Sentyabrın 16-da Azərbaycan Prezidenti İlham Əliyev Moskvada, Rusiya hökumətinin Qəbullar Evində RF hökumətinin sədri Vladimir Putinlə görüşmüşdür.

Rusiya hökumətinin sədri VLADİMİR PUTİN Azərbaycan dövlətinin başçısını salamlayaraq dedi:

-Hörmətli İlham Heydər oğlu, hörmətli həmkarlar. Sizi salamlamağıma çox şadam. Mənə çox xoşdur ki, Siz köhnə dostlarınızı unutmursunuz. Sağ olun. Əminəm ki, biz iqtisadi əlaqələrimizin inkişafı haqqında söhbət edə biləcəyik. Lakin, ilk növbədə, demək istəyirəm ki, bizim dövlətlərarası münasibətlərimiz həqiqətən yüksələn xətlə inkişaf edir. Mən iqtisadi sahədə nail olduğumuz inkişaf sürətinə ən yüksək qiymət verərdim, elə siyasi sahədə də biz daim əlaqə saxlayırıq.

Bildiyiniz kimi, bu yaxınlarda biz Sizin atanızın - Azərbaycan Prezidentinin, keçmiş Sovet İttifaqının və Azərbaycan Respublikasının görkəmli dövlət xadiminin 85 illik yubileyini birlikdə qeyd etdik. Xatırlatmaq istəyirəm ki, Sizin atanız dövlətlərarası münasibətlərimizin inkişafına çox böyük töhfə vermişdir. Biz çox ümid edirik ki, vaxtilə əvvəlki Prezident tərəfindən təməli qoyulmuş müsbət işlər bu gün də, gələcəkdə də çoxalacaqdır.

Mən bunu yaxşı bilirəm və biz görürük ki, son illərdə Azərbaycanın xarici siyasətinin Rusiya istiqamətində varislik təmin edilmişdir və biz belə hesab edirik ki, siyasi səviyyədə toplanmış müsbət nə varsa, qarşılıqlı iqtisadi əlaqələrə çevrilməlidir. İndi dünya maliyyə bazarlarında, dünya iqtisadiyyatında rəqabətin kifayət qədər geniş miqyas aldığını gördüyümüz bir vaxtda bu, xüsusilə aktualdır.

Hazırda dünya bazarlarından alınan məlumatlar sadəcə olaraq təşviş doğurur. Biz həmin bazarlarda nələr baş verdiyini görürük. Qərbin demək olar ki, bütün bazarlarında tənəzzül müşahidə olunur. Bu, heç şübhəsiz, bizim iqtisadiyyata da bu və ya digər dərəcədə təsir göstərir, çünki iqtisadiyyatımız qlobal dünya iqtisadiyyatının tərkib hissəsidir. Lakin Rusiyanın Azərbaycan üçün olduğu kimi, Azərbaycan də bizim üçün həmişə etibarlı tərəfdaş olmuşdur və belə olaraq qalır. Sizə demək istəyirəm ki, dünya iqtisadiyyatında baş verən bu mürəkkəb hadisələrdən biz sakit ötüşəcəyik. Rusiyanın maliyyə bazarlarında likvidliyi dəstəkləmək üçün təkcə bu gün Maliyyə Nazirliyi 150 milyard rubl, Mərkəzi Bank isə 325 milyard rubl yerləşdirmişdir. Maliyyə Nazirliyi sabah yerləşdiriləcək məbləği iki dəfədən çox artıraraq, 350 milyard rubla çatdırmaq niyyətindədir. Hazırda maliyyə naziri və Mərkəzi Bankın sədri Rusiyanın ən iri banklarının rəhbərləri ilə gələcək birgə fəaliyyəti müzakirə edirlər. Biz şübhə etmirik ki, son illərdə Rusiya iqtisadiyyatında yaradılmış təhlükəsizlik “yastıqları” öz səmərəsini verəcəkdir. Hazırda biz Mərkəzi Bank tərəfindən uzunmüddətli təsir vasitələrinin tətbiq edilməsinin mümkünlüyünü də öyrənirik. Bizim bu cür praktikamız var. Biz səliqə ilə, düşünülmüş şəkildə hərəkət edəcəyik.

Mən Azərbaycan iqtisadiyyatındakı müsbət artım meyillərini nəzərə alaraq bilirəm ki, bu, nəinki MDB məkanı üçün, hətta dünya miqyasında rekorddur - keçən il Azərbaycan iqtisadiyyatında 25 faiz, bu il 18 faiz artım olmuşdur. Bizdə bu ilin birinci yarısında iqtisadi artım 8 faiz, bütövlükdə keçən il 8,1 faiz olmuşdur. Bu, sabitlik elementidir və biz, əlbəttə, ondan istifadə etməliyik. Təbii ki, bu şəraitdə Müstəqil Dövlətlər Birliyinin üzvü olan ölkələr arasında iqtisadi münasibətlərə tələbat daha çoxdur, kooperasiyanın dərinliyi və bizim qarşılıqlı əlaqələrimizin dərəcəsi bunu tələb edir. Sizi görməyimizə çox şadıq. Zənnimcə, lazımi vaxtda biz Moskvada görüşəcəyik.

Prezident İLHAM ƏLİYEV Rusiya hökumətinin başçısına müraciətlə dedi:

-Sağ olun, Vladimir Vladimiroviç. Mən də Sizi görməyimə və ikitərəfli münasibətlərimiz, regional əməkdaşlıq haqqında, eləcə də ölkələrimizin iqtisadi uğurları və yeni birgə layihələrin imkanları barədə bir daha fikir mübadiləsi aparmaq imkanına görə çox şadam.

Sizin qeyd etdiyiniz kimi, ölkələrimiz arasında münasibətlər çox müsbət şəkildə inkişaf edir. Biz bunu çox yüksək qiymətləndiririk. Onu da qeyd etmək istərdim ki, ölkələrimiz arasında müasir münasibətlərin əsasını Siz və Azərbaycan Prezidenti Heydər Əliyev qoymuşsunuz. Mən bunu çox yaxşı xatırlayıram. Sizin ilk görüşünüz, sonra isə Sizin Azərbaycana səfəriniz - bu, Rusiya Prezidentinin bizim ölkəyə ilk rəsmi səfəri idi, - ölkələrimiz arasında münasibətlərin inkişafının əsas mərhələləri oldu, bundan sonra biz çox böyük tərəqqinin şahidi olduq. İndi, o vaxtdan 8 il keçəndən sonra biz Rusiya ilə Azərbaycan arasında bütün sahələri əhatə edən, çox dinamik inkişaf edən münasibətlərin bütün bəhrələrindən istifadə edirik. Əlbəttə, Moskvada Heydər Əliyevin xatirəsinə göstərilən münasibət - onun yubileyinin keçirilməsi, eləcə də Baykal-Amur dəmir yolunun stansiyalarından birinə onun adının verilməsi, bununla əlaqədar çox səmimi mərasim keçirilməsi Azərbaycanda bizim hamımız üçün çox dəyərlidir. Bütün bunlar Azərbaycanda çox yüksək qiymətləndirilir.

Bizim ölkələr arasında münasibətlər təkcə siyasi maraqlar xarakteri daşımır, bu münasibətlər həm də çox səmimi, ürəkdən gələn münasibətlərdir və münasibətlərimizin tarixini və xalqlarımızın yanaşı yaşamaq ənənələrini əks etdirir. Əminəm ki, gələcəkdə biz birgə səylərimizlə bu münasibətləri daha da genişləndirəcəyik. Bizim aramızda çox fəal siyasi dialoq var. Sizinlə çoxsaylı görüşlərimizi xatırlayıram. Bu gün Rusiya siyasətində də Azərbaycana münasibətdə varislik qorunub saxlanır. Ona görə də biz paralel yollarla gedirik və bu, bizim uğurlarımızın rəhnidir.

İndi Rusiya da, Azərbaycan da postsovet məkanında siyasi proseslər, iqtisadi nailiyyətlər baxımından ən dinamik inkişaf edən ölkələrdir. Son beş ildə Azərbaycanda iqtisadiyyatın həcmi 2,7 dəfə artmışdır. Əlbəttə, artmaqda olan bu potensial əməkdaşlığı daha da dərinləşdirməyə imkan verir. Biz buna çox ümid bəsləyirik və mən əminəm ki, qarşılıqlı siyasi əlaqələrin hazırda mövcud olan və möhkəmlənən səviyyəsi yeni iqtisadi təşəbbüslər üçün yaxşı zəmin yaradır. Əlbəttə, Sizin qeyd etdiyiniz kimi, dünya maliyyə bazarlarında yaranmış mürəkkəb şəraitdə biz bu məqamları nəzərə almalı, əməkdaşlığın potensialını təshih etməli və artırmalıyıq. Bu il əmtəə dövriyyəmiz çox böyük sürətlə, 50 faizdən çox artmışdır, özü də onun strukturu yaxşılığa doğru dəyişir. Bütün bunlar onu göstərir ki, iki ölkə arasında münasibətlər qarşılıqlı maraqlar, dostluq, mehriban qonşuluq əsasında qurulursa, bu münasibətlər proqnozlaşdırıla bilirsə, iqtisadi inkişafla bağlı bütün məsələlər daha uğurla həll edilir. Buna görə də münasibətlərimizin mövcud səviyyəsi məni çox sevindirir və ümid edirəm ki, bu münasibətlər bütün istiqamətlər üzrə genişlənəcək, şəxsi planda isə Sizinlə yenidən görüşəcəyik.

VLADİMİR PUTİN: Gərək ki, sizdə ikiqat profisit yaranmışdır - həm büdcədə, həm də ticarətdə, elədirmi?

İLHAM ƏLİYEV: Elədir, çox böyük profisit yaranmışdır. Son beş il yarımda büdcəyə daxilolmalar 15 dəfə artmışdır, büdcənin xərcləri də sürətlə artır. Təbii ki, bu vəziyyət inflyasiyaya mənfi təsir göstərir, lakin bu, bizim iqtisadi artım üçün ödədiyimiz qiymətdir və hesab edirəm, bu meyillər gələcəkdə də davam edəcəkdir. Əlbəttə, ÜDM-in 35 faiz və 25 artması yəqin ki, artıq tarixə çevrilmişdir, lakin artımın keyfiyyəti bizim maraqlarımıza daha çox uyğun gələcəkdir. Biz gələcəyə nikbin baxırıq - həm iqtisadi təşəbbüslər çərçivəsində, həm də ölkələrimiz arasında münasibətlərin inkişafı baxımından. Sağ olun.

######