AZƏRBAYCAN PREZİDENTİ İLHAM ƏLİYEVİN FRANSA SENATININ TELEVİZİYASINA MÜSAHİBƏSİ
MÜXBİR: Cənab Prezident, öncə Sizi salamlamaq istərdik. Sizə minnətdarlığımızı bildirmək istəyirik ki, Prezident seçildikdən sonra ikinci dəfədir Fransaya səfər edirsiniz. Biz bundan çox şadıq. Birinci sualımız ondan ibarətdir ki, bu yaxınlarda Şimali Osetiyada girovların götürülməsi hadisəsi baş vermişdir. Bu faciəli hadisə nəticəsində 300-dən çox insan həlak olmuşdur. Ümumiyyətlə, Kremlin bu hadisə zamanı apardığı siyasəti necə qiymətləndirirsiniz?
İLHAM ƏLİYEV: Sizin də söylədiyiniz kimi, bu, mənim Fransaya ikinci səfərimdir. Birinci dəfə yanvar ayında burada rəsmi səfərdə olmuşam. İndiki səfər isə işgüzar xarakter daşıyır. Bu, bir daha onu göstərir ki, Fransa ilə Azərbaycan arasında olan münasibətlər inkişaf edir. Bizim həm siyasi, həm iqtisadi, həm də mədəni sahələrdə çox gözəl münasibətlərimiz vardır. Bilirik ki, Fransa ilə Azərbaycan arasında olan münasibətlər güclənir və möhkəmlənir.
Azərbaycan özü terrorizmə məruz qalan bir ölkədir. Ölkəmizdə 30-dan çox terror aktı törədilmişdir, bu aktlar nəticəsində 2 mindən çox günahsız insan həlak olmuşdur. Biz yaxşı bilirik ki, terrorizmlə səmərəli mübarizə aparmaq üçün bütün dünya ictimaiyyəti, beynəlxalq aləm öz səylərini birləşdirməlidir. Yalnız bu halda beynəlxalq terrorizmlə mübarizə öz səmərəsini verə bilər. Şimali Osetiyada baş vermiş terror aktı bizi kədərləndirdi. Biz Rusiya hökumətinə və xalqına başsağlığı vermişik, eyni zamanda, öz yardımımızı təklif etmişik. Günahsız insanların, xüsusilə uşaqların həlak olması böyük faciədir.
SUAL: Bu günlərdə belə bir məlumat əldə edildi və Prezident Putin də dedi ki, bu terror aktı beynəlxalq terrorizmin bir elementidir, bunda “Əl-Qaidə” təşkilatının da əli vardır. Bu baxımdan nə deyə bilərsiniz?
CAVAB: Bizim üçün hər hansı bir fikir söyləmək çətindir. Çünki biz məsələnin tam mahiyyətini bilmirik, məlumatı yalnız televiziya ekranlarından, mətbuat vasitəsilə almışıq. Əgər Rusiya hökumətində belə bir məlumatlar varsa, yəqin ki, bunun bir əsası vardır. Amma əsas məsələ bunda deyildir. Əsas məsələ ondadır ki, terrorizm hər bir ölkə üçün təhlükə mənbəyidir. Heç bir ölkə özünü arxayın hesab edə bilməz. Ən güclü ölkə də təkbaşına terrorizmlə mübarizə aparmaqda çətinlik çəkə bilər. Ona görə də mən yenə öz fikrimə qayıdıram ki, biz yalnız və yalnız beynəlxalq səylər nəticəsində terrorizmlə müvəffəqiyyətlə mübarizə apara bilərik.
SUAL: Cənab Prezident, Siz özünüz də dediniz ki, Azərbaycan vaxtilə terror aktlarına məruz qalmışdır. Belə bir sual vermək istəyirəm ki, bu günlərdə terrorizmə qarşı mübarizə aparmaq üçün Azərbaycan digər ölkələr tərəfindən hər hansı bir yardım alırmı?
CAVAB: Azərbaycanda baş vermiş terror aktları 1990-cı illərin əvvəllərinə təsadüf edir. O vaxt Ermənistanla Azərbaycan arasında müharibə gedirdi və Ermənistanın işğalçı qüvvələri Azərbaycan torpaqlarının 20 faizini işğal etmişdir. Ölkəmizə qarşı törədilmiş terror aktları erməni terror təşkilatı “Asala” tərəfindən həyata keçirilmişdir. O vaxt nə Çeçenistan müharibəsi var idi, nə də Nyu-Yorkda terror aktı törədilmişdi. Ümumiyyətlə, beynəlxalq ictimaiyyət bu məsələyə, yəni terroizmə ciddi yanaşmırdı. Biz, demək olar ki, erməni terrorizmi ilə üz-üzə qalmışdıq. Bəlkə də o vaxt beynəlxalq ictimaiyyət, böyük dövlətlər öz mövqeyini, öz etirazını bildirsəydilər, sonrakı terror aktları da baş verməzdi. Bu gün isə Azərbaycanda vəziyyət sabitdir, əmin-amanlıqdır, insanlarımız təhlükəsizlik şəraitində yaşayır.
SUAL: Biz bilirik ki, Azərbaycanın əhalisinin əsas hissəsi – 90 faizdən çoxu müsəlmandır. Belə bir şəraitdə Siz öz ölkənizin hər hansı bir islam terrorizminin təsiri altına düşməsindən ehtiyat etmirsiniz ki?
CAVAB: Azərbaycan dünyəvi dövlətdir, din dövlətdən ayrıdır. Biz öz siyasətimizi dünya birliyinə inteqrasiyada görürük. Azərbaycanın çox qədim tarixi, mədəniyyəti vardır. Xalqımız bəşəriyyətə çox böyük töhfələr vermişdir. Eyni zamanda, biz ümumbəşəri dəyərləri də çox sürətlə mənimsəyirik. Azərbaycanda dini zəmində heç bir problem yoxdur. Milli və dini dözümlülük bizim cəmiyyətimizi səciyyələndirən əlamətlərdən biridir. Azərbaycanda hər hansı bir dini təhlükə də yoxdur. Biz bütün dövlətlərlə yaxşı münasibətlər qurmaq arzusundayıq. Bu siyasət bundan sonra da aparılacaqdır.
SUAL: Cənab Prezident, Azərbaycan Avropaya sürətlə inteqrasiya edir. Bilmək istəyirik ki, bu siyasət Sizin üçün prioritetdirmi?
CAVAB: Əlbəttə, bizim üçün Avropa strukturlarına inteqrasiya siyasəti prioritet məsələlərdən biridir. Avropa Birliyi ilə çox gözəl münasibətlərimiz vardır. Bu təşkilatın Azərbaycanı yeni qonşuluq siyasətinə daxil etməsi onu göstərir ki, Avropa tərəfindən də Azərbaycana maraq günü-gündən artır. Ölkəmizin coğrafi-siyasi vəziyyəti, təbii ehtiyatları və siyasəti Avropa Birliyi üçün də önəmlidir. Biz bu əlaqələri Fransa, Almaniya, digər Avropa ölkələri ilə həm ikitərəfli formatda genişləndiririk, eyni zamanda, bu münasibətlər Avropa Birliyi çərçivəsində də inkişaf edir.
Bölmənin digər xəbərləri
