Xəbər verdiyimiz kimi, Azərbaycan Prezidenti İlham Əliyev aprelin

28-də ABŞ Prezidenti Corc Buş ilə görüşdən sonra Ağ evin qarşısında jurnalistlərin suallarına cavab vermişdir.

SUAL: Cənab Prezident, Dağlıq Qarabağ münaqişəsinin həlli ilə bağlı müzakirələr oldumu?

CAVAB: Prezident Buşla görüşüm zamanı ikitərəfli münasibətlərə aid məsələləri müzakirə etdik. Biz müxtəlif sahələrdə olan əməkdaşlığımızı müzakirə etdik. Xüsusən də siyasi və iqtisadi islahatlar sahəsinə, enerji təhlükəsizliyi və nəqliyyata, terrorçuluqla mübarizəmizə aid məsələləri və ümumiyyətlə, münasibətlərimizin ümumi gedişatını müzakirə etdik. Bizim münasibətlərimiz dostların, tərəfdaşların münasibətləridir və bizim üçün strateji əhəmiyyət daşıyır və ümumiyyətlə, əlaqələrimizin inkişafı üçün vacibdir. Mən müzakirələrdən çox razıyam.

Əlbəttə, biz Ermənistan-Azərbaycan, Dağlıq Qarabağ münaqişəsi məsələsini müzakirə etdik. Dünyanın aparıcı ölkəsi və ATƏT-in Minsk qrupunun həmsədrlərindən biri kimi Birləşmiş Ştatlar bu məsələnin dinc yolla həll olunmasında çox vacib rol oynayır. Biz Birləşmiş Ştatların göstərdiyi səyləri yüksək qiymətləndiririk. Bu səylər sayəsində münaqişə beynəlxalq hüququn norma və prinsipləri əsasında ədalətli həllini tapmalıdır. Mən hesab edirəm ki, Birləşmiş Ştatlara səfərim ikitərəfli münasibətlərimizin gələcək inkişafı üçün çox mühüm olacaq və ümumiyyətlə, regional inkişaf üçün əhəmiyyətli olacaqdır.

SUAL: Cənab Prezident, İran haqqında danışdınızmı?

CAVAB: Əlbəttə, biz regional təhlükəsizlik məsələlərini müzakirə etdik. Eyni zamanda, qonşu ölkələrlə münasibətlərimizi müzakirə etdik. Çünki biz elə bir regionda yaşayırıq ki, Azərbaycanın qonşu ölkələrlə münasibətləri olduqca vacibdir. Biz bu məsələləri müzakirə etdik və bundan çox razıyıq.

SUAL: Bəs Rusiya haqqında, digər qonşular haqqında danışdınızmı?

CAVAB: O qədər çox yox. Biz, əsasən, ikitərəfli münasibətlərə aid məsələlər haqqında danışdıq. Çünki bizim uzun müddətdir münasibətlərimiz var. Bu münasibətlər 1990-cı illərdən başlanmışdır və əsasən, enerji, nəqliyyat sahələrinə aiddir.

SUAL: Cənab Prezident, enerji inkişafı sahəsində Birləşmiş Ştatların dəstəyi haqqında danışdınızmı?

CAVAB: Bəli, təbii ki, Xəzər dənizində Azərbaycanın enerji inkişafı proqramlarında Birləşmiş Ştatların oynadığı vacib rol tamamilə aydındır və həlledicidir. Artıq Azərbaycan güclü nəqliyyat infrastrukturuna malikdir və bu, Birləşmiş Ştatların dəstəyi sayəsində mümkün olmuşdur.

SUAL: Cənab Prezident, İranla bağlı gərginliyin aradan qaldırılmasına dair ABŞ-ın və Azərbaycanın səylərinin əlaqələndirilməsi məsələsi müzakirə olundumu? Bu gərginliyin aradan qaldırılmasına yönəldilmiş hansısa birgə fəaliyyət planı işlənib hazırlandımı?

CAVAB: Burada birgə planlar haqqında söhbət olmadı. Biz yalnız vəziyyət barədə fikir mübadiləsi etdik. Əlbəttə, vəziyyət narahatlıq doğurur və təbii ki, İranın qonşusu kimi Azərbaycan müəyyən naratlıq keçirir. Ancaq məsələnin yalnız diplomatik yolla həll edilməsinin zəruriliyi barədə ümumi fikirdə olmağımız ümid verir ki, hər şey dincliklə həllini tapacaqdır.

SUAL: Cənab Prezident, Dağlıq Qarabağ məsələsinin müzakirəsi ilə əlaqədar hansı açıqlamalar verərdiniz?

CAVAB: Münaqişənin nizama salınması ilə əlaqədar geniş söhbət aparılmışdır. Mən cənab Prezidentə danışıqların son mərhələsinin mahiyyətini açıqladım, öz məlumatlarımı verdim. Azərbaycanın mövqeyini bir daha ifadə etdim. Bizim mövqeyimiz dəyişməz olaraq qalır. Bu mövqe bu gün mənim tərəfimdən bir daha ifadə olundu. Bu münaqişə yalnız və yalnız beynəlxalq hüquq normaları əsasında öz həllini tapa bilər. Azərbaycanın ərazi bütövlüyü danışıqlar mövzusu deyil və olmayacaqdır. Ermənistanın işğalçı qüvvələri Azərbaycanın zəbt edilmiş torpaqlarından çıxmalıdır. Dağlıq Qarabağda yaşayan ermənilərin və oraya qayıdacaq azərbaycanlıların təhlükəsizliyinə zəmanət də verilməlidir. Eyni zamanda, oraya sülhməramlı qüvvələrin gətirilməsi məsələsi də müzakirə oluna bilər. Bütövlükdə, bizim mövqeyimizdə heç bir dəyişiklik yoxdur. Amerika Prezidenti öz mövqeyini bildirdi. O bildirdi ki, Amerika çalışır münaqişə sülh yolu ilə həll olunsun və tərəflər razılığa gəlsinlər.

SUAL: Cənab Prezident, Amerika Birləşmiş Ştatlarının Azərbaycana hərbi yardımı artırması gözlənilirmi?

CAVAB: Bilirsiniz ki, biz bu sahədə çox ciddi əməkdaşlıq edirik. Son illər ərzində hərbi sahədə əməkdaşlığımız uğurla inkişaf edir. Amerikanın müdafiə nazirinin, diğər vəzifəli şəxslərinin Azərbaycana səfərləri bu əməkdaşlığın inkişafına böyük kömək göstərir. Biz bu məsələyə çox böyük diqqət yetiririk. Hesab edirik ki, Amerika ilə münasibətlərimiz çoxşaxəli və hərtərəfli olmalıdır, biz iqtisadi, siyasi sahələrdə, energetika sahəsində, eyni zamanda, hərbi sahədə əməkdaşlığın inkişafında maraqlıyıq. Qarşılıqlı maraq doğuran bütün məsələlər açıq şəkildə müzakirə olunur. Biz tərəfdaşıq, Amerika ilə bir alyansdayıq və bu mövqedə qalacağıq.

SUAL: Cənab Prezident, Ermənistanın xarici işlər naziri bəyan edib ki, sizin bu səfərinizdən sonra Ermənistan Prezidenti Robert Koçaryan da Amerikaya səfər edəcəkdir. Sizcə, həmin səfərin reallaşması Dağlıq Qarabağ münaqişəsi ilə bağlı danışıqlar prosesinə hansısa təsir göstərə bilərmi?

CAVAB: Mən bu barədə bir şey deyə bilmərəm. Mənim Amerikaya səfərim bilavasitə Qarabağ probleminin nizamlanması ilə əlaqədar deyildi. Bu səfərin səbəbi tam başqadır. Səfər ikitərəfli münasibətlərin inkişafına yönəldilibdir. Qarabağ mövzusu səfərin, aparılan danışıqların sadəcə olaraq tərkib hissəsi idi. Yəni bə səfərin mahiyyəti, səbəbləri tam başqadır. Bizim strateji tərəfdaşlığımız Amerikanı Azərbaycanla birləşdirən siyasi, iqtisadi məsələlər, enerji təhlükəsizliyi, regionda sülhün bərqərar olması, təhlükəsizlik tədbirlərinin gücləndirilməsi - məsələlərin geniş spektrinin müzakirəsi onu göstərir ki, aramızda çox yüksək əməkdaşlıq, qarşılıqlı anlaşma var. Beləliklə, bu bizə ümid verir ki, gələcəkdə strateji tərəfdaşlıq daha da güclənəcəkdir. O ki qaldı, Ermənistan Prezidentinin harasa səfərlərinə, bu məsələ məni maraqlandırmır.

SUAL: Cənab Prezident, tərəflər regionda sülhün və demokratiyanın bərqərar olması ilə bağlı hansısa öhdəliklər götürdülərmi?

CAVAB: Bilirsiniz, mən buraya öhdəlik götürməık üçün gəlməmişəm. Mən tam hüquqlu tərəfdaş kimi gəlmişəm, dost kimi gəlmişəm. Əlbəttə ki, söhbət zamanı bölgədə gedən proseslər, o cümlədən demokratik islahatlar müzakirə olundu. Bu baxımdan da, bu sahədə də bizim aramızda fikir ayrılığı yoxdur. Amerika çalışır ki, bölgədə demokratiya daha da geniş vüsət alsın, yayılsın. Bunu biz də istəyirik. Biz də istəyirik ki, bölgədə, o cümlədən Azərbaycanda demokratik proseslər daha da sürətlə getsin. Siyasi münasibətlər mədəni müstəvidə həll olunsun. Bu, əlbəttə, bizim hərtərəfli inkişafımıza böyük dəstək olacaq və bölgədə sülhün, təhlükəsizliyin təmin edilməsində də rol oynayacaqdır. Əlbəttə, bu məsələlər müzakirə olundu və bunlarla bağlı bizim aramızda heç bir fikir ayrılığı yoxdur.