AZƏRBAYCAN PREZİDENTİ İLHAM ƏLİYEV RESPUBLİKA MUZEY MƏRKƏZİNDƏ OLMUŞDUR
Azərbaycan Respublikasının Prezidenti İlham Əliyev martın 18-də Respublika Muzey Mərkəzində olmuşdur.
Dövlətimizin başçısı Muzey Mərkəzinin yerləşdiyi binanın xarici görünüşünə diqqət yetirdi. Bakının mərkəzində, dənizkənarı Milli parkla üzbəüz yerləşən bu bina 1960-cı ildə tikilmişdir. 1991-ci ildən etibarən burada üç muzey və İncəsənət Qalereyası yerləşir.
Prezident İlham Əliyev əvvəlcə Azərbaycan Xalçası və Xalq Tətbiqi Sənəti Dövlət Muzeyinin fondunda saxlanılan xalçalara və buradakı şəraitə baxdı. Dövlətimizin başçısı dedi ki, bu muzeyin ayrıca binası olmalıdır. Çünki xalça muzeyi doğrudan da dünyada yeganə muzeylərdəndir. Azərbaycan Prezidenti mədəniyyətimizi ilmələrdə yaşadan bu sənət növünün nümunələrinin daha etibarlı qorunması üçün ən yüksək şərait yaradılacağını bildirdi və bunun üçün lazımi təkliflər hazırlayıb təqdim olunmasını tapşırdı.
15 minə qədər eksponatın toplandığı muzeydə Azərbaycan xalçaçılıq sənəti məktəblərinin ayrı-ayrı dövrlərə şahidlik edən ən müxtəlif çeşnili nümunələri, milli geyimlər, bədii tikmələr, zərgərlik məmulatı, bədii metal, ağac və daş üzərində oyma sənəti nümunələri nümayiş etdirilir. Ümummilli liderimiz Heydər Əliyev bu muzeyə daim diqqət və qayğı göstərmişdir.
Dövlətimizin başçısı muzeyin ekspozisiyası ilə tanış oldu, dünya muzey təcrübəsinə uyğunluğu ilə maraqlandı, ulu öndərin muzeyə diqqətini əks etdirən tarixi fotolara baxdı.
Növbəti tanışlıq səhnə mədəniyyətimizin bir əsrdən artıq dövrünü özündə əks etdirən Azərbaycan Dövlət Teatr Muzeyi ilə oldu. Təxminən 127 min eksponatın qorunduğu muzey barədə Prezidentə məlumat verildi. Dövlətimizin başçısı Azərbaycan teatrının tarixini özündə yaşadan bu cür eksponatların daha etibarlı və beynəlxalq tələblərə cavab verən şəraitdə saxlanılmasının vacibliyini vurğuladı və müvafiq tövsiyələrini verdi.
20 mindən artıq eksponatı olan Azərbaycan İstiqlal Muzeyi də Muzey Mərkəzinin binasında yerləşir. Prezident İlham Əliyev milli azadlıq hərəkatı tarixinə, sovet repressiyasına və Böyük Vətən müharibəsi illərinə, XX əsrin axırlarında Azərbaycanda milli azadlıq hərəkatına, Qarabağ müharibəsinə, müstəqil Azərbaycan Respublikasının tarixinə dair bölmələrə, ümummilli lider Heydər Əliyevin fəaliyyətini əks etdirən fotolara baxdı. Prezident milli istiqlal tariximizin daha canlı və ətraflı təbliği üçün lazımi göstərişlərini verdi.
Dövlətimizin başçısı xalça muzeyinin keramika fonduna da baxdı, buradakı şəraitlə maraqlandı. Prezident İlham Əliyev dedi ki, bütün muzeylərin binaları yenidən bərpa və təmir olunmalıdır. Lazım gələrsə, yenidən tikilməlidir. Bu bina uzun illər təmirsiz qalmışdır. Memarlıq baxımından çox gözəldir, amma bərbad vəziyyətdədir. Xalça muzeyi üçün ayrı bina tikilməlidir. Bütün eksponatlar yaxşı şəraitdə saxlanmalıdır. Əlbəttə ki, lazımi temperatur rejimi olmalıdır. Dünyada mövcud olan ən yüksək standart nədirsə, o da Azərbaycanda olmalıdır. Qısa müddətdə hərtərəfli təkliflərinizi verin.
Sonra Prezident binanın sonuncu mərtəbəsində yerləşən İncəsənət Qalereyası ilə tanış oldu. Qalereyanın yerləşdiyi və yararsız vəziyyətə düşmüş salonun əsaslı təmir edilməsinin zəruriliyini vurğuladı.
Daha sonra Prezident İlham Əliyev Muzey Mərkəzinin dəyirmi salonunda Azərbaycanın tarix, mədəniyyət abidələrinin əsaslı təmiri, turizm mərkəzlərinin tikintisi ilə bağlı layihələrlə tanış oldu. Dövlətimizin başçısı vurğuladı ki, bütün muzeylər və teatrlar ən yüksək səviyyədə təmir olunmalıdır. Xaricdən memarlar, dizaynerlər, interyerlə məşğul olan mütəxəssislər cəlb edilməlidir. Ayrı-ayrı layihələrə baxan Azərbaycan Prezidenti dedi ki, tarix və mədəniyyət abidələrinin bərpa və təmiri rəqabət şəraitində aparılmalıdır, müxtəlif təkliflər olmalıdır. Çoxlu tikinti-bərpa şirkətləri var. Xarici şirkətləri cəlb etmək olar. Amma, əlbəttə ki, dövlət orqanları tərəfindən bu işə nəzarət olmalıdır.
Respublikamızın rəhbəri Qusar rayonunda yaradılacaq dağ xizəkçiliyi kompleksinin layihəsi ilə də tanış oldu, onun Avropa standartlarına uyğun icrası barədə tapşırıqlarını verdi. Dövlətimizin başçısı dedi ki, paralel olaraq mehmanxanaların yerləri müəyyən edilib tikilməlidir. Elə olmasın ki, kortəbii şəkildə gəlib burada hərə özü üçün tiksin. Bura beynəlxalq səviyyəli kurort və idman-turizm mərkəzi olmalıdır.
Daha sonra Azərbaycan Prezidenti respublikamızın gözəl təbiətini, tarixi keçmişini, mədəniyyətini əks etdirən qısa videolentə baxdı, tövsiyələrini verərək bildirdi ki, belə reklam çarxlarında qədim tarix, bügünkü müasirlik, təbiətimizin müxtəlifliyi və qədim mədəni irsimiz öz əksini tapmalıdır.
Dövlətimizin başçısı mədəniyyətimizə və tarixi keçmişimizə daim həssaslıqla yanaşmağın vacibliyini vurğuladı.
Bölmənin digər xəbərləri
