Azərbaycan regionda davamlı sülh, təhlükəsizlik və əməkdaşlığa hər zaman sadiqdir - ŞƏRH
Bakı, 22 sentyabr, AZƏRTAC
Azərbaycanda akkreditə olunmuş diplomatik korpusun nümayəndələrinin Qarabağ və Şərqi Zəngəzura səfəri çərçivəsində dini və tarixi abidələrin ziyarət edilməsi bəzi erməni radikal dairələrində ciddi narahatlıqla qarşılanıb. Lakin bu narahatlığın əsas səbəblərindən biri səfərdə diplomatik korpusun daha geniş tərkibdə təmsil olunması və beynəlxalq ictimaiyyət nümayəndələrinin işğaldan azad edilmiş ərazilərdə həyata keçirilən genişmiqyaslı bərpa-quruculuq işləri ilə yerində tanış olmasıdır.
Halbuki səfərin əsas məqsədi hər hansı ölkəni və ya tərəfi hədəfə almaq deyil, işğaldan azad edilmiş ərazilərdə aparılan bərpa, yenidənqurma və abadlıq işləri, eləcə də həyata keçirilən digər layihələr barədə diplomatik korpus nümayəndələrini məlumatlandırmaq və görülən işləri yerində nümayiş etdirməkdən ibarət olub. Qarabağ və Şərqi Zəngəzurda müxtəlif beynəlxalq tədbirlərin keçirilməsi, xarici ölkələrin dövlət və hökumət nümayəndələrinin, diplomatların, beynəlxalq təşkilatların və media təmsilçilərinin səfərlərinin təşkili də yeni proses deyil. Azərbaycanın bu səfərlər çərçivəsində təqdim etdiyi əsas mesaj isə davamlı olaraq sülh, quruculuq, təhlükəsizlik və regional əməkdaşlıqla bağlıdır.
Bu sözləri AZƏRTAC-a açıqlamasında Milli Məclisin deputatı Azər Allahverənov deyib.
Deputat bildirib ki, səfər çərçivəsində Qafqaz Albaniyasının dini irsi ilə bağlı mühüm tarixi abidələrə, o cümlədən Gəncəsər və Xudavəng kilsələrinə baş çəkilib. Beynəlxalq nümayəndələrin həmin abidələri yerində görməsi, onların mövcud vəziyyəti, tarixi keçmişi və qorunması istiqamətində görülən işlərlə tanış olması mühüm əhəmiyyət daşıyır.
“Biz işğal dövrünə nəzər salsaq, Qarabağ və Şərqi Zəngəzur ərazisində yerləşən bir sıra dini abidələrin tarixi kimliyinin dəyişdirilməsi, onların erməni dini irsi kimi təqdim olunması istiqamətində müxtəlif cəhdlərin olduğunu görə bilərik. Bu baxımdan, işğaldan azad edilmiş ərazilərə beynəlxalq nümayəndə heyətlərinin səfərləri həmin abidələrin real vəziyyətinin, tarixi-mədəni əhəmiyyətinin və qorunması ilə bağlı görülən işlərin yerində öyrənilməsi baxımından xüsusi əhəmiyyət daşıyır”, - deyə deputat qeyd edib.
Onun sözlərinə görə, Qafqaz Albaniyasının tarixi və mədəni irsi ilə bağlı məsələlər elmi mənbələr, arxiv sənədləri, epiqrafik materiallar və memarlıq xüsusiyyətləri əsasında obyektiv şəkildə araşdırılmalıdır. Qarabağ və Şərqi Zəngəzurda yerləşən qədim xristian abidələrinin tarixi mənşəyi ilə bağlı məsələlərin siyasiləşdirilməsi əvəzinə, onların elmi əsaslarla tədqiqi və gələcək nəsillər üçün qorunması daha məqsədəuyğundur.
Deputat qeyd edib ki, səfərə Ermənistan cəmiyyətinin müəyyən dairələrində verilən kəskin reaksiyalar da diqqətdən kənarda qalmamalıdır. Onun fikrincə, regionda münaqişə mərhələsinin başa çatmasına baxmayaraq, Ermənistan cəmiyyətinin bəzi seqmentlərində revanşist yanaşmalar və keçmiş münaqişə müstəvisindən çıxmayan mövqelər hələ də müşahidə olunur.
“Azərbaycan regionda davamlı sülhün, təhlükəsizliyin və əməkdaşlığın təmin olunması üçün beynəlxalq hüququn prinsiplərinə, dövlətlərin suverenliyi və ərazi bütövlüyünə hörmət edilməsinə hər zaman sadiqdir. Bu baxımdan, işğaldan azad edilmiş ərazilərdə aparılan bərpa-quruculuq işlərinin beynəlxalq ictimaiyyətə təqdim olunması, tarixi və mədəni irslə bağlı faktların elmi mənbələr və sənədlər əsasında çatdırılması xüsusi əhəmiyyət daşıyır. Belə səfərlər həm görülən işlərin nümayiş etdirilməsi, həm də bölgədə yeni reallıqların beynəlxalq ictimaiyyət tərəfindən yerində müşahidə olunması baxımından mühüm platformadır”, - deyə A.Allahverənov əlavə edib.
Bölmənin digər xəbərləri
