AZƏRBAYCAN RESPUBLİKASI PREZİDENTİNİN VƏ LİTVA RESPUBLİKASI PREZİDENTİNİN TƏRƏFDAŞLIQ MÜNASİBƏTLƏRİNİN İNKİŞAFI HAQQINDA BİRGƏ BƏYANNAMƏSİ
Azərbaycan Respublikasının Prezidenti və Litva Respublikasının Prezidenti,
Azərbaycan Respublikasının Prezidenti Zati-aliləri cənab İlham Əliyevin Litvaya 2007-ci il sentyabrın 13-də həyata keçirilən tarixi səfərinin iki ölkə arasında ikitərəfli əlaqələrin dərinləşməsinə və dostluğun daha da genişlənməsinə töhfə verəcəyinə əminlik ifadə edərək,
Azərbaycan və Litva strateji tərəfdaşlığını gücləndirmək niyyətində olaraq və hər iki ölkənin regional və beynəlxalq səviyyədə rollarının əhəmiyyətini vurğulayaraq,
Azərbaycan-Litva siyasi, iqtisadi, hərbi və mədəni əlaqələrinin güclənməsinin və inkişafının hər iki dövlət, Baltik-Qara dəniz-Qafqaz regionu və bütün Avropa üçün əhəmiyyətini vurğulayaraq,
Müxtəlif beynəlxalq və regional təşkilatlar və qurumlar çərçivəsində iki ölkə arasında əməkdaşlığın əhəmiyyətini vurğulayaraq,
İki ölkə arasında iqtisadi əməkdaşlığın genişləndirilməsi prosesində Azərbaycan-Litva ticarət mübadiləsinin artırılması və şaxələndirilməsinin aparıcı amil kimi əhəmiyyətini qeyd edərək,
Hər iki ölkədə səfirliklərin açılmasını alqışlayaraq,
Prezidentlərin 2006-cı ilin iyun ayında imzalanmış Birgə Bəyannaməsində əks olunmuş əməkdaşlıq məqsədlərini təsdiq edərək,
bəyan edirlər:
-strateji tərəfdaşlığı gücləndirmək, siyasi və iqtisadi məsləhətləşmələri davam etdirmək məqsədi ilə regional və qlobal təhlükəsizliyi gücləndirməyə yönəlmiş dialoqu canlandırmaq;
-ikitərəfli əlaqələrin təşviqinin təmin edilməsi üçün mövcud hüquqi çərçivəni genişləndirmək;
-BMT Nizamnaməsinin prinsiplərini, BMT-nin Təhlükəsizlik Şurasının müvafiq qətnamələrini və ATƏT-in Lissabon sammitində qəbul edilmiş üç prinsipi tam dəstəkləyərək və onları rəhbər tutaraq, Ermənistan-Azərbaycan, Dağlıq Qarabağ münaqişəsinin beynəlxalq hüququn hamılıqla tanınmış prinsip və normaları əsasında, xüsusilə dövlətlərin suverenliyi, ərazi bütövlüyü və sərhədlərinin toxunulmazlığı prinsipləri əsasında sülh yolu ilə həll edilməsinin vacibliyini vurğulayırlar;
-Ermənistan-Azərbaycan, Dağlıq Qarabağ münaqişəsinin sülh yolu ilə həll edilməsi istiqamətində ATƏT çərçivəsində davam edən səylərə, həmçinin Minsk qrupunun fəaliyyətinə istinad edərək, bu istiqamətdə daha təsirli və qətiyyətli addımlar atılmasının əhəmiyyətini qeyd edirlər;
-BMT, ATƏT və digər beynəlxalq təşkilatlar çərçivəsində qarşılıqlı əməkdaşlığın səmərəliliyini artırmaq üçün səyləri davam etdirəcəklər. BMT-nin islahatlarına uyğun olaraq, beynəlxalq məsələlərdə təşkilatın səmərəliliyini və yeni çağırış və təhdidlərin qarşısında potensialından istifadəni artırmaqla, diqqət onun mərkəzi rolunun gücləndirilməsinə yönəldilməlidir;
-Avratlantik Tərəfdaşlıq Şurası, NATO-nun “Sülh naminə tərəfdaşlıq” proqramı, NATO-nun “Sülh naminə tərəfdaşlıq” Etimad Fondu və Azərbaycanın təqdim etdiyi “Fərdi tərəfdaşlığa dair fəaliyyət planı” çərçivəsində sıx əməkdaşlığı və təcrübə mübadiləsini dəstəkləyirlər;
-Cənubi Qafqazda sabitliyi və təhlükəsizliyi artırmaq məqsədi ilə, hərbi və hərbi-texniki sahələrdə əməkdaşlıq etmək və ayrıca sazişlər əsasında hər iki dövlətin müvafiq qurumları arasında əlaqələrin inkişaf etdirilməsinə yardım göstərmək;
-ticarəti və iqtisadi əməkdaşlığı təşviq etmək və investisiyaların təşviqi də daxil olmaqla, bütün növ biznes fəaliyyətləri üçün əlverişli hüquqi, institusional və digər şəraitləri təmin etmək;
-enerji təhlükəsizliyinin vacibliyini vurğulayır və bununla əlaqədar Xəzər dənizi regionunun enerji ehtiyatlarının Avropanın enerji tələbatının təmin edilməsində artan və müsbət təsirinin hər iki tərəfin strateji maraqlarında olan rolunu qeyd edirlər;
-Avropa İttifaqı ilə Xəzər regionu arasında enerji əməkdaşlığı sahəsində əlaqələri möhkəmləndirmək;
-Bakı-Tbilisi-Ceyhan və Bakı-Tbilisi-Ərzurum neft və qaz boru kəmərlərinin işə düşməsinin qlobal enerji təhlükəsizliyinə töhfə verəcəyinə və region ölkələrinin davamlı iqtisadi inkişafına xidmət edəcəyinə inamlarını ifadə edirlər;
-Avropanın neft təchizatında mühüm rol oynayacaq Odessa-Brodı-Plotsk-Qdansk neft kəməri layihəsində iştirakın əhəmiyyətini vurğulayırlar;
-Avropa-Qafqaz-Asiya (TRASEKA) nəqliyyat dəhlizinin və VİKİNQ layihəsinin inkişafı naminə nəqliyyat və yük daşımaları istiqamətində həm regional, həm də ikitərəfli formatda əməkdaşlığı gücləndirmək. Bu layihələr Baltik, Xəzər və Qara dəniz regionlarında və ətrafda iqtisadi inkişaf, təhlükəsizlik və sabitliyə mühüm töhfə verəcək;
-ətraf mühitin mühafizəsi sahəsində əməkdaşlıq etmək;
-gənclər və tələbələr mübadiləsi, kütləvi informasiya vasitələri və ümumilikdə cəmiyyətlər arasında əlaqələri genişləndirməklə mədəniyyət, elm, təhsil, səhiyyə və sosial müdafiə, insanlar arasında əlaqələrin artırılmasında əməkdaşlıq etmək;
-Azərbaycan və Litva dillərinin öyrənilməsinə və ədəbiyyatının yayılmasında, habelə elm, ədəbiyyat və incəsənət xadimləri arasında təmasların inkişaf etdirilməsində əməkdaşlıq etmək;
-dinlər və sivilizasiyalar arasında dialoqa şərait yaratmaq, həmçinin harmoniya, anlaşma, bir-birini yaxşı tanımaq və insan istedadının inkişafı üçün hər iki ölkədə mövcud olan Xristianlıq, İslam və digər mədəniyyətlər və dinlər arasında əlaqələri və anlaşmanı genişləndirmək.
Prezidentlər Azərbaycan Respublikasının Avropa İttifaqına yaxınlaşmasında Avropa Qonşuluq siyasətinin müsbət təsirini məmnuniyyətlə qeyd etdilər və Avropa Qonşuluq siyasətinin Cənubi Qafqazda sabitlik və təhlükəsizliyin bərpa olunmasına töhfə verəcəyini vurğuladılar. Tərəflər belə bir vahid mövqedən çıxış edirlər ki, Fəaliyyət planının müddəalarının həyata keçirilməsi Azərbaycan Respublikası ilə Aİ-nin üzv dövlətləri arasında fəal əməkdaşlığa əsaslanmalıdır. Azərbaycan Respublikası Fəaliyyət planının həyata keçirilməsində Litva Respublikasının Azərbaycan Respublikasına yardım etməyə hazır olduğunu alqışladı.
Vilnüs, 13 sentyabr 2007-ci il.
Bölmənin digər xəbərləri
