AZƏRBAYCAN RESPUBLİKASI XARİCİ İŞLƏR NAZİRLİYİ MƏTBUAT MƏRKƏZİNİN MƏLUMATI
Səfirin diqqətinə çatdırılmışdır ki, 2003-cü il oktyabrın 14-də Bakı vaxtı ilə axşam saat 21-dən 22.30-dək İran İslam Respublikasının “Səhər-2” dövlət televiziya kanalı ilə Azərbaycanda prezident seçkilərinə həsr olunmuş Azərbaycan dilində ayrıca proqram nümayiş etdirilmişdir. Proqram əvvəldən axıra kimi prezidenliyə namizədlərdən birinin - İsa Qəmbərin təbliğinə həsr olunmuşdur. Belə bir faktın Azərbaycanda seçkiqabağı təbliğat kampaniyasının dayandırıldığı vaxtda - seçki gününə bir gün qalmış baş verməsi onun əvvəlcədən düşünüldüyünü və məqsədyönlü şəkildə həyata keçirildiyini bir daha sübut edir. “Səhər-2” televiziya proqramının Azərbaycanın İran İslam Respublikası ilə həmsərhəd rayonlarında yayımlanması nəzərə alınarsa, İranın rəsmi informasiya orqanının bu təbliğat aksiyası Azərbaycanın daxili işlərinə qarışmaq, İsa Qəmbərin namizədliyini açıq şəkildə dəstəkləmək və bu istiqamətdə Azərbaycan seçicilərinə psixoloji təsir göstərmək kimi qiymətləndirilməlidir. İranın “Səhər-2” televiziya kanalının İsa Qəmbərin təbliğatına yönəldilmiş bu şousu İranla həmsərhəd bölgələrdə yaşayan Azərbaycan Respublikası vətəndaşlarının ciddi narahatlığına səbəb olmuş və kəskin etirazla qarşılanmışdır. Vətəndaşlar dövlət hakimiyyəti orqanlarına - ilk növbədə, Xarici İşlər Nazirliyinə, habelə Mərkəzi Seçki Komissiyasına müraciət edərək, seçki kampaniyasına kənardan bu cür müdaxilə hallarını qətiyyətlə pisləyir və müvafiq tədbirlərin görülməsini tələb edirlər.
Səfirin diqqətinə çatdırılmışdır ki, Azərbaycan Respublikasının daxili işlərinə qarışmaq Azərbaycanla İran arasında mövcud olan dövlətlərarası münasibətlərin prinsipləri, qarşılıqlı hörmətə əsaslanan dinc qonşuluq əlaqələri ilə bir araya sığmır, eləcə də beynəlxalq hüquq normaları ilə ziddiyyət təşkil edir. Bildirilmişdir ki, beynəlxalq təşkilatlardan və dünya dövlətlərindən min nəfərdən artıq müşahidəçinin, habelə minlərlə yerli müşahidəçinin izlədiyi Azərbaycandakı prezident seçkilərinə qonşu dövlətin elektron kütləvi informasiya vasitələri tərəfindən bu cür açıq müdaxilə edilməsinə baxmayaraq, Azərbaycan xalqı öz seçimini ədalətli, demokratik, beynəlxalq standartlara uyğun şəkildə həyata keçirəcəkdir. Belə bir əminlik vurğlanmışdır ki, bu cür xoşagəlməz hərəkətlər Azərbaycan xalqının iradəsinə və azad, doğru seçiminə təsir edə bilməz.
Bölmənin digər xəbərləri
