AZƏRBAYCAN PREZİDENTİ İLHAM ƏLİYEVİN BƏYANATI
Hörmətli qonaqlar, xanımlar və cənablar!
İlk növbədə, mən sizi Azərbaycanda bir daha salamlamaq istəyirəm və dəvətimizi qəbul edib bizim ölkəmizə səfər etdiyinizə görə sizə minnətdarlığımı bildirirəm.
Ölkələrimiz arasında çox fəal siyasi münasibətlər mövcuddur. Biz bu münasibətlərin inkişaf səviyyəsindən çox məmnunuq. Bu əlaqələrin digər sahələrdə də inkişaf etdirilməsi üçün bundan sonra da əlimizdən gələni əsirgəməyəcəyik. Azərbaycan bu yaxınlarda Latviyada səfirliyini açmışdır. Artıq səfirlik fəaliyyətə başlamışdır. Bu da bizim ikitərəfli münasibətlərə verdiyimiz əhəmiyyətin mühüm bir əlamətidir.
Bizim bir çox ümumi cəhətlərimiz vardır. Keçmişdə ümumi oxşarlıqlarımız çox olubdur. Ölkələrimiz müstəqillik qazandıqdan sonra yaranmış vəziyyətdən bəhrələnərək, iqtisadiyyatın bütün sektorlarında, habelə siyasi sahədə münasibətlərin qurulması üçün çox çalışmalıyıq. Mən ümid edirəm ki, Latviya Respublikası Prezidentinin səfəri və özəl sektorun nümayəndələrinin ölkəmizə gəlişi, keçiriləcək biznes forumu iqtisadi münasibətlərin daha da genişləndirilməsinə imkanlar yaradacaqdır. Bu işlərin görülməsi üçün çox yaxşı əsas var.
Azərbaycan iqtisadi baxımdan çox sürətlə inkişaf edən ölkədir və gələcək üçün bizim çox yaxşı perspektivlərimiz mövcuddur. Əminəm ki, Latviyanın iş adamları ölkəmizdə həyata keçirilən müxtəlif layihələrdə iştirak edə bilərlər.
Apardığımız danışıqların aspektlərindən biri Azərbaycan ilə Avropa İttifaqı arasındakı əlaqələrə aid idi. Müstəqillik qazandıqdan sonra Azərbaycan Avropaya inteqrasiya siyasətini qətiyyətlə həyata keçirir. Ölkəmizin Avropa İttifaqının “Yeni qonşuluq siyasəti”nə daxil edilməsi bu qurumun Azərbaycana və bütün regiona olan marağından xəbər verir. Hesab edirəm ki, Avropa İttifaqının “Yeni qonşuluq siyasəti”nin Cənubi Qafqaz regionunda həyata keçirilməsi bizim üçün yeni imkanlar açacaqdır. Bu, həm də region ölkələrinin siyasi və demokratik inkişafı üçün mühüm əhəmiyyət kəsb edir. Eyni zamanda, həmin siyasət münaqişələrin də aradan qaldırılmasına müəyyən töhfə verəcək və təbii ki, iqtisadi baxımdan Azərbaycan Avropa İttifaqına daha sıx inteqrasiya edəcəkdir.
Buna görə də münasibətlərimizdə ikitərəfli, regional məsələlər, təhlükəsizlik məsələləri, Avropa İttifaqı ilə Azərbaycan arasında olan münasibətlər bizim üçün çox böyük əhəmiyyət daşıyır. Bütün bu istiqamətlər üzrə bizim tam anlaşmamız var, eyni yanaşmamız mövcuddur. Ümid edirəm ki, bu səfərdən sonra ölkələrimiz arasında münasibətlər, habelə Avropa İttifaqı ilə Azərbaycan arasında münasibətlər yeni mərhələyə qədəm qoyacaqdır.
Avropa İttifaqının digər üzvlərindən fərqli olaraq, Latviya bizim problemlərimizi daha yaxşı başa düşür. Çünki biz eyni ölkədə yaşamışıq. Müstəqillik əldə etdikdən sonra qarşımızda yeni imkanlar açılıb və beləliklə, hər iki ölkə maksimum dərəcədə bütün imkanlardan istifadə edərək müstəqilliyini, təhlükəsizliyini möhkəmləndirməyə və yaxşı qonşuluq ruhunda inkişaf etməyə çalışır.
Mən xanım Prezidentlə keçirdiyim görüşlərdən və apardığımız müzakirələrdən də çox məmnunam. Müzakirə etdiyimiz məsələlərdən biri regional məsələlərə və Qafqazdakı münaqişələrə aid idi. Bildiyiniz kimi, dünyanın bu guşəsində biz uzun illər torpaqlarımızın işğalından və ərazi bütövlüyümüzün pozulmasından əziyyət çəkirik. Problemin həllinə bizim yanaşmamız yalnız və yalnız beynəlxalq hüquq normalarına, yəni Azərbaycanın ərazi bütövlüyünün bərpa olunması və 1 milyondan çox qaçqın və məcburi köçkünün öz doğma yurd-yuvalarına qayıtması prinsipinə əsaslanır.
Biz ümidvarıq ki, Dağlıq Qarabağ probleminin aradan qaldırılmasında vasitəçilik funksiyasını yerinə yetirən ATƏT-in Minsk qrupu bu istiqamətdə öz işini fəal surətdə davam etdirəcəkdir. Eyni zamanda digər təşkilatlar, xüsusən də Avropa təşkilatları bundan sonra da həmin məsələni diqqət mərkəzində saxlayacaqdır. Biz cari ilin yanvar ayında Avropa Şurası Parlament Assambleyasının qəbul etdiyi qətnamədən çox məmnunuq. Həmin sənəddə aydın şəkildə bildirilir ki, Ermənistan Azərbaycana qarşı təcavüz etmiş, etnik təmizləmə siyasəti aparmışdır və bunun nəticəsində 1 milyondan çox insan qaçqın və məcburi köçkün vəziyyətinə düşmüşdür. Biz ümid edirik ki, bu qətnaməyə əməl olunacaq və Avropa İttifaqının da bu qətnaməyə davamlı diqqəti bizə və beynəlxalq ictimaiyyətə münaqişənin dinc yolla nizamlanmasına öz töhfəsini verəcəkdir.
Biz eyni zamanda, beynəlxalq əhəmiyyət daşıyan məsələləri də müzakirə etdik və bu sahədə mövqelərimiz üst-üstə düşür.
Xanım Prezident, bizim dəvətimizi qəbul etdiyinizə və ölkəmizə səfər etdiyinizə görə Sizə bir daha minnətdarlığımı bildirirəm. Bu, Latviya Prezidentinin Azərbaycana ilk rəsmi səfəridir. Mən eyni zamanda, bütün nümayəndə heyətinə də öz təşəkkürümü bildirir və ümid edirəm ki, bu gün və sabah keçirdiyiniz görüşlər ölkələrimizi bir-birinə daha da yaxınlaşdıracaqdır. Siz bizim ölkəmizdə öz tərəfdaşlarınızı taparaq, istənilən sahədə ölkələrimiz arasında əməkdaşlığı daha da genişləndirəcəksiniz. Çox sağ olun.
Bölmənin digər xəbərləri
