AZƏRBAYCAN PREZİDENTİ İLHAM ƏLİYEV “ALOV” ZAVODUNUN AÇILIŞ MƏRASİMİNDƏ İŞTİRAK ETMİŞDİR
Azərbaycan Respublikasının Prezidenti İlham Əliyev iyunun 25-də Müdafiə Sənayesi Nazirliyi Optika-Mexanika İstehsalat Birliyinin “Alov” zavodunun açılış mərasimində iştirak etmiş, yeni yaradılan müəssisənin istehsal prosesi ilə tanış olmuşdur.
Prezident İlham Əliyev açılışı bildirən lenti kəsdi. Sonra dövlətimizin başçısı zavodun həyətində ümummilli lider Heydər Əliyevin büstünü ziyarət etdi.
Dövlətimizin başçısı müəssisənin əvvəlki və təmirdən sonrakı vəziyyətini əks etdirən videosüjetə baxdı. Daha sonra Prezident İlham Əliyev müəssisədə yaradılmış Heydər Əliyev muzeyi ilə tanış oldu.
Müdafiə sənayesi naziri Yavər Camalov nazirliyin Optika-Mexanika İstehsalat Birliyinin “Alov” zavodu barədə Azərbaycan Prezidenti İlham Əliyevə ətraflı məlumat verərək bildirdi ki, müəssisə 1990-cı ildən fəaliyyətini dayandırmış, ərazisi tamamilə bərbad vəziyyətə düşmüşdü. Azərbaycan Prezidenti İlham Əliyevin 2005-ci il 16 dekabr tarixli Sərəncamı ilə Müdafiə Sənayesi Nazirliyi yaradıldıqdan sonra müəssisənin istehsal istiqaməti dəyişdirildi. Qısa vaxt ərzində zavod ən müasir standartlara uyğun olaraq əsaslı şəkildə bərpa edildi. Azərbaycanda yeni bir sahənin - optik nişangahların, gecəgörmə cihazlarının və digər müşahidə qurğularının istehsalına başlanıldı.
Dövlətimizin başçısı ayrı-ayrı istehsal sahələrinin işi ilə maraqlandı. Rəqəmlə idarə edilən torna və frezer emal mərkəzlərində oldu. Prezident İlham Əliyev burada nişangahların gövdə detallarının tökülməsi üçün nəzərdə tutulan müasir qurğularla tanış oldu, gövdələrin mexaniki emal prosesini izlədi. Məlumat verildi ki, sexdə dünyanın ən müasir standartlarına cavab verən avadanlıq quraşdırılmışdır. Sonra Prezident İlham Əliyev termik emal sahəsi ilə tanış oldu, müəssisədə istehsal edilmiş nişangahların, mexaniki və klimatik sınaqların keçirildiyi avadanlıqların iş prosesini izlədi. Prezident, həmçinin mexaniki universal avadanlıqlar sexindəki müasir tipli torna və frezer dəzgahlarında emal prosesini izlədi, eləcə də optik nişangahlarda istifadə edilən linzaların, prizmaların və torların istehsal sahəsi ilə də tanış oldu. Ayrı-ayrı istehsal sahələrinə baxan Prezident İlham Əliyev yığım sahəsinə də gəldi. Burada nişangahların tam şəkildə yığılma prosesi, onların xarakteristikasının və parametrlərinin ölçülməsi, eləcə də texniki nəzarət proseslərini izlədi. Daha sonra dövlətimizin başçısı müəssisədə istehsal olunan hazır məhsulların sərgisi ilə də tanış oldu, onların keyfiyyəti ilə maraqlandı.
Sonra Prezident İlham Əliyev motodor və morodor tipli müasir zirehli maşınların təqdimat mərasimində iştirak etdi. Dövlətimizin başçısı sükan arxasına keçərək zirehli maşını özü idarə etdi. Zirehli maşınların keyfiyyəti ilə tanış olan Prezident İlham Əliyev bu tipli zirehli texnikanın Azərbaycanda istehsal olunmasını tövsiyə etdi, bütövlükdə zavoddakı istehsal sahələrinin gələcəkdə daha da inkişaf etdirilməsi ilə bağlı müvafiq tapşırıqlarını verdi.
######
 |
 |
 |
 |
Bölmənin digər xəbərləri
