AZƏRBAYCAN PREZİDENTİ İLHAM ƏLİYEVƏ KYUNQ HE UNİVERSİTETİNİN FƏXRİ DOKTORU ADI VERİLMİŞDİR

27.04.2007 [13:08]
Çap et
A⁺ A^-

Xəbər verdiyimiz kimi, aprelin 24-də Seulda Azərbaycan Respublikasının Prezidenti İlham Əliyevə Kyunq He Universitetinin fəxri doktoru adı verilməsinə həsr olunmuş təntənəli mərasim keçirilmişdir.

Dövlətimizin başçısını universitetin qarşısında bu ali məktəbin prezidenti İnvon Çou böyük hörmət və ehtiramla qarşıladı.

Əvvəlcə universitetin prezidenti, rektoru, professor və müəllim heyəti ilə görüş oldu. Məlumat verildi ki, 1949-cu ildə yaradılan özəl universitetin 3 tələbə şəhərciyi, 20 kolleci var. 36 tədqiqat institutunda 2300 nəfər çalışır. Dünyada məşhur olan universitetdə 23 min tələbə təhsil alır. İki muzeyində toplanmış 29 min eksponat Asiyada ən böyük kolleksiya sayılır.

Sonra Azərbaycan Prezidenti İlham Əliyevə siyasi elmlər üzrə fəxri doktor adı verilməsi münasibətilə təntənəli mərasim oldu. Azərbaycanın və Cənubi Koreyanın dövlət himnləri, habelə universitetin himni səsləndirildi.

Kyunq He Universitetinin Elmi şurasının rəhbəri doktor PYON Sİ PAN mərasimi açaraq dedi:

-Mən böyük məmnunluq və şərəf hissi ilə Azərbaycan Respublikasının Prezidenti zati-aliləri doktor İlham

Əliyevi təqdim etmək istəyirəm. Bu gün ona universitetimizin fəxri siyasi elmlər doktoru adı veriləcəkdir.

Zati-aliləri doktor İlham Əliyev 1961-ci il dekabrın 24-də anadan olmuşdur. O, Moskva Dövlət Beynəlxalq Münasibətlər İnstitutunda elmi dərəcə almışdır və bir çox digər ölkələrin universitetlərinin fəxri doktorudur. Prezident Əliyev, eyni zamanda, 1997-ci ildən etibarən Azərbaycanın Milli Olimpiya Komitəsinin prezidentidir. O, Azərbaycan Respublikasının Baş naziri və Milli Məclisin aparıcı üzvlərindən biri olmuşdur. Əvvəlki vaxtlarda institutda dərs demiş, sonralar isə Dövlət Neft Şirkətinin vitse-prezidenti olmuşdur. Bir çox ölkələrin və beynəlxalq təşkilatların mükafatlarına və fəxri adlarına layiq görülmüşdür. Bir neçə cümlə ilə onun əldə etdiyi bütün nailiyyətlərin hamısını sadalamaq və Azərbaycanın inkişafı naminə fəaliyyətini təsvir etmək çətin olardı.

İndi isə mən böyük şərəf hissi ilə onun Kyunq He Universitetinin fəxri doktoru adına layiq görüldüyünü elan edirəm. Biz Prezident İlham Əliyevə siyasi elmlər üzrə fəxri doktor adının təqdim olunması mərasiminə başlayırıq.

Qəbul edilmiş qaydada uyğun olaraq, biz Kyunq He Universiteti Elmi şurasının üzvləri Azərbaycan Respublikasının Prezidenti doktor İlham Heydər oğlu Əliyevə siyasi elmlər üzrə fəxri doktor adını veririk. Doktor İlham Heydər oğlu Əliyev bir siyasi lider kimi enerji resurslarının işlənilməsi sahəsində yorulmaz fəaliyyət göstərmişdir. O, eyni zamanda, sülhün və əmin-amanlığın təşviq olunması işində, idman sahəsinin inkişafında böyük səylər göstərmişdir.

APARICI: Kyunq He Universitetinin fəxri doktoru adı Azərbaycan Respublikasının Prezidenti, siyasi elmlər doktoru cənab İlham Heydər oğlu Əliyevə verilir. Kyunq He Universiteti Elmi şurasının qaydalarına görə, siyasi elmlər üzrə fəxri doktor adı Azərbaycan Respublikasının Prezidenti cənab İlham Əliyevə 2007-ci il aprelin 24-də verilmişdir. İndi isə fəxri doktorluq adının verilməsi mərasiminə başlayırıq.

Təbii sərvətlərin işlənilməsi sahəsində, habelə sülh və əmin-amanlığın təşviqi sahəsində yorulmaz fəaliyyətinə görə dünyaşöhrətli siyasi lider, Azərbaycan Respublikasının Prezidenti zati-aliləri doktor İlham Əliyevə fəxri doktor adı verilsin. Qərarı 2007-ci il aprelin 24-də Kyunq He Universitetinin prezidenti İnvon Çou imzalamışdır.

Biz Azərbaycan Respublikasının Prezidenti, Kyunq He Universitetinin siyasi elmlər üzrə fəxri doktoru İlham Əliyevi təbrik edirik.

Azərbaycan Prezidenti İlham Əliyevə fəxri doktor mantiyası, orden və medalı, habelə gül dəstəsi təqdim olundu.

Sonra Kyunq He Universitetinin prezidenti İnvon Çou çıxış etdi.