. Sizə çox böyük minnətdarlıq hissi ilə müraciət edirəm ki, cənab Prezident, bu illər ərzində çox əziyyətlər, zəhmətlər çəkdim, mənə icazə verin, bir az dincəlim, ailəmlə, balalarımla məşğul olum. Yenə də həmişə Sizin əsgərinizəm, xalqımızın əsgəriyəm. Mən yenə də əsgər kimi həmin ön sıralardayam. Sizə, ölkəmizə, millətimizə, xalqımıza xidmət etməyə hazıram.

Cənab Prezident, mənə göstərdiyiniz bu yüksək hörmətə, ehtirama görə Sizə bir daha minnətdaram və daim Sizinlə bir yerdəyəm.

İLHAM ƏLİYEV: Abbas müəllim, çox sağ olun. Biz uzun illərdir bir-birimizi yaxından tanıyırıq. Deyə bilərəm ki, bizi dostluq əlaqələri də bağlayır və müxtəlif dövrlərdə birgə işləmişik. Son iki il yarım ərzində, mən Prezident vəzifəsini icra etməyə başlayandan sonra, bizim əlaqələrimiz daha da sıx olubdur. Çünki Sizin rəhbərlik etdiyiniz sahə çox geniş olmuşdur. Həm beynəlxalq əlaqələr, eyni zamanda iqtisadi inkişaf məsələləri. Bunlar o məsələlərdir ki, Azərbaycan dövlət kimi gündəlik həyatda öz milli maraqlarının təmin edilməsi üçün bu sahədə əlindən gələni edir. Əlbəttə ki, dövləti idarə edən rəhbərlərin siyasəti nəticəsində.

Siz qeyd etdiniz, həqiqətən, mən o vaxtkı görüşü xatırlayıram və ilk günlərdən qarşıda duran əsas vəzifə ondan ibarət olmuşdur ki, Azərbaycan həm ölkə daxilində iqtisadi inkişaf baxımından, həm də xarici siyasət baxımından daha da möhkəmlənsin, daha da güclü mövqelərə malik olsun. Bu gün ölkə daxilindəki vəziyyət, eyni zamanda, dünyada mövqelərimiz daha da möhkəmlənir. Bu, bizim hamımızın zəhmətidir, xidmətidir. Ona görə, şəxsən mən Azərbaycanın gələcəyinə çox nikbinliklə baxıram. Bizim qəbul etdiyimiz bütün qərarlar icra edilir, bütün tədbirlər vaxtlı-vaxtında həyatda öz əksini tapır. Azərbaycan iqtisadi inkişaf baxımından bu gün lider dövlətdir. Xarici siyasətimiz milli maraqlarımızın təmin edilməsinə tam şəkildə xidmət edir. Demək olar ki, bizim problemlərimiz yoxdur. Bircə problem Ermənistan-Azərbaycan, Dağlıq Qarabağ münaqişəsinin həllidir. Əminəm ki, biz onu da həll edəcəyik. Bunu etmək üçün biz gərək güclü olaq. Bu gün Azərbaycanın iqtisadi inkişafı deməyə əsas verir ki, biz bütün məqsədlərə nail olacağıq.

Siz iki gün bundan əvvəl mənə şəxsi söhbət əsnasında, sonra məktubla müraciət etmisiniz ki, artıq bir az dincəlmək istəyirsiniz. Amma mən inanmıram dincələcəksiniz. Siz elə fəal adamsınız ki, daim fəaliyyətdə olacaqsınız. Amma yəqin ki, bu da təbiidir. Çünki 14 il böyük müddətdir. Düzdür, mən hesab edirdim ki, siz bu vəzifədə gələcəkdə də işinizi davam etdirəcəksiniz. Amma bir halda ki, bu, sizin qərarınızdır, mən bu qərara hörmətlə yanaşıram və əminəm ki, siz gələcəkdə başqa fəaliyyətdə də böyük uğurlar əldə edəcəksiniz. Sizin fəaliyyətiniz o cümlədən ölkəmizin möhkəmlənməsinə xidmət edəcəkdir.

Bu, çox əlamətdar bir hadisədir. Bəlkə də, Azərbaycanın müasir tarixində ilk dəfə belə bir hadisə baş verir. Mən bunu müsbət hal kimi qiymətləndirirəm. Çünki ölkəmiz yeniləşir, müasirləşir, münasibətlər, davranış qaydaları, bütün mədəni normalar yeni müstəviyə qalxır. Bunların hamısının Azərbaycanın hərtərəfli inkişafında çox böyük əhəmiyyəti var. Vəzifəyə gəlmək, vəzifədən getmək - bu, təbii prosesdir və belə də olmalıdır. Sizin bu addımınız onu bir daha göstərir.

Düzdür, mən hesab edirdim ki, hələ biz bu formada gələcəkdə də işləyəcəyik. Amma indi başqa formada işləyəcəyik. Əminəm ki, sizin həyatınızda yeni mərhələ başlayır. Siz gənc yaşlarından müxtəlif vəzifələrdə dövlət işində olmusunuz. Yenə də deyirəm ki, siz bu böyük vəzifələrin öhdəsindən çox şərəflə gəlmisiniz. Mən də sizin fəaliyyətinizi çox yüksək qiymətləndirirəm. Bəlkə də, bu gün fürsətdir ki, mən bunu belə deyə bilirəm. Çünki, adətən Prezident və onun rəhbərliyi altında işləyən insanların arasında belə söhbətlər olmur. Biz daha çox konkret problemlərin həlli ilə məşğuluq, onların yollarını arayırıq. Fürsət olmur ki, belə ürək sözlərimizi deyək. Xüsusilə bu, Prezident üçün o qədər də asan məsələ deyildir. Amma bu gün çox gözəl fürsətdir və mən istəyirəm ki, bunu deyim. Çünki öz səmimi sözlərimdir, səmimi hisslərimdir. Siz bunu bilirsiniz, istəyirəm ki, hamı bilsin. Sizə gələcək işinizdə uğurlar arzulayıram.

ABBAS ABBASOV: Cənab Prezident, çox sağ olun, minnətdaram. Mən Sizinləyəm.